Məlum olduğu kimi, məktəbli formaları ilə bağlı artıq Elm və Təhsil Nazirliyi tərəfindən valideynlərə müraciət edilib. Belə ki, Nazirlər Kabinetinin qərarına əsasən, 2023-2024-cü tədris ilində ölkənin hər bir ümumi təhsil müəssisəsi üzrə vahid məktəbli geyimi tətbiq ediləcək.
Həmin qərarda məktəblər tərəfindən 4 cür geyim formasından birinin seçilməsi nəzərdə tutulur. Məktəbin Pedaqoji Şurası məktəbli formalarını seçir və şagirdlər o geyimdən istifadə edirlər. Bəzən bu seçimə görə müəyyən ziddiyətlər yaranır. Valideyn və ya şagird məktəbin seçdiyi formanı bəyənmir.
Məlumat üçün bildirək ki, Bakı Tikiş Evinin açıqladığı rəqəmlərə görə, oğlanlar və qızlar üçün köynəklər 15, ətək və şalvarlar 25, jaketlər isə 30 manata olacaq.
Ancaq bu il də yeni və 4 formada olan məktəbli geyimlərinin tətbiqi heç də hər kəs tərəfindən müsbət qarşılanmır. Formaların həm keyfiyyətindən, həm qiymətindən, həm əlçatan olmamasından, ən əsası isə hər il yeni formanın tətbiq edilməsindən narazılıq edənlər var.
Maraqlıdır, şagird məktəbin seçdiyi deyil, öz seçdiyi formanı geyinə bilərmi?
Vüsal Kərimli: "Məktəb bu il seçdiyi vahid formanı gələn il dəyişəcəksə, bu, insanlara ciddi maddi ziyan vuracaq və narazı olmaqda haqlıdırlar"
Təhsil eksperti Vüsal Kərimlinin sözlərinə görə, hər il yeni məktəbli formalarının satışa çıxarılması vətəndaşlar üçün əlavə xərc deməkdir: "Vahid məktəbli forması tətbiq olunsa, bu, valideynləri narazı salmazdı. Hər il vahid geyim forması kimi yeni formaların çıxması ilə bağlı vətəndaşların narazılığı haqlıdır. Vahid forma olsa, insanlar da bilərlər ki, hansı formaları almaq lazımdır. Əvvəllər formalar vahid idi, indiki qərarda hər məktəb özü qərar verəcək ki, hansı vahid formanı seçir. Əgər məktəb bu il seçdiyi vahid formanı gələn il dəyişəcəksə, bu, insanlara ciddi maddi ziyan vuracaq və narazı olmaqda haqlıdırlar. Danılmaz ki, məhsulların keyfiyyətləri aşağıdır, qiymətləri isə baha. Ancaq dövlət qurumları qiymət siyasətinə qarışsa, satışı həyata keçirən özəl müəssisələrə necə müdaxilə edəcək?".
Kamran Əsədov: "Məktəblərin başlamasına 40 gündən az vaxt qalıb və artıq forma problemi ortaya çıxıb"
Təhsil eksperti Kamran Əsədov "Bakı-Xəbər"ə açıqlamasında qeyd etdi ki, hazırda ümumtəhsil məktəblərində 1,6 milyon şagird təhsil alır. 2011-ci ildən 2021-ci ilə qədər eyni formadan istifadə olunurdu: "2021-ci ildə isə nazirlik yeni formaların eskizini hazırladı və Nazirlər Kabineti tərəfindən təsdiq edildi. Hər bir məktəbin Pedaqoji Şurası Nazirlər Kabineti tərəfindən təsdiq edilmiş dörd eskizdən birini seçir. Həmin məktəbin Pedaqoji Şurasında da valideynləri bir, şagirdləri bir nümayəndə təmsil edir. Yəni bu qərarlar özbaşına qəbul edilmir. Düzdür, hazırda bizdə təhsildə qərarlar özbaşına qəbul edilir. Amma məktəbin şagirdlərinin istifadə edəcəyi forma hər il tədris ili başa çatanda, üç ildə dəyişməmək şərti ilə Pedaqoji Şura tərəfindən qəbul edilir. Burada fərdi, istənilən qərarlar qəbul edilə bilməz. Amma biz təcrübədə görürük ki, şagird sayı az olan məktəblərdə bir çox hallarda rayonun qəbul etdiyi və yaxud da regional idarənin qəbul etdiyi formanı geyinirlər. Məktəblərin başlamasına 40 gündən az vaxt qalıb və artıq forma problemi ortaya çıxıb. Nazirlik bu il də öz vəzifə öhdəliyini yerinə yetirə bilmədi. Bu o deməkdir ki, bütün məktəblərdə şagirdlər forma ilə təmin olunmayacaq. Amma məktəb şagirdlərinin heç biri fərqli formadan istifadə edə bilməz. Məktəbin Pedaqoji Şurasının qəbul etdiyi məktəbli forması bütün şagirdlər üçün məcburidir, o dəyişdirilə bilməz. Qəbul edilmiş forma minimum üç il ərzində geyinilməlidir".
Günel CƏLİLOVA
