İranda keçirilən məhərrəmlik və əzadarlıq mərasimlərindən Azərbaycan Respublikasına qarşı istifadə edilir. Mərasimlərdə Azərbaycan Respublikasının antiislam ölkə olduğu təbliğ olunur.
Qeyd edək ki, əzadarlıq mərasimlərindəki banner və plakatlarda “Azərbaycanda həbsdə olan 2000 mücahid şiənin xatirəsinə”, “Azərbaycan sionizmin işğalından azad olunsun” və başqa bu məzmunlu ifadələr əks olunub.
Onu da qeyd edək ki, Aşura günü hər il Azərbaycanda da qeyd edilir. Aşura ilə əlaqədar məscid və ziyarətgahlarda mərasimlər, qanvermə aksiyaları keçirilir, paytaxt Bakı başda olmaqla, ölkənin müxtəlif şəhər və rayonlarında insanların ehsan məqsədli təam və su paylamasına şərait yaradılır. Hətta mərhum Prezident Heydər Əliyev Aşura günündə birbaşa mərasimlərdə iştirak edirdi. Ölkə başçısı Prezident İlham Əliyev və birinci xanım Mehriban Əliyevanın da islam dininə hörmət və ehtiramı hər kəs tərəfindən bilinir. Bu, “sionizmin işğalında olduğu” iddia edilən bir ölkənin Məhərrəmlik ayına, Aşura gününə, Hz. Hüseyn və tərəfdarlarına verdiyi dəyər və ehtiramdır.
Sədrəddin Soltan: "İran hakimiyyətinin Azərbaycana qarşı şüarlar səsləndirməsi təxribatdır, Tehran rejiminin kim olduğunu və nəyə xidmət etdiyini..."
Məlum mövzu ilə bağlı fikir bildirən Orta Doğu Araşdırmalar Mərkəzinin rəhbəri, siyasi şərhçi Sədrəddin Soltan “Bakı-Xəbər”ə açıqlamasında qeyd etdi ki, Tehran rejimi 44 ildir İslamdan siyasi məqsəd üçün istifadə edir: "Ölkədə sünni təriqətindən olma şəxslərə qarşı göstərilən münasibət bu faktı təsdiq edir. İran hakimiyyəti İslam dinindən, şiəlik məzhəbindən öz siyasətini həyata keçirmək üçün istifadə edir. Din Tehran rejiminin əlində alətə çevrilib. Əvvəllər də İranda müxtəlif qruplar tərəfindən adı günlərdə belə Azərbaycan əleyhinə şüarlar səsləndirilib. Guya Azərbaycanda din azadlığı yoxdur, dinə qarşı çıxılır. Bunun hamısının yalan olduğu hər kəsə bəllidir. Nəzərə almaq lazımdır ki, Sovet dönəmində belə din qorunub saxlanılıb. Azərbaycan əhalisi İslamı İrandakı mövcud rejimdən öyrənməyib".
Ekspert hesab edir ki, İran hakimiyyətinin Azərbaycana qarşı şüarlar səsləndirməsi təxribatdır. Tehran rejiminin kim olduğunu və nəyə xidmət etdiyini beynəlxalq ictimaiyyət yaxşı bilir.
Tural İrfan: "Azərbaycanda etiqad azadlığı, dini ayinlərin keçirilməsinə yaradılan şəraitin bircə faizi İranın özündə yoxdur"
İlahiyyatçı Tural İrfan "Bakı-Xəbər"-ə açıqlamasında bildirdi ki, İran İslam dinini siyasi məqsədləri üçün istifadə etməkdə davam edir: "Xüsusilə də məzhəbçiliyi qabardır. İslam dinini şiəliklə, şiəliyi siyasətlə, siyasəti də bəzən terrorla əvəz edərək müsəlman ölkələrinə qarşı təxribat törədir.
Azərbaycan Respublikası əvvəla dini yox, dünyəvi, hüquqi dövlətdir. Buna baxmayaraq, Azərbaycanda olan din, vicdan, etiqad azadlığının bir faizi də İranda yoxdur. İranda hələ inqilab baş verməmişdən Azərbaycan xalqı Sovet repressiyalarına rəğmən dini ayinləri icra edir, ibadət edirdi.
İran öz adını bizə qoya bilməz. Antiislam dövləti, antiislam rejimi kimi artıq dünyada məşhurdur. Əqidəsinə, dini inancına, milli mənsubiyyətinə görə İranda ildə minlərlə ganahsız insan qətlə yetirilir, edam edilir.
İranın dini çirkli siyasi oyunlara və müsəlman ölkələrinin əleyhinə istifadə etməsi çərçivəsində onların ölkəmizdə qurduğu şəbəkə iflas etdikdən sonra narahat olublar. Bizi gah İsraillə dostluqda, gah da başqa məsələlərdə ittiham edirlər.
Azərbaycanda İrandakı kimi məzhəb ayrıseçkiliyi, başqa dinin mənsublarına qarşı qadağalar yoxdur. İranın erməni qardaşlarının donuz salıb dağıtdığı məscidlərimiz durmadan bərpa olunur, yeniləri tikilir. İran özünün təqdim etdiyi siyasi məzhəb modelinin Azərbaycanda iflas olmasına görə Azərbaycanı şantaj edir, necə deyərlər, şərləmək istəyir.
Azərbaycanda xurafatçılıq artıq elmlə, mövhumat və radikal fikirlər sivil ənənəvi İslamla, məzhəbçilik vəhdət və qardaşlıqla əvəz olunur. İndiyədək İran milyardlar sərf etmişdi ki, Azərbaycanda da Livan, Suriya, İraq və Yəməndə törətdiyi məzhəb qarşıdurmasını yaratsın, fitnə salsın. Bunun hamısı Azərbaycanın qüdrəti və qüdrətli dövlət başçısı sayəsində iflasa uğradı, ifşa edildi. Bu gün Azərbaycanda etiqad azadlığı, dini ayinlərin keçirilməsinə yaradılan şəraitin bircə faizi İranın özündə yoxdur. Başqa İslam məzhəblərinə mənsub müsəlmanlar İran rejiminin siyasətini tənqid etdiyinə görə edam edilir, işgəncə verilir. Milli fəallar illərlə məhbəsdə çürüdülür. Narkomaniya və narkotiklərin dövriyyəsi ən yüksək səviyyədədir. Bunun harası İslam dövlətidir? Əksinə, İranda müsəlmanlar rejim dini siyasətlə birləşdirdiyinə görə dindən üz döndərib ateist olurlar".
Günel CƏLİLOVA
