Su əbədi həyat mənbəyidir. Amma təəssüf ki, bunu dərk etməyənlər suyu ekoloji cəhətdən korlayırlar. Bu gün mağazalarda, pərakəndə və topdansatış yerlərində müxtəlif şirkətlər tərəfindən istehsal edilən qablaşdırılmış su satılır. Bundan başqa, xidmət şirkətləri də evlərə, ofislərə su çatdırırlar. Əksər hallarda içməli suyun keyfiyyəti ilə bağlı şübhələr meydana çıxır. Əksər vətəndaşlar iddia edirlər ki, bizə keyfiyyətli içməli su kimi təqdim edilən qablaşdırılmış su əslində kran suyudur. Bu sahədə iddialar çoxdur.
Bu günlərdə redaksiyamıza Bakı şəhəri, Binəqədi rayonu, Çiçək qəsəbəsi sakini Aslanov Fətulla Yanvar oğlu məktub göndərib. Vətəndaş məktubunda "Şahdağ" sularını qablaşdırıb satışa çıxaran şirkətdən narazılıq edir. F.Aslanov qeyd edib ki, "Şahdağ" suyu alıb, amma onun Qusarda deyil, Bakıda, Binəqədi rayonunda istehsal olunduğunu görüb.
"Saxta su istehsal edən şəxslərə imkan verilməli deyil ki, camaatı zəhərləsinlər"
"Bu günlərdə plastmas qabda üzərinə "Şahdağ" yazılan su gördüm və istehsal ünvanına baxmadan bir manat qırx qəpik verib beş litrlik qabda su aldım. Suyu evə gətirəndən sonra bir stəkan süzüb içdim. Dadı heç xoşuma gəlmədiyinə görə istehsal ünvanına baxdım. Suyun Binəqədi rayonu ərazisinə, Şamaxı şossesi 5 ünvanında istehsal olunduğunu gördüm. Təəccüblə öz-özümə sual etdim ki, bəyəm Şahdağ sürüşdürülərək Binəqədi rayonunun ərazisinə gətirilib? Nəticədə Şahdağ bulaqlarının suyu qablaşdırlaraq vətəndaşlara satılır". F.Aslanov qeyd etdi ki, "Şahdağ" suyunu qablaşdıranlar istehlakçıları aldadırlar, onlara Şahdağ bulaqlarının suyunu yox, adicə kran suyu verirlər. Məktubun izi ilə Fətulla Aslanovla əlaqə saxladıq. F.Aslanov bizimlə söhbətində bildirdi ki, bu problemin ictimailəşdirilməsini çox istəyir. O, təəssüflə bildirdi ki, bəzilərinin gözünü pul hərisliyi tutduğundan insanların sağlamlığı ilə oynayanlara göz yumurlar. F.Aslanov əlavə etdi ki, Qida Təhlükəsizliyi Agentliyi, eləcə də ekologiya qurumları, mütəxəsislər bu məsələyə diqqət yetirməli, problemi araşdırmalıdırlar. "Məni narahat edən odur ki, "Şahdağ" suyu adı ilə camaatı aldadırlar. Bizi niyə zəhərləyirlər? Qida Təhlükəsizliyi Agentliyinin bu məsələyə diqqət yetirməsini, həmin ünvanda araşdırma aparmasını istəyirəm. Kimlərsə su istehsal edirsə və qabın içində Şahdağ bulaqlarının suyu yoxdursa onun adını niyə yalandan "Şahdağ" qoyur? Üzərinə heç olmasa "Şahdağ" yox, başqa ad yazsınlar. Mən 1972-ci ildə Qusar rayonunun Böyük Moruq kəndində qonaq olanda Şahdağın əzəmətinə heyranlıqla tamaşa etmişəm. İşbazlar heç olmasa Şahdağın əzəmətinə ləkə gətirməsinlər. Məni bu çox narahat edir. Bundan başqa da, söhbət vətəndaşların sağlamlığından gedir. Saxta su istehsal edən şəxslərə imkan verilməli deyil ki, camaatı zəhərləsinlər. Bu sahədə ciddi nəzarətə ehtiyac var.
Sizin qəzetiniz vasitəsilə əlaqədar qurumlara, Qida Təhlükəsizliyi Agentliyinə və başqa qurumlara müraciət edirəm ki, saxta su istehsal edən müəssisələrlə bağlı ölçü götürsünlər. Bu ölkənin yiyəsi var və hər şey, xüsusən də qida məsələsinə nəzarət diqqətdə saxlanılmalıdır. Vətəndaşları aldatmaq olmaz, amma bunlar vətəndaşı aldadırlar" - deyə bildirən F.Aslanov ümid edir ki, bu məsələ qəzetimiz vasitəsi ilə ictimailəşdirildikdən sonra sözügedən istehsal müəssisəsinə nəzarət artacaq. O qeyd edir ki, nəzarət güclənərsə, vətəndaşı aldadanlar da dərsini alar.
Müsahibimizi narahat edən məsələ ilə bağlı Qida Təhlükəsizliyi Agentliyinə də sorğu göndərdik. Tezliklə sorğumuza cavab veriləcəyinə və vətəndaşın qaldırdığı problemin aradan qaldırılacağına ümid edirik.
Leyla QARAXANLI
