Azərbaycanın işğal edilmiş ərazilərində yaradılan separatçı rejimlə Ermənistan arasında son aylarda ziddiyyətlərin daha da genişlənməsi müşahidə olunur. Belə görünür ki, bu ziddiyyət qarşıdakı dövr ərzində daha da dərinləşəcək. Ermənistanın ikinci və üçüncü prezidentləri olmuş Robert Köçəryan və Serj Sarkisyandan fərqli olaraq, Nikol Paşinyan separatçı rejimlə hələ də ümumi dil tapa bilmir. Məhz bu səbəbdən o, hazırda bu rejimin rəhbəri vəzifəsinə özünə yaxın şəxsi gətirməyə çalışır. Bu isə ziddiyyətləri daha da dərinləşdirir.
Eyni zamanda belə görünür ki, “Qarabağ klanı” da bu ziddiyyətdən istifadə edib Paşinyana qarşı müəyyən gedişlər etməyə çalışır. Elə buna görə Paşinyan, separatçı rejimlə yanaşı, Ermənistanın özündə də “Qarabağ klanı”nın sıradan çıxarılması üçün fəaliyyətini genişləndirir. Bunun nəticəsidir ki, Ermənistan Xüsusi İstintaq Xidməti həbsdə olan sabiq prezident, “Qarabağ klanı”nın liderlərindən sayılan Robert Köçəryana qarşı daha bir ittiham irəli sürüb. Vəkillərinin bildirdiyinə görə, sabiq dövlət başçısı külli miqdarda rüşvət almaqda ittiham olunur. Bundan başqa, yenə “Qarabağ klanı”nın əsas təmsilçilərindən sayılan Serj Sarkisyan da istintaqa cəlb olunub və onun da yaxın tezlikdə həbsi gözlənir.
Bununla yanaşı, yuxarıda qeyd olunduğu kimi, separatçı rejim rəhbərliyinə də Paşinyan özünə yaxın şəxsi gətirməyə can atır. O bu xüsusda əsas diqqəti gələn ilə yönəldir. Belə ki, gələn il işğal edilmiş Dağlıq Qarabağ bölgəsində yaradılan qondarma rejimin “prezident seçkiləri” keçiriləcək. Separatçı rejimin hazırkı rəhbəri Bako Saakyanın “namizədliyini” verməyəcəyi deyilir. Erməni mənbələr qondarma “DQR-in keçmiş müdafiə naziri”, azərbaycanlılara qarşı törədilən soyqırımların fəal iştirakçısı olmuş general-leytenant Samvel Babayanın separatçı rejimin rəhbərliyinə iddialı olduğunu bildirir. Son məlumatlara görə, qondarma rejimin “prezidentliyinə” hələ ki iki nəfər – Samvel Babayan və hazırkı “prezidentin məsləhətçisi” Araik Arutyunyan iddiasını açıqlayıb. Samvel Babayan Paşinyana yaxın şəxs sayılır və onun bu niyyəti separatçılar üçün ciddi təhdid hesab olunur. Ona görə də separatçılar ona müqavimət göstərir. Erməni analitik Artuq Osipyan bu xüsusda bildirib ki, bu gün işğal altındakı Qarabağda inqilabi vəziyyət yetişib: “Serj Sarkisyan olmadan Qarabağ “hakimiyyəti” necə hərəkət edəcəyini bilmir. Mümkündür ki, onlar Babayanı sıxmaq üçün köhnə metodlardan, güc strukturlarından istifadə etsin. Lakin indiki situasiyada bu metod “hakimiyyətin” imicinə zərbədir. İndi “Qarabağ hakimiyyətinin” yeganə hədəfi kresloda öz adamlarının oturmasıdır. Çünki yalnız bu halda onların təhlükəsizliyi və topladıqları var-dövlət zəmanət altında olacaq”. Osipyan istisna etmir ki, 2020-ci ildə “seçkilər” ərəfəsində Qarabağda kütləvi aksiyalar başlaya bilər: “Qarabağda inqilabi vəziyyət yaranıb, sadəcə kənardan təşəbbüs lazımdır. Samvel Babayan bu təşəbbüsü irəli sürə bilər, yaxud başqaları ortaya çıxacaq”. Politoloq David Karabekyan qeyd edib ki, inqilabdan sonra Qarabağın “rəhbərliyi” çətin vəziyyətə düşüb: “Çünki onları Sarkisyan idarə edirdi, indi hər şey dəyişib. Babayanın iddiası buna görə ola bilər”. Erməni şərhçilər bütün bunların oyun ola biləcəyindən də şübhələnirlər. Çünki Babayan 1999-cu ilə qədər separatçı rejimin “müdafiə naziri” olub və indi “hakimiyyətdə” olanlar onun dövründən qalma kadrlardır. Bu baxımdan Babayan, yaxud Arutyunyanın “prezident” olması Saakyana zəmanət əldə etmək şansı verə bilər. Erməni politoloq Vigen Hakopyan bildirib ki, separatçılarla İrəvan arasında qarşılıqlı ittihamlar daha da dərinləşib sistemli qarşıdurma halına gəlirsə, bu olduqca xoşagəlməz nəticələrə səbəb ola bilər. Onun sözlərinə görə, məsələ ondadır ki, Paşinyan Ermənistanda Respublika Partiyasına, "Qarabağ klanı”na aid olan, demək olar ki, bütün şəxsləri ayrı-ayrı sahələrdən uzaqlaşdırıb: "Artıq növbə Dağlıq Qarabağ rejiminindir. Dağlıq Qarabağda Bako Saakyan "Qarabağ klanı”nı təmsil edir. Elə "Sasna Tser” partiyası da təsadüfən bildirmir ki, növbəti addım Qarabağda inqilabın baş verməsidir və orada tezliklə seçkilər keçirilərək Bako Saakyandan yaxa qurtarmaqdır”. İndilikdə görünən budur ki, Ermənistan hakimiyyəti ilə Qarabağ separatçıları arasında uçurum dərinləşməkdədir. İstər işğalçı Ermənistan, istərsə də qondarma “DQR” arasındakı uçurumun yaranması əslində qaçılmaz idi. Bu uçurum isə hətta silahlı qarşıdurmalara qədər inkişaf edə bilər. Elə bundan irəli gəlir ki, Azərbaycanın işğal edilmiş ərazilərində siyasi xaos və qarşıdurma da dərinləşir.
Tahir TAĞIYEV
