“Heyətə gəlincə, səhv etmirəmsə, onunla gedənlər...”
Azərbaycanın "Turan" informasiya agentliyinin redaktoru Şahin Hacıyevin öz işçi qrupu ilə birlikdə Ermənistanda olması ilə bağlı məlumatlar yayılıb. Erməni KİV-ləri bu səfəri ciddi şəkildə diqqətdə saxlayır və bildirirlər ki, Ermənistan Xarici İşlər Nazirliyi tərəfindən akkreditə olunmuş Azərbaycan jurnalistləri səfərləri zamanı siyasətçilər və jurnalistlərlə görüşlər keçiriblər. Ən maraqlısı isə budur ki, həmin məlumatlarda azərbaycanlı jurnalistlərin bir qrupunun "erməni soyqırımı qurbanları"nın abidəsini ziyarət etdiyi bildirilir.
Ermənistan prezidentinin müşaviri Tevan Poqosyan “Facebook” səhifəsində İrəvanda olan Şahin Hacıyevə müraciət edib və ona müsahibə verib. Poqosyan Azərbaycan jurnalisti ilə şəklini paylaşıb və sonuncunun onun sözlərini təhrif etməyəcəyinə söz verdiyini bildirib.
Tevan Poqosyan onu da vurğulayıb ki, Azərbaycan jurnalistinin məqsədi "Ermənistanın ictimai rəyini başa düşməkdir".
Yeri gəlmişkən, Ş.Hacıyev “Facebook” sosial şəbəkəsindəki səhifəsində Ermənistana səfəri ilə əlaqədar hələ heç nə yazmayıb. Bununla belə, "Turan" xəbər agentliyi fevralın 5-də jurnalistin Ermənistana səfəri barədə bəzi təfərrüatları açıqlayıb. “Turan” informasiya agentliyinin direktoru Mehman Əliyev bununla bağlı bildirib ki, agentliyin redaktoru Şahin Hacıyev Ermənistanın rəsmi və qeyri-rəsmi nümayəndələri ilə görüşüb: “Şahin Hacıyev onlardan bir sıra məsələlərlə bağlı müsahibələr alıb. Bunlar Azərbaycan-Ermənistan münasibətləri, Qarabağ mövzusu və Ermənistandakı vəziyyətlə bağlı olub. Silsilə müsahibələr olub və bu müsahibələr, reportajlar turan.az saytında yayımlanacaq”.
M.Əliyevin sözlərinə görə, bu rəsmi görüşlərin baş tutması üçün müvəqqəti akkreditasiya şərt olub. Onun dediyinə görə, akkreditasiya müvəqqəti, 2-3 günlük olub: “Bu sistem əksər ölkələrdə, Azərbaycanda da belədir. Xarici jurnalistlərə ölkəmizdə rəsmi orqanlarla çalışmaq üçün müvəqqəti akkreditasiya verilir. Sabah hər hansı KİV-in əməkdaşı Ermənistana rəsmi müsahibələr üçün getsə, o da akkreditasiyadan keçiriləcək”.
M.Əliyev bildirib ki, bu səfər və akkreditasiya faktı “Turan”a qarşı istifadə oluna bilməz: “Çünki biz bu səfər barədə Azərbaycanın Prezident Aparatını, Xarici İşlər Nazirliyini, Sərhəd Xidmətini məlumatlandırmışıq. Müvəqqəti, üçgünlük akkreditasiya isə bu prosedurun təbii mərhələsidir”.
Göründüyü kimi, M.Əliyev səfərin Azərbaycanın rəsmi qurumları ilə razılaşdırıldığını deyir. Ancaq indiyə kimi hər hansı rəsmi qurum bu mövzunu şərh etməyib. M.Əliyevin adlarını çəkdiyi qurumlardan bizim də münasibət öyrənmək cəhdlərimiz alınmadı. Ancaq məlumdur ki, heç bir qurum hansısa azərbaycanlı jurnalistə məsləhət görməz ki, gedib Ermənistanda qondarma “soyqırım” abidəsini ziyarət etsin. Bəllidir ki, indiyə kimi müxtəlif layihələr və tədbirlər çərçivəsində bizim bəzi millət vəkillərimiz və jurnalistlərimiz Ermənistanda səfərdə olublar. Belə səfərlərin reallaşması ermənilərin Türk dünyasını şantaj etmək vasitəsinə çevirdiyi qondarma “soyqırım” abidəsini ziyarət üçün əsas ola bilərmi?
Media məsələləri üzrə ekspert Azər Həsrət qəzetimizə açıqlamasında bildirdi ki, bu səfərlə bağlı yetərincə məlumat olmadığı üçün, geniş şərh vermək olmur: “Hələlik təmkinli davranmalıyıq. Yalnız erməni KİV-lərinin yazdıqlarına görə hansısa nəticələri çıxara bilmərik. Agentliyin rəhbəri deyir ki, Azərbaycan dövlətinin bu səfərdən xəbəri var. Hər halda, bu qədər də yalan olmaz. Çünki olmasaydı, qurumlar həmin məlumatı təkzib edərdilər. Görünür, bizim də bilmədiyimiz məqamlar var ki, Azərbaycan dövləti bu məsələdə təmkinli davranır. Qondarma “soyqırım” abidəsinin ziyarət edilməsinə gəldikdə isə, mən düşünmürəm ki, Şahin Hacıyev onu sevdiyindən ziyarət edib. Şəxsən mənim də yolum düşsə, gedib o abidəyə baxaram. Baxmaqla ehtiram arasında fərq çoxdur. Gözümlə erməni saxtakarlığını görmək üçün baxaram. Düşünürəm ki, Şahin Hacıyev də o məqsədlə gedə bilər. Yəni bir jurnalist marağını erməni KİV-ləri başqa istiqamətlərdən interpretasiya edirlər. Ola bilər ki, səfərin proqramı genişdir. Bu baxımdan da bizim lehimizə və əleyhimizə olan bütün detalları araşdırırlar. Heyətə gəlincə, səhv etmirəmsə, onunla gedənlər azərbaycanlı deyillər. Çox güman ki, bu, hansısa missiyanın tərkib hissəsidir. Ona görə də Azərbaycan dövləti məsələnin içindədir. Gələndən sonra yəqin ki, özünün də açıqlamaları olacaq. Düşünürəm ki, belə səfərlərin olmasının ziyanı yoxdur. Azərbaycan mediasının Ermənistandakı ictimai rəyi yaxından izləməsi zəruridir. Demirəm ki, belə səfərlər kütləvi olsun. Amma ayrı-ayrı fərdlərin, xüsusilə də təcrübəli jurnalistlərin belə səfərlərdə iştirakının bizə heç bir ziyanı olmaz”.
Məhəmmədəli QƏRİBLİ
