Son zamanlar Azərbaycanda siqaret çəkən gənc qadınların sayında artım müşahidə olunur. Kafe-restoranların siqaret çəkilən bölməsində qadınların daha çox oturması buna misal ola bilər.
Açıqlanan statistik rəqəmlərə əsasən, Azərbaycanda siqaret çəkən qızların sayı kəskin artır. Son statistikaya görə, Azərbaycanda hər 66 qadından biri siqaret çəkir.
Stress səbəbindən siqaret asılısı olan qadınlar bu pis vərdişi buraxma mövzusunda da çətinlik çəkirlər. Xarici ölkələrdən fərqli olaraq, xanımın siqaret çəkməsi Azərbaycan cəmiyyətində pis qarşılanır. Sağlamlıqla bərabər bu artıq əxlaq probleminə çevrilib. Cəmiyyətin bəzi üzvləri siqaret çəkən xanımların bu hərəkətini pis qiymətləndirir.
"Tənha və həyatında problem olan qadınlar öz psixoloji durumlarını qaydaya salmaq üçün siqaretdən istifadə etməyə çalışırlar"
Siqaret çəkən qadınların sayının artması barədə fikir bildirən psixoloq Könül İsmayılova "Bakı-Xəbər"ə açıqlamasında qeyd etdi ki, son zamanlar siqaret çəkən qadınların çoxalmasından narahatdır: “Siqaret çəkmək hər zaman olub. Əvvəl gizli çəkirdilərsə, indi aşkarda çəkirlər. Hər hansı bir müəssisəyə gedirsən, görürsən ki, xanımlar oturub siqaret çəkirlər. Siqaret çəkməyə dəb və müasirlik kimi baxırlar. Mənə elə gəlir ki, tək qadınlar deyil, kişilər də siqaret çəkməli deyillər. Bu bizim səhhətimizə ziyandır. Siqaret çəkən qadınların çoxu sabahın anasıdır. Bunun dünyaya gələcək uşağa da mənfi təsiri olur”.
Ekspert hesab edir ki, xanımın siqaret çəkməsi əslində özünü kişi ilə şüuraltı bərabər tutması ilə bağlıdır: "Amma gender bərabərliyi pis vərdişlərdən istifadə edilməklə formalaşdırılmır. Xanımların siqaret çəkməsi bir etiraz formasıdır. Tənha və həyatlarında problem olan qadınlar öz psixoloji durumlarını qaydaya salmaq üçün siqaretdən istifadə etməyə çalışırlar. Bu gün Azərbaycanda siqaret çəkən xanımlar çoxdur. Əvvəllər bunu gizlində edirdilərsə, indi artıq heç kimdən çəkinmirlər. Siqaret və qəlyanın zərərləri hamilə xanımlarda özünü daha çox göstərir. Eyni zamanda, psixoloji gərginlik, rahatsızlıq da yaradır. Xanımlar qoxuya qarşı hər zaman həssas olurlar. Xüsusilə tütün, siqaret qoxusunu çox pis qarşılayırlar. Qadınlar daha çox yüngül, qoxusu olmayan siqaretlərdən istifadə edirlər. Asılılıq olduqda isə bu narahatlıq, gərginlik daha çox olur. Həyatlarındakı konfliktlər, psixoloji gərginliklər bəzən xanımları yanlış olaraq siqaret çəkməyə vadar edir. Digər tərəfdən, xanımın çevrəsi onun siqaret çəkməsinə böyük təsir göstərir. Xanımlar diqqətli olmalı və yeniyetməlik dövründə bu cür zərərli vərdişlərdən uzaq durmağa çalışmalıdırlar. Valideynlər övladlarında bu cür zərərli vərdişlərə maraq hiss edirlərsə, yaxşı olar ki, zamanında tədbir görərək, onları bundan uzaqlaşdırsınlar”.
Psixoloqun sözlərinə görə, qadınlar hazırda siqaret və qəlyanı müstəqillikləri kimi qiymətləndirsələr də, müəyyən müddətdən sonra bundan imtina etmənin yollarını axtaracaqlar: “Qadınların siqaret çəkməsi Azərbaycanda artıq adiləşib və bu proses gedir. Lakin bir müddət keçdikdən sonra xanımlar kütləvi şəkildə siqaretdən imtina etməyə başlayacaqlar. Bu gün Amerika, Avropa ölkələrində nəinki qadınlar, eləcə də kişilər siqareti tərgitməyə çalışırlar. Bu təbiidir və Azərbaycanda da belə bir proses baş verəcək. Əvvəlcə bu vərdiş xanımlar üçün komfort, azadlığın göstəricisi, bir çox kübar ailələrin əyləncəsi kimi dəyərləndirilir. Bir müddətdən sonra özləri bu işdən geri çəkilmək məcburiyyətində qalırlar. Zərərli vərdişlər kişi və qadın orqanizminə fərqli təsir göstərir. Kişi orqanizmi bunlara daha çox dayanıqlıdır, nəinki qadınlar. Kişinin 20 il içdiyi alkoqolu qadın qəbul etsə, bəlkə bir il də yaşamaz. Kişi 20 il qəbul etsə də, fiziki baxımdan ona o qədər də təsir etmir. Eləcə də siqaret. Yaxşı olar ki, xanımlar bu məqama diqqət etsinlər. Xanımlar bu gün ictimai yerlərdə rahatlıqla siqaret də çəkirlər, qəlyandan da istifadə edirlər. Elə təsəvvür yaratmağa çalışırlar ki, sanki bu elə belə də olmalıdır. İkinci mərhələdə isə artıq bundan imtina üçün çalışacaqlar. Bu gün Avropa, Amerika xanımı artıq karyera qurmaqdan bezib, “qadın olmaq istəyirəm” deyir".
Günel CƏLİLOVA
