Bu gün Azərbaycanda bəzi idarə və təşkilatlarda işçilərin gün ərzində 8 saatdan artıq işləməsi halları mövcuddur. Onların artıq iş saatlarına görə əməkhaqlarının hesablanması da çox vaxt adi qaydada aparılır.
Bu da işəgötürənlə işçi arasında əmək mübahisələrinin yaranmasına gətirib çıxarır. Məlum mövzu ilə bağlı bu günlərdə tanınmış tərcüməçi və yazıçı Nadir Qocabəyli facebook vasitəsilə millət vəkillərinə müraciət edib. Müraciətdə deyilir: "Azərbaycan Konstitusiyası, Əmək Qanunvericiliyi kütləvi şəkildə və kobud surətdə pozulur. Qoşulduğumuz beynəlxalq konvensiyalara əsasən də həftədə 40 saatdan çox olmamalı olan iş vaxtı əksər idarə və müəssisələrdə 54 saatdan yuxarıdır. Bir çoxlarında hətta 60-70 saata çatır. Yəni işçilər həftədə 6 gün olmaqla hər gün minimum 9 saat işləməyə məcbur edilir. Bəzi müəssisələrdə isə personalı hətta 10, 12, 14 saat işləməyə məcbur edirlər. Xahiş edirəm, bu məsələni Milli Məclisdə qaldırasınız. Biz sivil ölkədə yaşayırıq, odur ki, konstitusiyaya, qanunlara əməl olunmalıdır. İstismar halları olmamalıdır. Başa düşmək lazımdır ki, vətəndaşların qanunsuz olaraq vaxtından artıq işlədirlməsi kimlərəsə pul qazandırırsa, əksəriyyətin sağlamlığı, ailəsi, mənəviyyatı bundan ziyan görür. İnsanlar fiziki və mənəvi təzyiq altında sağlamlıqlarını itirir, ailələrinə və uşaqlarına vaxt ayıra bilmədiklərindən gənc nəslin tərbiyəsi pozulur. Bu problem hətta ailədaxili münaqişələrə, aillələrin dağılmasına da ciddi təsir edir".
Müraciətdə adı hallanan millət vəkillərindən biri də Vüqar Bayramovdur.
"8 saatlıq iş rejimi Əmək qanunvericiliyində də öz əksini tapıb, biz bu məsələ ilə bağlı dəfələrlə Milli Məclisdə müzakirə qaldırmışıq"
Mövzu ilə bağlı millət vəkili Vüqar Bayramov "Bakı-Xəbər"ə açıqlamasında qeyd etdi ki, 8 saatlıq iş rejimi Əmək qanunvericiliyində də öz əksini tapıb: "Biz bu məsələ ilə bağlı dəfələrlə Milli Məclisdə müzakirə qaldırmışıq. Bu sahədə monitorinqlərin aparılmasının vacibliyini qeyd etmişik. Əmək qanunvericiliyinin tələblərinin pozulması baxımından bu məsələni daim diqqətdə saxlayırıq. Məlumat üçün bildirim ki, gündəlik normal iş vaxtının müddəti səkkiz saatdan artıq ola bilməz. Gündəlik normal iş vaxtına uyğun olan həftəlik normal iş vaxtının müddəti 40 saatdan artıq müəyyən edilə bilməz. Bir qayda olaraq, iki istirahət günü olan beşgünlük iş həftəsi müəyyən edilir. Altıgünlük iş həftəsində həftəlik norma 40 saat olduqda gündəlik iş vaxtının müddəti 7 saatdan, həftəlik norma 36 saat olduqda gündəlik iş vaxtının müddəti 6 saatdan və həftəlik norma 24 saat olduqda gündəlik iş vaxtının müddəti 4 saatdan çox ola bilməz".
Millət vəkili xüsusi olaraq vurğuladı ki, özəl sektorda çalışan işçilərin normadan artıq işləməsinin daha çox şahidi oluruq: "Hesab edirəm ki, bu sahədə yenilik tətbiq edilməlidir".
Günel CƏLİLOVA
