Məhəmməd Əsədullazadə: “Bolton regiona səfəri çərçivəsində Paşinyan iqtidarını münaqişənin həllinə konstruktiv yanaşmağa çağırdı”
Prezident İlham Əliyev REAL televiziyasına müsahibəsində hazırda Ermənistanla aparılan danışıqlar barədə fikirlərini bildirib. Ölkə başçısının sözlərinə görə, Ermənistanın yeni hökuməti birinci mərhələdə çox ziddiyyətli bəyanatlar verirdi ki, Azərbaycan Ermənistanla yox, qondarma “Dağlıq Qarabağ Respublikası” ilə danışıqlar aparmalıdır: “Biz əlbəttə ki, bu ziddiyyətli və anlaşılmaz bəyanatları dərhal rədd etdik. O cümlədən, vasitəçilər də əlbəttə ki, belə bir mövqe ilə razılaşa bilməzdilər. Öz prinsipial mövqeyimizdə qalaraq biz danışıqlar prosesinə sadiqik”.
Prezident diqqətə çatdırıb ki, bu gün danışıqlar Ermənistan və Azərbaycan xarici işlər nazirləri arasında aparılır. Artıq bir neçə raund danışıqlar aparılıb: “Biz ümid edirik ki, bu danışıqların nəticəsi olacaq. Ona görə danışıqların aparılması, əlbəttə ki, müsbət hal kimi qiymətləndirilə bilər. Bu bir daha onu göstərir ki, Ermənistanın yeni rəhbərliyinin ilk mərhələdə bəyan etdiyi prinsiplər tamamilə qəbuledilməzdir”.
Prezident onu da qeyd edib ki, bu gün dünyada güc amili ön plana çıxır. Ona görə də güc amili həmişə gündəlikdə olub və olacaq: “Biz bunu nəinki bizim münaqişə, bir çox başqa münaqişələrlə də bağlı görürük. Ona görə biz müxtəlif imkanlardan istifadə edəcəyik və Azərbaycanın ərazi bütövlüyünün bərpası bizim əsas vəzifəmizdir”.
Reallıq ondan ibarətdir ki, Azərbaycan münaqişənin həlli istiqamətində hər zaman səy göstərir və mümkün olan qədər məsələnin tez bir zamanda həllinə çalışır. Ermənistan isə hər vəchlə münaqişəni uzatmağa çalışır. Ancaq işğalçı ölkədə hakimiyyət dəyişikliyindən sonra yeni situasiya yaranır. Hiss olunur ki, həmsədrlərin fəaliyyətində aktivlik var, danışıqlarda müəyyən təşəbbüslər nəzərə çarpır. Bu baxımdan, Prezidentin danışıqlarla bağlı nikbinliyini ekspertlər necə dəyərləndirirlər?
Sözügedən məsələni “Bakı-Xəbər”ə şərh edən politoloq Məhəmməd Əsədullazadə bir sıra məqamlara toxundu: “Prezident İlham Əliyev verdiyi müsahibədə Dağlıq Qarabağ münaqişəsinin həlli ilə bağlı bir sıra məsələlərə aydınlıq gətirdi. Hesab edirəm ki, ölkə başçısının sərgilədiyi mövqe Azərbaycanın maraqlarına uyğundur. Onu da qeyd edim ki, ötən ilin payızından başlayaraq Ermənistanın yeni rəhbərliyi danışıqlarda müəyyən dərəcədə real addımlar atdı. Danışıqlar müsbət məcrada davam edirdi. Qeyd edim ki, ABŞ Prezidentinin milli təhlükəsizlik məsələləri üzrə müşaviri Con Bolton regiona səfəri çərçivəsində Paşinyan iqtidarını münaqişənin həllinə konstruktiv yanaşmağa çağırdı. Bir neçə dəfə XİN rəhbərləri görüşüblər. Bundan əlavə, liderlərin də qeyri-rəsmi görüşü baş tutub. Düzdür, rəsmi İrəvanın mövqeyi əvvəlki günlərdən fərqlənir. Paşinyan çarpaz açıqlamalar verir. Hesab edirəm ki, Prezident bu açıqlaması ilə İrəvana danışıqlardan nəticə gözlədiyi mesajını verir. Əks təqdirdə isə güc amilini vurğulayır. XİN rəhbərlərinin Paris görüşünə kimi müsbət dinamika ortada var idi. Ancaq hazırda Moskvanın prosesə qarışması müəyyən suallar ortaya çıxara bilər. Kreml Münhen Təhlükəsizlik Konfransında XİN rəhbərlərinin görüşünə vasitəçilik edəcək. Moskva çalışacaq ki, münaqişə heç də ədalətli həll edilməsin. Prezident bu məsələləri çox yaxşı bilir və Ermənistana mesajlar verməklə, diqqətli olmasını və öhdəliklərə əməl etməsini xatırladır”.
Vidadi ORDAHALLI
