Məhəmməd Əsədullazadə: “Hazırda Paşinyan daxili auditoriya üçün fərqli, danışıqlarda isə digər siyasət ortaya qoyur”
Dağlıq Qarabağ münaqişəsinin nizamlanması üzrə Ermənistan və Azərbaycan liderləri arasında yüksək səviyyədə keçiriləcək ilk rəsmi görüş nəticəyönümlü olmalıdır. Bunu Ermənistanın xarici işlər naziri Zohrab Mnatsakanyan jurnalistlərlə söhbətində Ermənistan və Azərbaycan liderləri arasında ilk rəsmi görüşün keçirilməsinin mümkünlüyü ilə bağlı sualı cavablandırarkən deyib.
O bununla bağlı açıqlamasında qeyd edib ki, tələsmək lazım deyil: “Bu məsələdə tələsmək lazım deyil. Çünki bu prosesin davam etdirilməsi vacibdir ki, nəticə olsun və biz əmin olaq ki, təşəbbüs etdiyimiz növbəti addımla danışıqlar prosesindəki dinamikanı qoruyub saxlaya biləcəyik”.
Jurnalistlərin “bəs dinamika hələ də saxlanırmı” sualına isə erməni nazirin cavabı belə olub: “Əgər məndən soruşursunuzsa, deyə bilərəm ki, bəli, dinamika qorunub saxlanır. Ümid edirəm ki, yanılmıram. Ermənistan Dağlıq Qarabağın təhlükəsizliyinin qarantı kimi danışıqlarda iştirak edir və bunu davam etdirəcək”.
Hansı nəticəyönümlü danışıqlardan danışmaq olar ki, Ermənistan zaman-zamam danışıqların ruhuna zidd addımlar atır?! Dəfələrlə Ermənistan tərəfi danışıqların məzmununu təhrif edərək kontekstdən çıxarıb. Ermənistan tərəfi mütəmadi olaraq danışıqlarla bağlı provokativ açıqlamalar verir və danışıqlar məsələsilə manipulyasiya edir. Müşahidələr göstərir ki, danışıqlar məsələsində Ermənistana müəyyən təzyiqlər var. Ancaq mövcud hakimiyyət ara-sıra müəyyən spekulyasiyalara gedərək vaxtı uzatmağa çalışır. Paşinyan istəyir ki, əsas diqqətini daxili məsələlərə yönəltsin. Bütün bunlara baxmayaraq, əvvəl-axır, danışıqlar müəyyən nəticə verməlidir.
Maraqlıdır, bəs ekspertlər Mnatsakanyanın son açıqlamasını necə dəyərləndirirlər?
Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna bir neçə kontekstdən yanaşdı: “Ermənistan rəhbərliyinin Qarabağ danışıqlarındakı siyasətində çox ciddi problemlər meydana çıxır. İnqilabdan sonra Paşinyan iqtidarının əsas siyasəti işğal siyasətinə son qoymaqla, ölkəsini inkişaf etdirməkdir. Ancaq, göründüyü kimi, daxili təzyiqlər fonunda öz sələflərinin siyasətinə qayıtmaq kursuna yaxınlaşır. Hesab edirəm ki, bu gün Ermənistan hakimiyyəti münaqişənin həllini yubadarsa, daha ciddi iqtisadi problemlərlə üzləşəcək və istənilən iqtisadi rifah gözləntiləri puç olacaq. Ermənistan xarci işlər naziri Z.Mnatsakanyan qeyd edir ki, danışıqlarda dinamiklik qorunur. Ancaq Paşinyan Almaniya Kansleri Angela Merkellə birgə mətbuat konfransında dedi ki, münaqişənin həllinə inanmır. Belə ziddiyyətli bəyanatlar rəsmi İrəvanın ciddiliyinə şübhə yaradır. Qeyd edim ki, nazirlərin növbəti görüşü fevralda Münhen Təhlükəsizlik Konfransı çərçivəsində olacaq. Görüşdə bir daha ermənilərin mövqeyi aydın olacaq. Hazırda Paşinyan daxili auditoriya üçün fərqli, danışıqlarda isə digər siyasət ortaya qoyur. Ermənistanın bir siyasəti olmalı və xalqına həqiqətləri deməli, işğala son verməlidir. Ölkəmiz qəti şəkildə il ərzində qarşı tərəfdən konkret mövqe gözləyir”.
Vidadi ORDAHALLI
