Dünyada turizm hər bir ölkə üçün ən dinamik inkişaf edən sahələrdən biri sayılır. Azərbaycanda da turizm sahəsi yeni mərhələyə qədəm qoyub. Son dövrlər ölkəmizdə keçirilən beynəlxalq səviyyəli oyunlar turist axınında əhəmiyyətli rol oynayır.
Avropa, Asiya və Afrika ölkələrindən minlərlə turist gəlir. Turist axınının bu qədər genişlənməsi ölkəmiz üçün iqtisadi baxımdan çox vacibdir. Bu həm də qeyri-neft sektorunun inkişafına birbaşa təsir göstərir.
Azərbaycana gələn turistlərin sayı ilə bağlı statistika açıqlanıb. Lakin bəlli olub ki, turistlərin böyük əksəriyyəti Bakıda qalmağa üstünlük verir. Bu ilin birinci yarısında turistlərin 84,2 faizi Bakıda, 4,0 faizi Qusarda, 3,6 faizi Naftalanda, 3,4 faizi Qəbələdə, 2,0 faizi Qubada, 0,4 faizi Gəncədə, 2,4 faizi isə digər şəhər və rayonlarda qeydə alınıb.
Bəs, Azərbaycana gələn turistlər niyə bölgələrə üz tutmur?
"Əksər rayonlarda turizm xidmətlərinin qiyməti yüksək olaraq qalmaqdadır, keyfiyyət isə hələ də standartlardan geri qalır, bu səbəbdən də..."
Turizm sahəsi üzrə ekspert Elçin Rüstəmov “Bakı-Xəbər”ə açıqlamasında qeyd etdi ki, Azərbaycana gələn turistlərin hələ də böyük qismi Bakı şəhərinə üstünlük verir. Turizm imkanları baxımından regionlar hələlik paytaxtla rəqabət apara bilmir: “Hesab edirəm ki, turistlərin rayonlara marağının artırılması üçün sistemli tədbirlərin genişlənməsinə, stimullaşdırıcı kampaniyaların təşkilinə ehtiyac var. Gələn turistlər üçün maraqlı ekskursiya marşrutları hazırlamaq, onların diqqətini çəkmək lazımdır. Bunu biz etməliyik ki, turistdə maraq yaransın və növbəti dəfə bir də ora getsin. Yəni bu məsələdə biz də maraqlı olmalıyıq. Turistləri bir az da biz yönləndirməliyik. Belə olan təqdirdə, bütün bölgələrə turist səfərləri baş tutacaq".
Həmsöhbətimiz onu da əlavə etdi ki, turistlərin Bakıya maraq göstərməsinin səbəblərindən biri də paytaxt ərazisində keçirilən beynəlxalq yarışlardır: "Bakıda keçirilən üçüncü "Formula 1" yarışını izləməyə gələn əcnəbilərin sayında 2017-ci illə müqayisədə 31 faiz artım olub. Bu tendensiya hər il artmaqda davam edir. Statistika göstərir ki, turistlərin iqtisadiyyatın müxtəlif sahələrinə, o cümlədən peşəkar xidmətlər, hotel və mehmanxana, hava yolları, iaşə obyektləri, restoran, nəqliyyat, sosial və mədəni xidmətlər, poçt və telekommunikasiya, topdan ticarət və elektrik, qaz, su və digər sektorlara verdikləri faydalar həddən artıqdır. Bu tədbir ölkəmizin dünyaya sürətli inteqrasiyasını təmin etməklə yanaşı, sosial-iqtisadi yüksəlişimizə də təkan verir. Bu kimi yarışların keçirilməsi ilə ölkəyə valyuta axını olur, Azərbaycanı hər kəs daha yaxından tanıyır. Bu yarışı televiziya və ya sosial şəbəkələr vasitəsilə izləyən hansısa xarici vətəndaş gələcəkdə Azərbaycana səfər edə bilər. "Formula 1" yarışları ərəfəsində Azərbaycana əsəsən yüksək kateqoriyadan olan turistlər gəlir. Bunu həm bron edilən hotel nömrələrindən, həm də tur proqramlardan bilmək olur. Bu dönəmdə ölkəyə gələn turistlər digər dövrlərdə gələnlərdən çox fərqlənir. Bu da yarışın ən yüksək səviyyədə keçirilməsi və daha üst səviyyəli bir yarış olmasından xəbər verir”.
Turizm ekspertinin sözlərinə görə, əksər rayonlarda turizm xidmətlərinin qiyməti yüksək olaraq qalmaqdadır. Keyfiyyət isə hələ də standartlardan geri qalır. Bu səbəbdən də turistlər Bakıya maraq göstərir. Həmçinin, regional turizm əsasən yayda olur.
Günel CƏLİLOVA
