Azərbaycanda məşhur istirahət mərkəzlərindən biri olan “Amburan Beach Club”da qiymətlər müştəriləri heyrətə salıb. Bu barədə sosial şəbəkədə foto paylaşılıb.
Belə ki, sözügedən istirahət mərkəzində 0.75 litrlik qazsız sirab üçün 21 manat, 0.33 litrlik kolaya görə 33 manat, çörək üçün 7 manat 50 qəpik tələb edilib. Qəlyan üçün isə müştəri 264 manat ödəməli olub.
Ekspertlər bu kimi amillərin çimərlik turizminin inkişafına zərbə olduğu fikrindədir.
"Sözügedən yerlərdə qiymətlərin yüksək olmasının səbəbi onların həm prestijlərini yüksək saxlaması, həm icarə haqlarının baha olmasıdır"
Sosial sahə üzrə ekspert Elxan Əliyev "Bakı-Xəbər"ə açıqlamasında qeyd etdi ki, ölkəmizdə çimərlik turizminin inkişaf etdirilməsi dövlətin diqqət və maraq göstərdiyi turizm sahələrindəndir: "Turist kənarda mağazadan aldığı sərinləşdirici içkini çimərlikdə, yaxud istirahət mərkəzində iki-üç qat baha qiymətə alırsa, təbii ki, növbəti il həmin turist bir də bizim çimərliklərə üz tutmayacaq. Bu gün hər kəs Sirab, Cola və ya çörəyin qiymətini yaxşı bilir. Sahibkar qazanc əldə etmək istəyirsə təklif etdiyi məhsulların üzərinə az məbləğdə pul qoysun. Belə olarsa həm onlar qazanar, həm də turist sayı çox olar. Yoxsa iki şiş kabab, müxtəlif növ sərinləsdirici içkilərə görə istehlakçıdan 600-800 manat tələb etməsi düzgün deyil".
Ekspert hesab edir ki, restoranda qiymət yüksəkdirsə, bunun arxasında yüksək də xidmət olmalıdır: "Restoran biznesinə başlamaq üçün şərtlər sərtləşdirilməlidir ki, səriştəsiz insanlar bu işlə məşğul ola bilməsin. Biz azad iqtisadi şəraitdə yaşayırıq. Bazar özü qiymətləri tənzimləyir. Danılmaz faktdır ki, bu gün restoran biznesinə gəlmək asandır. Bu iş az investisiya tələb edir və hər kəs bu işlə məşğul ola biləcəyini düşünərək, başqalarının burdan qazanc əldə etdiyini görən kimi bu biznesə üz tutur. Nəticədə restoranlarda keyfiyyətsiz yeməklər, keyfiyyətsiz xidmət, uyğun olmayan qiymətlər təqdim olunur. Odur ki, digər məsələlər tənzimlənsə, qiymətlər məsələsi də tənzimlənəcək. Bu biznesə gəlmə şəraitini, şərtlərini bir az sərtləşdirmək lazımdır. Müəyyən tələblər ortaya çıxmalıdır. Digər tərəfdən, həmin müəssisələrdə çalışan personalın peşəkar olmasına diqqət yetirmək lazımdır".
Ekspert onu da əlavə etdi ki, qiymətlərin formalaşması üçün rəqabətli mühit olmalıdır. Rəqabət olacaqsa, həm xidmətin keyfiyyəti, həm də təklif olunan məhsulların qiyməti aşağı olacaq. Azərbaycanda, çox güman ki, rəqabətlə bağlı problemlər var deyə, qiymətlərin formalaşmasında müxtəlif rəqəmlər görürük. Əsasən də şəhərin mərkəzində, dənizkənarı istirahət mərkəzlərində olan qlamur obrazlı restoranlarda. Sözügedən yerlərdə qiymətlərin yüksək olmasının səbəbi onların həm prestijlərini yüksək saxlaması, həm də icarə haqlarının baha olmasıdır. Dediyim kimi, burada qanunvericilik və heç bir nəzarət mexanizmi ola bilməz. Bunu ancaq müştəri müəyyənləşdirir. Heç kim heç bir müştərini bahalı restoranlara getməyə məcbur etmir. Bu tip xidmət göstərən yerlərin sayının çox olması keyfiyyətin yaxşılaşmasına və qiymətlərin aşağı düşməsinə səbəb ola bilər".
Günel CƏLİLOVA
