Məhəmməd Əsədullazadə: “Ona görə də bu formatdan heç bir müsbət addım gözləməməliyik”
Xəbər verildiyi kimi, Ermənistan hökumətinin 2019-2023-cü illər üzrə fəaliyyət proqramı parlamentdə müzakirə olunur. Qeyd edək ki, ekspert cəmiyyətində proqram deklorativ xarakterinə görə tənqidə məruz qalıb. Proqram, həmçinin, qeyri-parlament müxalifəti tərəfindən tənqid edilib.
Ermənistan mətbuatının yazdığına görə, 71 səhifəlik sənədin diqqətçəkən məqamı onun əvvəlki hökumətin proqramını, praktik olaraq, tamamilə təkrarlamasıdır. Proqram 2018-ci ilin iyununda “məxməri inqilab”dan sonra parlamentə təqdim edilmişdi.
Yeni proqram ən yaxın beş il üçün yazılıb və uzunmüddətli perspektivə aid konkret göstəricilər var. Məsələn, iqtisadi artımın orta tempi ən azı 5 faiz təşkil etməlidir.
Sənəddə xarici siyasət sahəsində bir neçə diqqətçəkən aspekt var. Məsələn, qeyd edilir ki, hökumət ATƏT-in Minsk Qrupu formatında Dağlıq Qarabağ münaqişəsinin sülh yolu ilə nizamlanmasına səy göstərəcək. Bildirilir ki, danışıqlar prosesində “Artsax”ın (Dağlıq Qarabağ ) statusunun və təhlükəsizliyinin təminatı Ermənistanın başlanğıc prioritetidir. Paşinyan hökuməti iddiasında qalaraq, yenidən belə bir mövqe ortaya qoyur ki, Dağlıq Qarabağdakı qondarma rejim münaqişə tərəfidir, nizamasalınma prosesində həlledici səsə malik olmalıdır.
Əvvəllər Paşinyan qondarma separatçı qurumun danışıqlarda tərəf kimi iştirak etməsini bəyanat formasında deyirdisə, sözügedən sənəd göstərdi ki, Ermənistandakı mövcud hakimiyyət bunu rəsmi olaraq bəyan edir. Çünki sözügedən məqamın proqrama daxil edilməsi Paşinyanın bunda qərarlı olmasından xəbər verir. Bu isə Dağlıq Qarabağ münaqişəsinin tənzimlənməsi ilə bağlı mövcud olan formatı baltalamaq deməkdir. Təəssüf doğuran məqam həm də ondan ibarətdir ki, münaqişənin tənzimləməsini öz üzərinə götürən ATƏT-in Minsk Qrupu buna indiyəcən heç bir reaksiya verməyib. Həmsədrlər sanki bunu görmürlər. Baxmayaraq ki, bu cür məqamların proqramda öz əksini tapması danışıqlara zərbədir.
Sözügedən məsələ ilə bağlı fikirlərini “Bakı-Xəbər”lə bölüşən politoloq Məhəmməd Əsədullazadənin sözlərinə görə, bununla Paşinyan danışıqları pozur: “Ermənistan baş naziri Nikol Pşainyan bir neçə ay bundan əvvəl üzərinə götürdüyü öhdəlikləri pozur. Həmin öhdəliklərə görə, Qarabağla bağlı danışıqlarda intensivlik artırılacaq və bu, real nəticələrə uyğun olacaq. Ancaq xarici işlər nazirlərinin bir neçə dəfə görüşmələrinə rəğmən, hökumətin parlamentə təqdim etdiyi proqrama separatçıların danışıqlarda tərəf kimi iştirakı məsələsinin salınması əsasən avantüradır. Hesab edirəm ki, Paşinyan bununla daxili auditoriyaya mesaj vermiş olur ki, danışıqlarda heç bir kompromisə getməyəcək. Qeyd edim ki, onun bu siyasəti heç də separatçıların danışıqlarda iştirak etməsinə gətirib çıxarmayacaq. Azərbaycanın mövqeyi aydındır. Belə bir danışıqlar mümkün deyil. Sadəcə olaraq, Paşinyan manevr edir. Hazırda ona qarşı təzyiqlər var. Bununla o göstərmək istəyir ki, heç bir güzəştə getməyəcək. Ermənistan tərəfi işğalçı və əsas tərəfdir. Bundan sonra da bu istiqamətdə danışıqlar davam edəcək. ATƏT-in Minsk Qrupunun fəaliyyətinə gəldikdə isə, ümumiyyətlə, bu qurum öz fəaliyyət imkanlarını tükədib. Minsk Qrupunun hazırkı proseslərdə rolu yalnız imitasiyadır. Həmsədrlər öz aralarında düşmən mövqedədirlər. Bilavasitə Fransa və Rusiya Ermənistana yaxın dövlətlərdir. Ona görə də bu formatdan heç bir müsbət addım gözləməməliyik. Azərbaycan kifayət qədər öz ordusunu möhkəmləndirib, işğalçı ordunu ərazilərimizdən vurub çıxarmalıdır. Artıq Ermənistanın siyasəti buna Azərbaycanı vadar edir”.
Vidadi ORDAHALLI
