Məlumdur ki, bəzi taksi şirkətləri artıq gediş haqqını qaldırıb. "Bolt”, “Uber”, “Yango” taksi şirkətlərində minimal qiymət 2,50 manat təşkil edəcək. Xatırladaq ki, daha əvvəl “Yango”, “Uber”də minimal gediş 1 – 1,2 , “Bolt”da isə 1,5 – 1,6 manat olaraq dəyişirdi.
Qeyd edək ki, taksi şirkətlərinin qiyməti qaldırması həm sürücülərin, həm də sərnişinlərin narazılığına səbəb olub. Sürücülər bildirir ki, həftənin birinci günündən etibarən sifarişlər azalıb. Qiymətlərdəki dəyişiklik sifarişlərə təsir göstərib.
Xalid Əliyev: "İnsanlar ünvana tez çatmaq üçün taksidən istifadə etməli olur, ancaq indi gediş haqqının qaldırılması əhalinin çıxılmaz vəziyyətə salır"
Sərnişinlər də taksilərdə gediş haqqının artmasından giley edir. Sərnişin Xalid Əliyev "Bakı-Xəbər"ə açıqlamasında qeyd etdi ki, istər-istəməz hər bir sahədə qiymət artımı əhalinin narazılığına səbəb ola bilir: "Məlumdur ki, Bakıda ictimai nəqliyyat problemi yaşanır. Avtobusların sayı azdır. Metroda isə sıxlıq olur. İnsanlar ünvana çatmaq üçün taksidən istifadə etməli olur. Ancaq indi gediş haqqının qaldırılması əhalinin çıxılmaz vəziyyətə salır".
İlqar Hüseynli: "Ölkədə fors-major bir hal yoxdur, benzinin, dizelin, qazın qiyməti qalxmayıb, əksinə, yay aylarında məktəblər, universitetlər bağlı olur, yəni taksilər tıxaclarda gözləməli olmur"
Sosial sahə üzrə ekspert İlqar Hüseynli "Bakı-Xəbər"ə açıqlamasında qeyd etdi ki, son vaxtlar ölkədə taksi xidmətinə müdaxilələr olur. Ucuz taksi xidməti hansısa digər xidmət sektorlarının və ya onların arxasında dayanan zümrənin maraqlarına uyğun gəlmir: “Daha çox sərnişin axını “Bolt”, “Uber”, “Yango” kimi ucuz taksi şirkətlərinə yönəlirdi. Bu da eyni sahədə rəqabət aparan digər şirkətlərin narazılığına səbəb olurdu".
Ekspert hesab edir ki, qiymətləri birdən-birə iki dəfə artırmaq düzgün deyil: "Onu da nəzərə almaq lazımdır ki, taksi şirkətlərinin dövriyyəsi nə qədər az olursa, dövlətə də bir o qədər az vergi ödəyirlər. Dövlətin maraqları da nəzərə alınmalıdır. Ölkədə fors-major bir hal yoxdur. Benzinin, dizelin, qazın qiyməti qalxmayıb, əksinə, yay aylarında məktəblər, universitetlər bağlı olur, yəni taksilər tıxaclarda gözləməli olmur. Tarif Şurası ölkə üzrə taksilərdə hər kilometrə görə qiymət müəyyənləşdirsəydi və taksometr qoysaydı, o zaman dövlət müdaxiləsindən söhbət gedə bilərdi".
İ.Huseynlinin sözlərinə görə, taksi fəaliyyəti ilə bağlı hazırda ölkədə, xüsusən də paytaxtda xaotik vəziyyət hökm sürür. Son illər taksi fəaliyyəti ilə məşğul olanların sayı hədsiz artıb və artmaqda da davam edəcək: "Bu cür taksi xidmətləri əsasən məlumat bazası xaricdə olan beynəlxalq şirkətlər tərəfindən təşkil olunur, bu isə ölkədən valyutanın çıxmasına, ölkənin gəlirlərinin xaricə axmasına səbəb olur. Artıq taksi fəaliyyəti ilə bağlı qanun layihəsi hazırlanır və güman edirəm ki, bu, həm də taksi fəaliyyətində keyfiyyətin yüksəldilməsinə xidmət edəcək. Çünki taksilərdə gediş haqqı artırsa, bu zaman vətəndaşların daha rahat və komfortlu olması üçün keyfiyyətin də artırılmasına ehtiyac var. Düzdür, bu iki şərtin eyni arada olmağı bir az çətin məsələdir, çünki keyfiyyətlə kəmiyyət bir-birinə tərs mütənasibdir. Keyfiyyət yüksəldikcə kəmiyyət, yəni qiymət, demək olar ki, ona mütənasib olaraq artacaq. Taksi fəaliyyəti ilə bağlı elə bir qanun layihəsi hazırlamaq lazımdır ki, qeyd etdiyimiz kimi, həm kəmiyyət, yəni qiymət siyasəti, həm də keyfiyyət siyasəti vətəndaşları qane edəcək səviyyədə olsun”.
Günel CƏLİLOVA
