Yeni tədris ilindən müharibə veteranlarının təhsil haqqı dövlət tərəfindən ödəniləcək. Bu, Prezident İlham Əliyevin imzaladığı Sosial müdafiəyə xüsusi ehtiyacı olan bir sıra şəxslərin təhsil haqqının dövlət büdcəsi vəsaiti hesabına ödənilməsi mexanizminin təkmilləşdirilməsi barədə Sərəncamında əksini tapıb.
Sərəncama əsasən, Azərbaycan Respublikasının ali təhsil müəssisələrində bakalavriat və magistratura (əsas (baza ali) tibb təhsili və rezidentura) təhsil səviyyələrində və orta ixtisas təhsili müəssisələrində ödənişli əsaslarla təhsil alan Azərbaycan Respublikasının ərazi bütövlüyü uğrunda döyüş əməliyyatlarında iştirak etdiyinə görə “Müharibə veteranı” adı almış şəxslərin təhsil müddəti ərzində təhsil haqqı dövlət büdcəsi vəsaiti hesabına ödəniləcək.
“Azərbaycanda sosial cəmiyyətin yaranması istiqamətində və təhsilli insanların sayının artması baxımından məlum sərəncam olduqca əhəmiyyətlidir”
Mövzu ilə bağlı fikir bildirən təhsil eksperti Kamran Əsədov "Bakı-Xəbər" ə açıqlamasında qeyd etdi ki, hazırda 51 ali təhsil müəssisəsində 187 min tələbə təhsil alır. 2023-cu ildə ali təhsil müəssisələrinin qəbul planı kəskin şəkildə artaraq 60 minə çatacaq. Prezident İlham Əliyevin sərəncamına əsasən, bu il ali təhsil müəssisələrində ödənişsiz, dövlət sifarişli yerlərin sayı artaraq 28 minə çatacaq: “Məlumat üçün deyim ki, 2019-cu ilə qədər bu rəqəm 12 min idi. Onu da deyim ki, bir sıra sosial kateqoriyalı insanlar var ki, ödənişli əsaslarla ali təhsil müəssisələrinin bakalavr, magistr, subbakalavr və orta ixtisas pilləsinə qəbul olsalar belə, ödənişsiz təhsil alırdılar. Azərbaycanın ərazi bütövlüyü uğrunda gedən döyüşlərdə şəhid olanların, əlillərin ailə üzvləri və məcbur köçkünlər təhsil haqqından azad idi. Təhsil haqqından azad olunanların siyahısı genişlənib. Prezident İlham Əliyevin yeni sərəncamına əsasən Azərbaycanın ərazi bütövlüyü uğrunda gedən döyüşlərdə iştirak edənlər, rəsmi olaraq müharibə veteranı vəsiqəsi olanlar təhsil haqqından azaddır. Bundan sonra müharibə iştirakçıları bakalavr, subbakalavr, magistr təhsili alsalar, onların ödənişi dövlət tərəfindən veriləcək".
K.Əsədovun sözlərinə görə, əmək bazarında ixtisaslı kadrların sayının artması üçün bu olduqca müsbət haldır. Ali təhsil müəssisələrinə qəbul olan hər iki nəfərdən biri pulsuz təhsil alacaq. Ali təhsilin pulsuz olması olduqca yaxşı haldır. Təhsilin əlçatanlığının təmin edilməsi, insanların xarici ölkələrə getməsinin də qarşısını alacaq. Ən əsası, Azərbaycanda sosial cəmiyyətin yaranması istiqamətində və təhsilli insanların sayının artması baxımından məlum sərəncam olduqca əhəmiyyətlidir.
Günel CƏLİLOVA
