Elçin Mirzəbəyli: “Azərbaycan dövlətinin xaricdəki diasporumuzdan umacağı ancaq onların Vətənimizə, tarixi köklərimizə, milli adət-ənənələrimizə, mənəvi dəyərlərimizə bağlı olmaları ilə əlaqədardır”
Azərbaycan Prezidenti və Ermənistan prezidentlərinin xaricdəki diaspor qurumları, təmsilçiləri ilə iş prinsipləri arasında böyük fərqlər var. Ermənistanın keçmiş prezidentləri R.Köçəryan, S.Sarkisyan, eləcə də hazırkı baş nazir N.Paşinyan xaricdəki erməni lobbisinə, diaspor qurumlarına bir pul kisəsi kimi yanaşıb, onların maliyyə imkanlarından öz şəxsi maraqlarının təmin edilməsi üçün istifadə ediblər.
Ermənistanın həm dünənki, həm də bugünkü rəhbərləri erməni diasporuna sırf maliyyə qaynağı kimi yanaşıb. Onlar diaspor nümayəndələri ilə görüşdə hər zaman onlardan pul qoparmaq, maddi yardım almaq məqsədi güdüblər.
Azərbaycan Prezidenti İlham Əliyev isə xaricdəki Azərbaycan diaspor təşkilatlarının milli və dövlətçilik maraqları müstəvisində birləşməsinə töhfələr verib. Xaricdəki diaspor təşkilatlarına hərtərəfli dayaq olub, onların fəaliyyətinin daha yüksək səviyyədə olması üçün tövsiyələr verib. Bundan başqa, Prezident İlham Əliyev diaspor qurumlarının təmsilçilərini hər zaman diqqətdə saxlayıb, onlara müxtəlif mükafatlar verib.
Bildiyimiz kimi, bu günlərdə Prezident İlham Əliyevin sərəncamı ilə Ukraynada həyatları təhlükəyə məruz qalmış insanların xilası zamanı göstərdikləri şəxsi şücaətə görə Sabir Şirinov və Umud Şirinov “İgidliyə görə” medalı ilə təltif ediliblər. Bu, Azərbaycan Prezidentinin Umud və Sabir Şirinov qardaşlarının timsalında xaricdə yaşayan soydaşlarımıza verdiyi yüksək qiymətdir.
Azərbaycan Prezidenti İlham Əliyevin xaricdəki diaspor qurumları ilə iş prinsipi və Ermənistan prezidentlərinin, baş nazirinin xaricdəki erməni lobbisilə iş prinsipi arasında nə kimi fərqlər var?
Politoloq Elçin Mirzəbəylinin sözlərinə görə, bu iki yanaşma arasında böyük fərqlər var. “Əvvəla nəzərə almaq lazımdır ki, Azərbaycan və erməni diasporunun fəaliyyətinin təməlində dayanan ideoloji prinsiplər tamamilə fərqlidir. İlk növbədə Azərbaycan diasporu bilavasitə müstəqil Azərbaycan dövlətinin maraqlarını ifadə edir. Bu fəaliyyətin tərkib hissəsində əsasən mənəvi aspektlər dayanır. Ancaq erməni diasporunun fəaliyyəti artıq 100 ildir böhtan və qarayaxma üzərində qurulub. Qondarma soyqırım məsələsi erməni diasporu və indiki Ermənistan üçün biznes vasitəsidir. Eyni zamanda da Ermənistanın keçmiş və indiki rəhbərləri də diaspora bir donor təşkilatı kimi yanaşıblar və yanaşırlar. Azərbaycana gəlincə isə, Azərbaycan Prezidenti İlham Əliyev Azərbaycan diasporuna hər zaman xüsusi diqqət göstərir və onları Azərbaycanın milli maraqları ətrafında birləşməyə dəvət edir. Azərbaycan dövlətinin xaricdəki Azərbaycan diasporundan hər hansı bir umacağı yoxdur. Azərbaycan dövlətinin xaricdəki diasporumuzdan umacağı ancaq onların Vətənimizə, tarixi köklərimizə, milli adət-ənənələrimizə, mənəvi dəyərlərimizə bağlığının olması ilə əlaqədardır. Bundan kənarda ölkəmizin diaspor qurumları ilə münasibətində heç bir fəqrli tendensiya yoxdur. Digər tərəfdən, erməni diasporunun fəaliyyəti yalnız yalan, böhtan üzərində qurulub və ayrı-ayrı xarici xüsusi xidmət orqanlarının əlində bir alət kimi istifadə olunur. Azərbaycan diasporunun fəaliyyəti isə obyektiv həqiqətlər üzərində qurulub. Torpaqlarımız işğal olunub, bizə qarşı ədalətsizlik edilib, Azərbaycan xalqına qarşı soyqırım həyata keçirilib. Yəni biz heç bir uydurma, qondarma soyqırım aktını dünyaya təqdim etmirik” - deyə bildirən E.Mirzəbəylinin sözlərinə görə, bu aspektdən də bizim mövqeyimiz daha ədalətli və daha vicdanlıdır. O vurğuladı ki, xaricdə yaşayan istənilən azərbaycanlı bu xətti müdafiə edəndə vicdan əzabı çəkmir. “Tam səmimiyyətilə bu prosesdə iştirak edir. Digər tərəfdən, Azərbaycan öz ayaqları üzərində dayanan dövlətdir. Həyata keçirilən siyasət Azərbaycanı regionun ən güclü dövlətinə çevirib. Baxmayaraq ki, ərazilərimiz işğal olunub. Azərbaycan vətəndaşları da, ölkəmizdən kənarda yaşayan azərbaycanlılar da arxasında güclü, qüdrətli Azərbaycan dövlətinin olduğunu görür. Bu çox mühüm bir faktdır. Amma erməni daisporunun nümayəndəsi isə Ermənistana bir QHT kimi yanaşır. Çünki bilir ki, Ermənistanın onlardan maddi umacağı var. Onlar Ermənistana ciddi və oturuşmuş dövlət kimi yanaşmırlar” - deyə E.Mirzəbəyli vurğuladı.
İradə SARIYEVA
