İlham İsmayıl: “Mübarizəni elim-obam, camaatımızla bir yerdə davam etdirəcəm" Akif Nağı: “İstefa verənlər dedilər ki, guya oyunlarda iştirak etmək istəmirlər”
Qarabağ Komitəsinin son iclasında ciddi gərginliklər yaşanıb. Qurumun təsisçilərindən olan sabiq daxili işlər naziri, AMDP sədri İsgəndər Həmidov komitədən istefa verib. Onunla bərabər Gələcək Azərbaycan Partiyasının sədri Ağasif Şakiroğlu da QK-nı tərk edib.
İ.Həmidov təşəbbüsü ilə yaradılan Azərbaycan Xalq Hərəkatı daxilində Qarabağ Komitəsi tipli komitənin təşkilini daha məqsədəuyğun sayıb. Onun çıxışı birmənalı qarşılanmayıb. İstefasını açıqlayan sabiq nazir belə bir qurumu hərəkat daxilində yaradacaqlarını açıqlayaraq, iclası tərk edib. Maraqlıdır ki, sosial şəbəkələr vasitəsilə canlı yayımlanan həmin iclasda əsl dava-dalaşın qalxdığının şahidi olduq. Hətta komitədə təmsil olunan bəzi qurumlar və konkret şəxslərin ünvanına “hakimiyyətə işləyirsiniz” kimi ittihamlar da səsləndi. Çox maraqlı bir mənzərə üzə çıxır və sual olunur: öz aralarında bir ay yola gedə bilməyən şəxslər Qarabağ problemini necə həll edə bilərlər? Təbii ki, heç cür. Əslində, bunun mümkünsüzlüyünü onların özləri hamıdan gözəl şəkildə anlayırlar. Çünki indiyə qədər biz müxalif cameənin təmsilçiləri arasında saysız- hesabsız birlik, blokların yaradıldığının şahidi olmuşuq. Hətta bir jurnalist kimi onların ardıcıl sıralanmasında da çətinlik çəkərik. Tez alışıb, tez də sönən həmin birliklərin adları belə heç yadımızda qalmayıb. Nəticəsiz siyasi manevrlər üçün atılan həmin addımları işsizlikdən irəli gələn bir əyləncə növü kimi də qəbul edə bilərik. Ancaq Azərbaycanın taleyüklü problemi olan Dağlıq Qarabağın adı ilə belə siyasi oyunlar oynamaq heç də yaxşı görünmür. Daha dəqiq ifadə etsək, adama utanc hissi gətirir. Eyni zamanda, sual oluna bilər: məgər hakimiyyət Qarabağ məsələsi ilə bağlı siyasəti zəif aparır? Biz hakimiyyətin siyasi kursunda bu problemin həllini prioritet istiqamət kimi görürük. Belə olan təqdirdə, bu müqəddəs ad altında siyasi oyunbazlıq etməyə dəyərmi? Gəlin sonuncu iclasda iştirak edən komitə üzvlərinin fikirləri ilə tanış olaq.
Komitənin idarə heyətinin üzvü İlham İsmayıl Qarabağ Komitəsində baş verən qalmaqal və istefalar haqqında deyir ki, burada Bakı Şəhər İcra Hakimiyyətinin Komitənin mitinqlə əlaqədar müraciətinə mənfi cavab verməsi də rol oynayıb: “Komitə üzvləri şəhər rəhbərliyinin mitinqi növbəti dəfə məqsədəuyğun hesab etməməsini sərt təpki ilə qarşıladılar. Burada icazədən asılı olmayaraq, mitinqin keçirilməsi barədə müəyyən fikir ayrılıqları mübahisə yaratdı. Komitənin idarə heyətinin üzvü İsgəndər Həmidov komitədən istefa verdiyini və yeni yaranan Azərbaycan Xalq Hərəkatının tərkibində Qarabağ Komitəsi yaradacağını bəyan edib iclası tərk etdi. Komitənin üzvü olan Gələcək Azərbaycan Partiyası da üzvləri ilə bərabər komitədən istefa verdiyini bildirdi.
Ümumi yığıncaqdan əvvəl idarə heyətinin hazırlıq iclasında Gürcüstan səfirliyi önündə piket keçirmə təklifi də mübahisə yaratdı. Mən bu məsələnin Qarabağ Komitəsinin prioriteti olmadığını bildirdim. Təklifi verən idarə heyətinin başqa bir üzvü ilə artıq neçənci dəfə fikir ayrılığımız yarandığından, mən iclası tərk etdim və ümumi yığıncaqdan sonra idarə heyətindən istefa verdiyimi jurnalistlərə bildirdim.
Qarabağ Komitəsində çox səmimi və həqiqətən Qarabağla ürəyi döyünən xeyli üzv var. Onlar həqiqi vətənpərvər insanlardır və Qarabağın azad edilməsi üçün canlarından keçməyə hazırdırlar. Mən onların hər birinə uğurlar arzulayıram.
Qarabağın azadlığı uğrunda apardığım mübarizəni daha çox Qarabağda, elim-obam, camaatımızla bir yerdə davam etdirəcəm".
Son qalmaqal zamanı “iqtidara işləmək” kimi ittihamlarla üzləşən QK-nin digər təsisçisi, Qarabağ Azadlıq Təşkilatının sədri Akif Nağı isə ünvanlarına deyilən fikirlərlə razılaşmadığını bəyan etdi: “Onların istefasına təəssüf edirik, amma qərarlarına hörmətlə yanaşırıq. Komitənin parçalanmasından söhbət gedə bilməz. İşlərimizi davam etdiririk. Mitinqlə bağlı icazə verilməməsi pislənildi, növbəti mitinq üçün müraciət olunması qərara alındı. Növbəti mitinqin martın 16-da keçirilməsi nəzərdə tutulur. Qarabağ Komitəsinin yaranması bəzi dairələri əvvəldən narahat edirdi, bu səbəbdən parçalamağa, zəiflətməyə çalışırdılar. Bilmirəm, bu istefalar onunla bağlıdır, ya yox. İstefa verənlər dedilər ki, guya oyunlarda iştirak etmək istəmirlər, QAT hakimiyyətlə bağlıdır və sair. Bu ittihamların heç bir əsası yoxdur və bir az da gülüncdür. Hakimiyyətlə birbaşa əlaqədə olan, hakimiyyətlə sövdələşməyə gedən, deputat yerləri alan partiyalarla bir yerdə olan bəzi şəxslərin bizi bu cür ittiham etməsi doğrudan da gülüncdür. AXH daxilində Qarabağ Komitəsinin yaradılması da normaldır. Bütün partiyalarda bu cür komitələr, komissiyalar var. Burda da olmağının heç bir ziyanı yoxdur. İstefalar həm gözlənilən, həm də gözlənilməz idi. Buna təbii bir proses kimi baxmaq gərəkdir”.
Görün kifayət qədər təcrübəsi olan şəxslər Qarabağ adı altında bir-birini nədən ittiham edir? Hakimiyyətə işləməkdə. Əslində, bu adamlar anlamalıdırlar ki, Qarabağ probleminin həllində Azərbaycan xalqı bir yumruq tək birləşməlidir. Bu məsələdə iqtidar, müxalifət kimi ayrıseçkiliklər anlayışı olmamalıdır. Xalqın iradəsinin olduqca önəmli əhəmiyyət kəsb etdiyi bu mövzuda qətiyyən Qarabağın adını çirkin siyasi oyunların predmetinə çevirmək olmaz.
Məhəmmədəli QƏRİBLİ
