Hazırda əksər orta məktəblərdə direktor problemi yaşanır. Elm və Təhsil Nazirliyinin İnsan Resursları Şöbəsinin müdiri Eşqi Bağırov media nümayəndələrinə açıqlamasında bildirib ki, hazırda məktəb direktorları üzrə ümumilikdə 400-dən çox vakant yer var:
“Şagird sayı 150-yə qədər olan məktəblər üzrə müsahibələr keçirilib. Bəziləri artıq əmək fəaliyyətinə başlayıb, bəziləri həmin yeri istəməyib, ehtiyat kadr siyahısındadılar".
Göründüyü kimi, kifayət qədər çox sayda məktəbdə direktor çatışmazlığı problemi yaşanır. Bu vəziyyətin yaranmasına bir çox səbəb göstərilir - məktəbin yaşayış ünvanından uzaqlığı, maaş və s.
Maraqlıdır, bu problemin əsl səbəbi nədir? Məktəb idarəçiliyində yaranan bu boşluğun qarşısı necə alına bilər?
“Yalnız şagird sayı 500-dən aşağı olan məktəblərdə əməkhaqqı standart olaraq Nazirlər Kabinetinin 11 iyun 2016-cı il tarixli 270 nömrəli qərarı ilə tənzimlənir və 879 manat əməkhaqqı verilir”
Təhsil üzrə ekspert Elşən Qafarov bizimlə söhbətində bildirdi ki, orta ümumtəhsil məktəblərində direktor vəzifəsinə hər il 400-500 vakansiya olur və direktorların işə qəbul müsabiqəsində bu yerlər dolur: “Növbəti il üçün işdən çıxardılanlar, dünyasını dəyişən, ərizəsini yazıb işdən çıxanlar, yaş həddinə çatanlar olur və bu tam normaldır. Direktorların aylıq vəzifə maaşı 879 manatdır. Eləcə də Nazirlər Kabinetinin 30 avqust 2022-ci il 231 saylı qərarına görə, şagird sayı 500-dən çox olan məktəb direktorlarının əməkhaqqına əlavələr olunur. Hazırda sertifikasiya prosesi gedir və bu proses başa çatdıqdan sonra məktəb rəhbərlərinin də sertifikasiyası gözlənilir. Orada da diferensiallaşmış əməkhaqqı sisteminə keçid gözlənilir. Hazırda yalnız şagird sayı 500-dən aşağı olan məktəblərdə əməkhaqqı standart olaraq Nazirlər Kabinetinin 11 iyun 2016-cı il tarixli 270 nömrəli qərarı ilə tənzimlənir və 879 manat əməkhaqqı verilir. Ümumiyyətlə, bu proses davam edir və yaxın gələcəkdə məktəb direktorlarının, eləcə də müəllimlərin əməkhaqqının ödənilməsində diferensiallaşdırılmış maaş sistemi, yəni nəticələrə görə əməkhaqqı müəyyən olunması prosesi daha da təkmilləşəcək. Ölkədə mövcud məktəb sayını götürsək, 400 yer onun 10 faizə yaxını deməkdir və normaldır”.
Günel CƏLİLOVA
