Nazirlər Kabinetinin qərarına əsasən, 2023-2024-cü tədris ilində ölkənin hər bir ümumi təhsil müəssisəsi üzrə vahid məktəbli geyimi tətbiq ediləcək. Həmin qərarda məktəblər tərəfindən 4 cür geyim formasından birinin seçilməsi nəzərdə tutulur.
Elm və Təhsil Nazirliyinin açıqlamasında qeyd edilib ki, ötən tədris ilində hər bir ümumi təhsil müəssisəsinin Pedaqoji Şurası bununla bağlı müvafiq qərar qəbul edib.
Məlumat üçün bildirək ki, formalar 3 ayrı rəngdədir. Hər bir məktəb bu üç rəngdən birini seçməli, məktəblilər həmin təhsil müəssisənin seçdiyi vahid formadan istifadə etməlidir.
Qeyd edək ki, yeni məktəbli formaları artıq satışa çıxarılıb. Artıq məktəbli formalarının hansı ərazidə satılması ilə də bağlı məlumat yayılıb. Valideynlər iddia edir ki, övladları üçün məktəbli formasını almaq üçün onlar “Panda Kids” mağazalar şəbəkəsindən almağa məcbur edilir. Qeyd edilir ki, məktəbli formalarını “Sədərək” Ticarət Mərkəzindən daha uyğun qiymətə almaq mümkündür. Üstəlik, orada formalar Bakı Tikiş Evinin (BTE) təklif etdiyindən qat-qat keyfiyyətlidir:“BTE tənzif kimi köynəyi 15 manata verir, “Sədərək”də isə həmin köynək 8-10 manatadır. BTE-nin 25 manata təklif etdiyi ətək və şalvarı isə “Sədərək”də ölçüsünə görə 10-15 manata almaq olar. BTE məktəbli jaketini 30 manata satır. “Sədərək”də isə jaketlər ölçüsündən asılı olaraq 12-18 manatadır. Bu il isə məktəb direktorlarına tapşırıq verilib ki, valideynlər formaları “Panda Kids”dən alsınlar. Bizləri o mağazaya yönəldirlər. Bilmirəm, nə səbəbə?".
"Keyfiyyətli parçalardan, çox təəssüf ki, istifadə olunmur, 1-2 dəfə yuyulmadan, istifadədən sonra sıradan çıxırlar, apardığımız monitorinqlər bunu göstərir"
Təhsil eksperti Kamran Əsədov “Bakı-Xəbər"ə açıqlamasında bildirdi ki, 2011-ci ildə qəbul edilmiş orta ümumtəhsil məktəblərinin, 2009-cu ildə qəbul edilmiş “Təhsil haqqında” Qanunun tələblərindən biri mütləq şəkildə orta ümumtəhsil məktəblərində məktəbli formalarından istifadədir: “2021-ci ilədək bizim 2011-ci ildə qəbul edilmiş məktəbli formaları idi, bunlar keyfiyyət baxımından yaxşı deyildi. 2021-ci ildən yeni məktəbli formaları qəbul edildi. 2022-ci ildə könüllü idi, həm köhnə, həm də yeni formalardan istifadə edə bilərdilər. Amma məktəbin başlanmasına hardasa 40 gündən artıq vaxt qalıb. Ehtiyac olan məktəbli formaları təmin oluna bilməyəcək. Söhbət Bakıdan getmir, paytaxtda 320 məktəb, 460 min şagird var. Bölgələrdə bu, problemdir. Yaxşı olar ki, ilkin mərhələdə yalnız ibtidai siniflər 100 faiz təmin olunsun”.
Ekspert onu da əlavə etdi ki, yuxarı siniflərlə bağlı problem yaşanılır: “Amma daha çox biz aşağı sinifləri təmin edəndən sonra yuxarı sinifləri təmin etməliyik. Məktəbli formalarının zəruri tətbiqi ibtidai siniflərə edilməlidir. Çünki belə ala-bula olacaq. Keyfiyyətli parçalardan çox təəssüf ki, istifadə olunmur, 1-2 dəfə yuyulmadan, istifadədən sonra sıradan çıxırlar. Apardığımız monitorinqlər bunu göstərir. Məktəbli formaları zəruridir, çünki məktəbdə sosial bərabərliyin təmin olunması, şagirdlərin dərs prosesində diqqətinin yayınmaması üçün forma mütləqdir. Digər qeyri-formalardan istifadə olunduqda, diqqət yayınmaları baş verirdi. Məktəbli formaları məsələsi mütləq şəkildə may-iyun aylarında həll olunmalı idi. Məlumat üçün bildirim ki, Bakıda məktəbli formalarının satış məntəqələri açıqlanıb. Həmin siyahıda “Panda Kids” mağazalar şəbəkəsinin adı yoxdu".
Günel CƏLİLOVA
