Məhəmməd Əsədullazadə: “Azərbaycanın kompromisə birinci gəlməsini qeyd edən Paşinyan real vəziyyətdən yayınır”
Ermənistanın baş naziri Nikol Paşinyan Kölndə yerli erməni icması ilə görüşüb. O, görüşdə Dağlıq Qarabağ münaqişəsinin nizamlanmasında ehtimal edilən güzəştlərlə bağlı sualları cavablandırıb.
Ermənistanın ölkə başçısı, sələfi Serj Sarkisyan kimi, icma ilə görüşdə təxribatçı açıqlamalar verərək, ilk növbədə Azərbaycanın kompromislərə hazır olmalı olduğunu iddia edib. Onun fikrincə, əvvəl Azərbaycan kompromislərə getməlidir: “Mən parlamentin tribunasından bir neçə dəfə bəyan edərək demişəm. Niyə hamı bizdən güzəştlərə hazırsınız, ya yox deyə soruşur. Bəs kim bu sualın cavablandırılmasında ilk subyektin biz olduğunu deyib? Niyə kimsə Azərbaycandan soruşmur, onlar güzəştə hazırdırlar, ya yox? Mən bir neçə dəfə ictimai şəkildə demişəm ki, biz bu suala Azərbaycandan cavab verilənədək cavab verməyəcəyik”.
Dünya ictimaiyyətinin danışıqlar prosesində Ermənistanın aktiv olmadığını və təkliflərini səsləndirmədiyini vurğuladığı halda, Paşinyanın açıqlamaları sadəcə özünü sığortalamaq və şübhə obyekti olmadığını göstərməkdən ibarətdir. Təsadüfi deyil ki, Paşinyanın, həmçinin, sosial şəbəkələrdə və mətbuatda yayılan Dağlıq Qarabağ probleminin nizamlanmasında Ermənistana təzyiqlər edildiyinə dair məsələlərə toxunarkən Mnatsakanyanla görüşündə İrəvana təzyiq edilib- edilmədiyi barədə soruşması, yuxarıda qeyd olunan şübhələrə birmənalı olaraq cavabdır: “Mən bir gün xarici işlər naziri Zöhrab Mnatsakanyanı yanıma dəvət etdim və soruşdum. Ola bilərmi, bizə təzyiq edirlər və biz dərk etməmişik? Ona görə ki, elə təəssürat yaranıb ki, Qarabağ məsələsində baş verən inkişaf prosesləri ilə bağlı Ermənistanda ən məlumatsız insanlar bizlər, yəni mən və xarici işlər naziridir”.
Bütün hallarda, Paşinyanın məlum qeyri-konstruktiv yanaşması Dağlıq Qarabağ danışıqları prosesinə necə təsir edəcək? Ola bilərmi ki, Paşinyan bu cür radikal açıqlamalar verməklə erməni diasporunın təzyiqlərindən qorunmaq istəyir? Çünki diaspor onun üçün bir sıra məsələlərdən ötrü çox vacibdir. İstəmir ki, diasporla arasında problem yaransın.
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin sözlərinə görə, bu, Paşinyanın reallıqları gizlətməsindən xəbər verir: “Ermənistan rəhbərliyinin ötən ilin sentyabr ayından başlayaraq Qarabağ danışıqlarına başlaması təsadüfi deyil. Bu əsasən Vaşinqtonun İrəvana verdiyi təlimat əsasında həyata keçirilir. Bu ölkədə inqilab ona görə edildi ki, Ermənistan düşdüyü bu çətin dalandan çıxarılsın. Yoxsa, sələfi Sarkisyanın siyasətini davam etdirəcəksə, Vaşinqton Paşinyana dəstək verməyəcək, ölkə yerində sayacaq. Trampın Paşinyana məktubunda münaqişənin həllini qırmızı cizgi ilə qeyd etməsi, Boltonun zəngləri sıradan bir hadisə deyil. Məhz bura Dağlıq Qarabağ münaqişəsinin həlli daxildir. Erməni baş nazir Almaniyada diaspor rəhbərliyi qarşısında kompromisə birinci Azərbaycanın getməsini qeyd etməsi onun reallıqları gizlətdiyindən xəbər verir. Azərbaycan seçkiöncəsi Paşinyana imkan verdi ki, seçkiləri normal, sabitlik əsasında keçirsin. Bu, Ermənistan üçün kompromisdir. Ümumiyyətlə, Paşinyan hansı kompromisdən danışır, özü də bilmir. Konkret olaraq, masada yeddi rayonun boşaldılması var. Əgər Paşinyan imitasiya edəcəksə, rəsmi Bakı hərbi əməliyyatları bərpa edə bilər. Ermənistan xarici işlər naziri və ardınca Paşinyanın ziddiyyətli açıqlamaları prosesə zərbə vurur. Aprel ayına kimi müəyyən məsələlərə aydınlıq gələcək. Vaşinqton Paşinyana münaqişənin həllində konstruktiv həll variantına üstünlük verməsini açıq mesaj verir. Hesab edirəm ki, Azərbaycanın kompromisə birinci gəlməsini qeyd edən Paşinyan real vəziyyətdən yayınır. Kompromisə gələn tərəf varsa, o da Ermənistandır. Azərbaycanla söz oyunu oynamaq, manipulyasiya etmək Ermənistanda inqilabın verə biləcəyi müsbət imkanları dəfn etmək deməkdir. Bu gün ABŞ da yaxşı bilir ki, Ermənistanın hərtərəfli inkişafı işğala son qoyub, təcrid siyasətindən çıxmasından keçir”.
Vidadi ORDAHALLI
