Müasir dünyanın ən gəlirli, geniş və sürətlə inkişaf edən sahələrindən birinin turizm olması heç kimə sirr deyil. Hazırda bütün dünyada, o cümlədən Azərbaycanda turizm sektoru davamlı olaraq inkişaf edir, genişlənir və qazanc gətirən sahə kimi özünü doğruldur.
Elə ona görə də bu gün turizm iqtisadiyyatın aparıcı sahələri sırasına daxil edilib və onun yeni qolunun - tibbi turizmin də formalaşması üçün zəmin yaranıb.
Azərbaycanın turizm sahəsində rəqabət imkanları çox yüksəkdir. Təbii imkanlar, zəngin tarixi-mədəni irsin olması ilə yanaşı, dövlət başçısının ölkənin sosial-iqtisadi yüksəlişinə və turizmin inkişafına ayırdığı diqqət bu sahənin sürətlə genişlənməsinə rəvac verib. Konkret olaraq Azərbaycan dövləti turizm sahəsinin inkişafını iqtisadiyyatın qeyri-neft sektoru üzrə prioritet istiqamət elan edib. Son 10 il ərzində ölkədə turizmin təşviqi ilə bağlı görülən işlər, aparılan islahatlar, qəbul edilən dövlət proqramları bunu bir daha sübut edir. Bu tədbirlər nəticəsində Azərbaycanda turizm sənayesi yeni mərhələyə qədəm qoyub, ölkəmiz dünyada yeni turizm istiqaməti kimi tanınıb.
Araşdırmalar zamanı məlum olub ki, turizm istiqamətində ən diqqət çəkən sektorlardan biri tibbi turizmdir. Tibbi turizm istirahətlə yüksək səviyyəli tibbi xidməti özündə birləşdirir. Eyni xərclə eyni məkanda həm istirahət edirsən, həm də müalicə olunursan. Bu sahənin inkişafının vacibliyi haqqında danışan Dövlət Turizm Agentliyi sədrinin müşaviri Kənan Quluzadə media nümayəndələrinə açıqlamasında qeyd edib ki, Azərbaycanın tibbi turizm məhsulları yaradaraq beynəlxalq bazarlara çıxarmaq imkanı, bu sahədə potensialı böyükdür.
Kənan Quluzadə mətbuata açıqlamasında fikirlərinin davamı olaraq vurğulayıb ki, müalicə, tibbi prosedurlar, əməliyyatlar məqsədilə gələn turistlərə plastik cərrahiyə, oftalmologiya, stomatologiya və digər sahələr üzrə turizm məhsulları təklif etmək olar. Yaxın Şərq, Hindistan, Pakistan və Mərkəzi Asiya ölkələrindən bu məqsədlə müştərilər cəlb etmək mümkündür.
Ancaq ekspertlər hesab edir ki, tibbi turizmin inkişafı üçün ölkənin səhiyyə sistemi lazımi səviyyədə deyil. Səhiyyə sahəsində yaşanan problemlər, həkimlərin mühacirət etməsi, kadr çatışmazlığı bu sektorun inkişafına təsir edəcək. Bu səbəbdən də tibbi turizmin inkişafı üçün ilk növbədə keyfiyyətli tibbi xidmətin göstərilməsinə şərait yaradılmalıdır.
Elçin Rüstəmov: "Biz əcnəbi turistlərin müalicə və istirahət üçün Azərbaycanı seçməsini istəyiriksə, xəstəxanaların, tibbi laboratoriyaların..."
"New Era” turizm şirkətinin rəhbəri, turizm sahəsi üzrə ekspert Elçin Rüstəmov "Bakı-Xəbər"ə açıqlamasında qeyd etdi ki, sağlamlıq turizminin inkişafı üçün Azərbaycanda potensial yüksəkdir. Elə kurort-sanatoriyalar, tibb müəssisələri, istirahət və müalicə məqsədilə müraciət edilən obyektlərın sayı çox, xidmət keyfiyyəti qənaətbəxşdir: "Sağlamlıq turizmi elə bir sahədir ki, o daha çox infrastrukturla bağlıdır. Məsələn, Abşeronda müalicəvi palçıq vulkanlarının olması kifayət deyil. Burada sanatoriyalar hazırlanmalıdır, ölkəyə gələn turistlər üçün xüsusi xidmətlər təklif edilməlidir ki, turizmin bu növünə maraq artsın. Yaxşı tədbirlər planı tətbiq edilsə, tibb və sağlamlıq turizmi gəlirli sahəyə çevriləcək. Biz əcnəbi turistlərin müalicə və istirahət üçün Azərbaycanı seçməsini istəyiriksə, xəstəxanaların, tibbi laboratoriyaların, səhiyyə infrastrukturunun, kadr hazırlığının yüksəldilməsinə diqqət etməliyik. Hazırda hər kəsə aydındır ki, ölkəmizdə səhiyyənin vəziyyəti tam yüksək səviyyədə deyil. Xəstəxanalara yaxın ərazilərdə istirahət mərkəzlərinin, hotellərin, bölgələrdə müalicəvi əhəmiyyətli yerlərdə sanatoriyaların olması vacibdir. Bu istiqamətdə uğur əldə etmək istəyiriksə, tur şirkətləri də məlumatlı və maraqlı olmalı, müalicə üçün Azərbaycanı seçən əcnəbilərə məhsul təqdim etməlidirlər".
Pərvanə Mustafayeva: "Bu sahənin inkişafı üçün bəzi problemlər var, belə ki, həkim çatışmazlığı yaşanır, həmçinin..."
Həkim ekspert Pərvanə Mustafayeva "Bakı-Xəbər"ə açıqlamasında bildirdi ki, sağlamlıq turizminin inkişaf etməsi ölkə iqtisadiyyatı üçün önəmlidir. Lakin bu sahənin inkişafı üçün bəzi problemlər var. Belə ki, həkim çatışmazlığı yaşanır. Həmçinin, avadanlıqlarla işləyəcək mütəxəssis lazımi səviyyədə deyil. Bu kimi problemlər tibbi turizmin inkişafına mane olur.
Ceyhun Aşurov: "Tibbi sistem tamamilə standartlaşmalıdır və tibbi personal da həm daxildə, həm də xaric üçün güvən mesajını verməlidir”
"Skal International Baku" klubunun prezidenti Ceyhun Aşurov bildirdi ki, Azərbaycanda sağlamlıq, tibbi turizmin potensialı var, hətta keçmiş zamanlarda da sağlamlıq turizmi ilə bağlı Naftalan, Duz dağı məhsulları olub: "Tibbi turizm gəlirli və vacib sahədir. Ancaq bu sahənin inkişafı üçün bəzi problemlər var. Əsas problem ayrı-ayrı həkimlərin yox, xəstəxanaların, ölkənin tibb sisteminin buna tam şəkildə cavab verməməsidir. Özəl tibb müəssisələri də ciddi şəkildə sertifikatlaşmalıdır, tibbi personalını da ona uyğun qurmalıdır. Burada hansısa həkimin ön plana çıxması yox, tibb sisteminin ön plana çıxması önəmlidir. Danılmaz faktdır ki, bu gün həkim qıtlığı yaşanır. İnsanlar hansısa xəstəliklə üzləşəndə həkim axtarır, ancaq bu elə brendləşməlidir ki, çəkinmədən istənilən xəstəxanaya yaxınlaşmalıyıq. Ümumən tibbi sistem tamamilə standartlaşmalıdır və tibbi personal da həm daxildə, həm də xaric üçün güvən mesajını verməlidir”.
Günel CƏLİLOVA
