"Aralıq qiymətləndirmə balı 4 və 5 olan tələbə üçün götürdüyü kreditə görə faiz hesablanmayacaq. Əgər tələbənin bütün təhsil dövründə qiyməti 5 olarsa, o zaman götürdüyü kreditin 50 faizi bağışlanacaq".
Bunu Təhsil Tələbə Krediti Fondunun şöbə müdiri Tehranağa Abdullayev bildirib.
Kreditdən faydalanan tələbələr iki illik güzəşt dövrü bitdikdən sonra məbləği 10 il ərzində bərabər hissələrlə qaytara bilir. Növbəti illərdə kreditin əhatə dairəsinin genişləndirilməsi nəzərdə tutulur.
Bu məsələ bəzi sualların yaranmasına səbəb olub. Belə ki, ədalət prinsipinin gözlənilməsinə hansı şəkildə nail olunacağı sual doğurur. Hansısa tələbə qohumunun, kiminsə hesabına universitetdə balının yüksək olmasına çalışacaq. Başqa birinin isə imtiyazlı qohumu, dost-tanışı olmadığı üçün ona qiymət yazılmayacaq. Oxumaq belə həmin tələbənin köməyinə çatmayacaq. Bu isə o deməkdir ki, himayə altında olan tələbələrin həmin güzəştdən istifadə etmə şansı daha böyük olacaq.
"Universitet müəllimləri kiməsə, nəyəsə görə orta və ya zəif oxuyan tələbəyə yüksək qiymət yazmamalıdır, bu halı minimuma endirmək və ya azaltmaq qalır həmin müəllimin vicdanına..."
Azərbaycan Gənc Alim, Doktorant və Magistrlər Cəmiyyətinin (AGADMC) sədri, fəlsəfə doktoru İlqar Orucov "Bakı-Xəbər" ə açıqlamasında qeyd etdi ki, Təhsil Tələbə Krediti Fondu tərəfindən veriləcək kredit gənclərin təhsilə əlçatanlığını təmin edəcək: "Fond fəaliyyətini uğurla davam etdirir və bu sahədə çalışanlar öz işini ədalətli şəkildə həyata keçirir. Məlumdur ki, yeni qaydaya əsasən təhsil göstəriciləri "əla" olan tələbələrin götürdüyü təhsil kreditinin 50 faizi bağışlanacaq. Ancaq burda müvəffəqiyyət göstəriciləri ilə bağlı ədalətin hansı şəkildə aparılacağı sual altındadır. Məlumat üçün deyim ki, Təhsil Tələbə Krediti Fondu kredit verdiyi tələbələrin təhsil müvəffəqiyyətlərini izləyir. Nəzərə almaq lazımdır ki, burda Fondun da marağı var kredit alan tələbələrin göstəriciləri yüksək olsun. Tələbənin daha yaxşı oxumasında Fond da maraqlıdır.
Himayə altında olan tələbələrin həmin güzəştən istifadə etməsi əslində vicdan məsələsidir. Universitet rəhbərləri bu məsələdə vicdanlı, ədalətli olmalıdır. Universitet müəllimləri kiməsə, nəyəsə görə orta və ya zəif oxuyan tələbəyə yüksək qiymət yazmamalıdır. Bu halı minimuma endirmək və ya azalmaq qalır həmin müəllimin vicdanına. Müəllimlə yanaşı, universitet direktorları da bu məsələdə ədalətli olmalıdır.
Ümid edirəm ki, fond ədalət prinsipinin qorunmasına şərait yaradacaq".
Ekspert onu da əlavə etdi ki, Təhsil Tələbə Krediti Fondu təhsil almaq istəyən, bunun üçün maddi imkanları zəif olan gənclərin təhsilinə dəstək missiyasını həyata keçirir. Bu fond maddi imkanı aşağı olan insanların təhsil arzusunun gerçəkləşdirilməsi məqsədilə yaradılıb: "Təhsil Tələbə Krediti Fondu sosial baxımdan həssas ailələrin övladlarının təhsilinə dəstək olacaq. Güzəştli şərtlərlə təhsil kreditlərinin verilməsi onların ali təhsil alaraq savadlı insan kimi yetişməsinə, gələcəkdə özünün və ailəsinin maddi durumunun yaxşılaşdırılmasına imkan yaradacaq.
Günel CƏLİLOVA
