Xəbər verdiyimiz kimi, 2023-2024-cü tədris ilindən məktəblilər yeni formalardan istifadə edəcəklər. Bu, Azərbaycan Respublikasının Baş naziri Əli Əsədovun 2022-ci il 17 martda “Dövlət ümumi təhsil müəssisəsi təhsilalanlarının geyim formalarının təsvirləri”nin təsdiq edilməsi haqqında qərarına əsasən həyata keçirilir.
Bu səbəbdən də Elm və Təhsil Nazirliyi buna müvafiq olaraq bütün məktəblərdə sentyabrın 15-dən vahid formanın olmasını zəruri sayıb.
Qeyd edək ki, ölkəmizdə 1,6 milyona yaxın şagird var. Bu qədər şagirdin qısa zamanda vahid forma ilə təmin edilməsi inandırıcı görünmür. Çünki ölkədə 1,6 milyon ədəd vahid məktəbli forması istehsal edəcək tikiş müəssisələri yoxdur.
“Bakı Tikiş Evi” ASC də mövcud vəziyyətlə bağlı çətinlik olacağını ehtimal edir.
Etibar Əzimov: "Bu il vəziyyət yaxşıdır, ilin əvvəlindən zəruri xammal ehtiyatı görmüşük və kifayət qədər də..."
Mövzu ilə bağlı fikir bildirən “Bakı Tikiş Evi” ASC-nin rəhbəri Etibar Əzimov "Bakı-Xəbər"ə açıqlamasında qeyd etdi ki, məlum məsələ ilə bağlı qərar gec verildi. Bu səbəbdən də lazımi səviyyədə xammalı vaxtında gətirə bilmədik: "Məlumdur ki, məktəbli forması üçün lazım olan yun və pambıq parçalar ölkəmizdə istehsal olunmur. Bu səbəbdən ötən il istehsalımız bir qədər az oldu. Amma bu il vəziyyət yaxşıdır. İlin əvvəlindən zəruri xammal ehtiyatı görmüşük. Və kifayət qədər də məktəbli forması istehsal etmişik. Bundan başqa, təkcə Bakı şəhərində 10 mağaza açmışıq. Regionlarda da üç mağaza açmışıq. Yaxın vaxtlarda isə digər bölgələrdə daha bir neçə mağaza açmağı planlaşdırırıq”.
E.Əzimov onu da əlavə etdi ki, 300 min məktəbli formasını hazırlamağı hədəf olaraq seçiblər: "Onu da deyim ki, hazırda mağazalarımızda çox da yaxşı satış getmir. Bu da onunla əlaqədardır ki, hamı avqustun axırını gözləyir. Məktəbin açılmasına 5-10 gün qalmış hamı üz tutur mağazalara. Belə olanda da arzuolunmaz vəziyyət yaranır. Belə olanda təbii ki, hamı sıxlıqdan giley edəcək".
Nizami Hüseynov: "Dərs ilinin başlamasına az vaxt qalıb, bu müddət ərzində yeni məktəbli formalarının tikilib hazır olması inandırıcı görünmür"
Təhsil eksperti Nizami Hüseynov "Bakı-Xəbər"ə açıqlamasında qeyd etdi ki, ümumi təhsil məktəblərində şagirdlər üçün vahid formada məktəbli geyiminin tətbiqi uzun illərdən bəri təhsil sistemində mütərəqqi ənənələrdən biri olub. Maddi imkanlarından asılı olmayaraq, bütün şagirdlərin məktəbə eyni geyimdə gəlməsi sosial bərabərliyin real nümunələrindən biri kimi həmişə bəyənilib, məktəblilərin mənəvi tərbiyəsinə, təlimin demokratik əsaslarda qurulmasına müsbət təsir göstərib: "Dərs ilinin başlamasına az vaxt qalıb. Bu müddət ərzində yeni məktəbli formalarının tikilib hazır olması inandırıcı görünmür. Çünki məsuliyyət bir şirkətin üzərinə düşüb. Bu məsələdə qiymət siyasətinə də nəzər yetirmək lazımdır. Burada müəyyən amillər nəzərə alınmalı, ailələrin büdcəsinə uyğun qərar verilməlidir".
GünelCƏLİLOVA
