Həkimlik ülvi sənətdir, şəfqətli, mərhəmətli insanların könül verdiyi bir sahədir. Azərbaycan həkimləri arasında öz sənətinin ülvliyini, ucalığını dərk edənlər az deyil. Elə həkimlərimiz var ki, xəstə könlünə məlhəm olan bir sözlə belə sağalmaz xəstəyə ümid verir, onu dirçəldir, yaşamağa inandırır. Belə həkimlər hər zaman minnətdarlıqla yad edilir, xatiri uca tutulur.
Bakı şəhəri, Səbail rayonu, Bibiheybət qəsəbəsi, Yeni Salyan yolu 20 (22) ünvanında yaşayan, Jurnalistlər binasının sakini olan Mirzəbala Səfər oğlu Səfərov redaksiyamızla əlaqə saxlayaraq, qəzetimiz vasitəsilə 33 saylı Şəhər Poliklinikasının terapevti Məlahət Quliyevaya təşəkkürünü işıqlandırmağımızı istədi. 8 ildir astma xəstəliyindən əziyyət çəkdiyini və illərdir müalicə oldunduğunu deyən M.Səfərov qeyd etdi ki, bir müddət əvvəl sətəlcəm xəstəliyinə də tutulub və onun dərdinə M.Quliyevanın apardığı uğurlu müalicə ilə çarə tapılıb. Sətəlcəmdən tam sağaldığını deyən M.Səfərov ona göstərdiyi qayğı və diqqətə görə 33 saylı Şəhər Poliklinikasının terapevti Məlahət Quliyevaya təşəkkürünü bildirdi və belə qayğıkeş, savadlı həkimlərimizin olmasından qürur duyduğunu dedi.
Elə biz də sevindik: həm xəstə məmnuniyyətindən, həm də Məlahət xanım kimi həkimlərin varlığından...
İradə Sarıyeva
