Azərbaycanda xaricdən idarə olunan şəbəkə ölkəyə yeni təzyiq üsullarını nəzərdən keçirir. Söhbət hansısa məhbusun həbsxanada ölüm aclığı etməsilə bağlı yalan məlumatı cəmiyyətə buraxıb, sonra onun ətrafında siyasi spekulyasiyalar etməsindən gedir.
Onların belə bir cəhdi tam şəkildə fiaskoya uğradı. Həbsdə olan bloger Mehman Hüseynovun ətrafında yaradılan süni ajiotajdan sonra göründü ki, bu panikanın həyata keçməsi üçün xeyli baş sındırıblarmış. Hətta vəziyyət o həddə çatdı ki, M.Hüseynovun özü, vəkili, onu ziyarət edənlər blogerin qida qəbul etdiyini desələr də, xaricdəki və daxildəki radikallar bunu qəbul etmirdilər. Hətta elələri vardı ki, Mehmanın süd, qatıq və gündə bir ədəd çörək yeməsi faktının da aclıq aksiyası olduğuna xalqı inandırmağa çalışırdı. Azərbaycan Prezidenti atdığı humanist addımla bu məsələyə birdəfəlik nöqtə qoymuş oldu. M.Hüseynovun cənab Prezidentə işinin obyektiv araşdırılması ilə bağlı etdiyi müraciətə müsbət yanaşıldı və nəticədə gənc blogerə qaldırılmış cinayət işinə xitam verildi. Arzuları ürəklərində qalan həmin dairələr indi də bu eksperimenti “Quska” ləqəbli Hüseyn Abdulayevin üzərində aparmaq istəyirlər. Bu günlərdə H.Abdullayevin həbsxanada ölüm aclığına başlaması ilə bağlı xəbər yayıldı. Həmin məlumat dərhal xaricdən idarə olunan, radikal mövqeyi ilə seçilən saytlar tərəfindən tirajlandı. M.Hüseynovun aksiyasında fəallıq edən şəbəkə dərhal bu istiqamətdə sosial şəbəkələrdə də səs-küy salmağa başladı. Məlumat yayılandan dərhal sonra Ədliyyə Nazirliyi Penitensiar Xidmətinin İctimaiyyətlə əlaqələr şöbəsi “Quska”nın aclıq etmədiyi ilə bağlı rəsmi mövqe açıqladı: “Hazırda Bakı İstintaq Təcridxanasında saxlanan H.Abdullayevin aclıq aksiyası keçirməsi haqqında məlumat həqiqəti əks etdirmir”.
Bunun ardınca isə H.Abdullayevin anası Zeynəb Abdullayeva Prezident İlham Əliyevə müraciət etdi. Həmin müraciətdə Z.Abdullayeva ahıl yaşda olduğunu və oğlunun səhhətindəki problemləri nəzərə alaraq, onun barəsində humanizm və mərhəmət nümayiş etdirməyi dövlət başçısından xahiş edib: “Mən Sizə bir Azərbaycan qadını, ömrünün çox hissəsini yaşamış bir yaşlı və dərdli ana kimi müraciət edirəm. Mənim oğlum - Abdullayev Hüseyn Abbas oğlu 2018-ci ilin aprel ayında Türkiyədə olarkən saxlanaraq Azərbaycana gətirilib və ona qarşı Azərbaycan Cinayət Məcəlləsinin bir neçə maddəsi ilə ittiham irəli sürülərək barəsində məhkəmənin qərarı ilə həbs-qətimkan tədbiri seçilib. Sizə də yaxşı məlumdur ki, oğlum H.Abdullayev həmişə Ümummilli Liderimiz, bütün qəlblərdə həmişəyaşar olan mərhum Heydər Əliyevin yanında olmuş, həmişə onun göstərişlərini can-başla və vicdanla yerinə yetirmiş və daim bununla fəxr etmişdir. O insan həyatda xoşbəxtdir ki, o, Heydər Əliyev kimi dahi bir azərbaycanlının göstərişlərini icra etsin və onun müsəlləh əsgəri olsun. Mənim oğlum Hüseyn həmişə həyatında Heydər Əliyevçi olmağı ilə qürur duyub…”.
Hüseyn Abdullayevin anasının bu mürciətinə ölkə başçısının hansı reaksiyanı verəcəyi ilə bağlı konkret nəsə deyə bilmərik. Ancaq ölkənin və dövlət başçısının humanizm prinsiplərinə sadiq olduğunu əsas götürən Zeynəb xanımın belə addım atması tamamilə doğrudur. O, bu hərəkətilə oğlunun həbsindən kimlərinsə siyasi məqsədləri üçün istifadə etməsinin qarşısını almış olur.
Hüquqşünas Mehman Muradlı da qəzetimizə bildirdi ki, hüquqlarını bilən isanlar həmin ajiotaja getməmlidirlər: “Bilirsiniz ki, həbsə hansısa cinayət əməlini törətməkdə təqsiri olan adamları salırlar. Bununla bağlı xaricdən dövlətə hansısa təzyiqləri göstərmək tamamilə yersizdir. Biz bunu M.Hüseynovun nümunəsində də gördük. Avropa institutları isə Ermənistanda həbsdə aclıq edən partiya sədrinin müavininin ölməsinə verdikləri passiv reaksiya ilə özlərini bir daha hörmətdən salmış oldular. Sübut olundu ki, onlara həbsdə ölən hansısa məhbusun taleyindən çox, öz maraqlarının təmini önəmlidir. Bizim vətəndaşlar, məhbus valideynləri bütün bunları dərindən nəzərə almalıdırlar. Yaxınları ilə bağlı hansısa humanist addımı gözləməyin ən doğru yolu qanuni vasitələrlə müraciətlərin edilməsindən keçir”.
Məhəmmədəli QƏRİBLİ
