İyulun 24-dən etibarən “Bolt”, “Uber”, “Yango” taksi xidmətlərində qiymətlər iki dəfədən çox artıb. Məlumat üçün bildirək ki, əvvəllər şəhərdaxili ərazilərdə 1-1,1 kilometrlik məsafəyə 1,2-1,3 manat gediş haqqı hesablanırdı. Ancaq indi şirkətlər bu qiyməti 2,25-2,60 manata kimi artırıblar.
Taksi şirkətlərindən əldən olunan məlumata görə, bahalaşmaya bazar üzrə qoyulan tələblər səbəb olub. Onlayn taksi xidmətləri tələbləri nəzərə alaraq sürücülərə əvvəllər təklif etdikləri bonusları ləğv edib. Bu da nəticədə, qiymətlərə təsir edib.
Məlumdur ki, taksilərlə bağlı yeni qaydalar tətbiq olunub. Yeni qaydalara əsasən minik avtomobillərində onların qət etdiyi məsafənin, gediş haqqının məbləğinin hesablanması və bu barədə sərnişinin məlumatlandırmasını təmin edən, taksi üçün nəzərdə tutulmuş ''taksometr'' və proqram təminatı olmalıdır. Taksi fəaliyyəti ilə bağlı yeni dövlət rüsumları da müəyyən edilir. Qeyd edək ki ki, bu qaydalar 2023-cü il oktyabrın 1-dən qüvvəyə minir. Qaydalara əməl etməyən taksi şirkətlərinin fəaliyyəti dayandırılacaq. Yeni qaydalar əsasən xarici taksi şirkətlərinin narazılığına səbəb olurdu. Bu səbəbdən də onlar süni şəkildə taksi qiymətini qaldırdılar.
"Azərbaycanda fəaliyyət göstərən məşhur xarici taksi şirkətlərin hər üçünün eyni anda qiyməti 2 dəfəyə qədər bahalaşdırması fonunda artıq antiinhisarçılıq mövzusu aktuallaşır"
Nəqliyyat eksperti Eldəniz Cəfərov "Bakı-Xəbər"ə açıqlamasında qeyd etdi ki, taksi qiymətlərinin dəyişən tarifi bu sahədəki müxtəlif amillərlə formalaşır: “Taksi kimi istifadə olunan avtomobillərin sayının azlığı- çoxluğu, tələb, iqlim şəraiti və s. səbəblərlə bağlıdır. Azərbaycanda fəaliyyət göstərən məşhur xarici taksi şirkətlərinin hər üçünün eyni anda qiyməti 2 dəfəyə qədər bahalaşdırması fonunda artıq antiinhisarçılıq mövzusu aktuallaşır. Görünür bu şirkətlər aralarında gizli sövdələşmə edərək taksi xidmətini öz monopoliyalarına almaq istəyirlər. Ümid edirəm ki, müvafiq qurumlar süni qiymət artımı ilə bağlı təcili tədbirlər görəcək. Qiymət bahalaşması payız aylarında da davam etsə, Bakı iqtisadiyyatının itkiləri böyük olacaq. Taksilər baha olduğu üçün insanlar iş yerinə gecikəcək, gecikmələr isə hər zaman iqtisadiyyata mənfi təsir edir. Hesab edirəm ki, payıza qədər bu sahədə ciddi tənzimləmələr olacaq və tariflər əvvəlki səviyyə enəcək”.
Ekspert xüsusi olaraq vurğuladı ki, hazırda ölkəmizdə fəaliyyət göstərən beynəlxalq taksi şirkətləri qanunlarımıza hörmət qoymur. Bu sahədə hərcimərçilik hökm sürür.Yeni qaydalarda taksilərə daha bir tələb taksometrlərlə bağlıdır. Taksometrləri hazırda smartfonlar əvəzləyir. Ona görə də, belə taksilərə taksometr qoymağa ehtiyac qalmayacaq: "Taksi xidmətinə dair tələblər taksi şirkətləri üçün sərtləşdirilir. Fərdi taksi fəaliyyəti ilə məşğul olanlar lisenziya alaraq əvvəlki qaydada işlərini davam etdirə biləcəklər".
E.Cəfərov hesab edir ki, taksilərdə qiymət artımı müvəqqəti xarakter daşıyır və əvvəlki əlçatan səviyyəyə enəcək.
Günel CƏLİLOVA
