Yeganə Hacıyeva: “Ermənistan baş nazirinin bu mövzudan yayınmağının kökündə ona edilən daxili təzyiqlər dayanır”
Ermənistanın baş naziri Nikol Paşinyan ABŞ Prezidentinin milli təhlükəsizlik məsələləri üzrə müşaviri Con Boltonla telefon danışığı zamanı Qarabağ münaqişəsinin nizamlanması məsələsini müzakirə etmədiyini deyib. Bu fikirləri Paşinyan mediaya açıqlamasında bildirib. Paşinyan sonra qeyd edib ki, Ermənistan Qarabağ məsələsində sülhə qarşılıq hansısa ərazilərin qaytarılması imkanını müzakirə etməyəcək: “Biz “sülhə qarşılıq ərazilər” formulunu müzakirə edə bilmərik”.
Qeyd edək ki, Boltonun İlham Əliyevə də telefon zəngi olub. Bununla bağlı Azərbaycan tərəfinin yaydığı informasiyada bildirildi ki, İlham Əliyevlə Bolton arasında olan telefon danışığı zamanı müzakirə edilən mövzular sırasında Dağlıq Qarabağ konflikti ilə bağlı məsələlər də olub. Belə olan təqdirdə, Ermənistan rəhbərliyi ilə də bu məsələnin müzakirəsi şübhəsizdir. Çünki Boltonun regiona etdiyi səfərləri çərçivəsində Ermənistanda olarkən açıq mətnlə bu konflikt barədə müzakirələr apardığı haqda məlumatlar yayıldı. Hətta Rusiya rəsmiləri Boltona bununla bağlı sərt iradlar da bildirmişdilər. Belə olan təqdirdə, Paşinyan niyə Boltonla danışığının mahiyyətini gizlətmək istəyir?
Politoloq Yeganə Hacıyeva qəzetimizə bildirdi ki, Paşinyan bu məsələdə açıq yalan danışır: “Çünki münaqişənin həlli ilə bağlı ciddi aktivlik nümayiş olunur. Artıq Rusiya ilə ABŞ arasında hətta bu məsələ ətrafında bir estafetin olduğu da görünür. Fikir verdinizsə, Boltonun tərəflərə etdiyi zəngdən sonra münaqişənin həllində Bolton və ya Lavrov planının üstün gələcəyi ilə bağlı müqayisələr aparılmağa başladı. Bu zəng, eyni zamanda, İlham Əliyevlə Paşinyan arasında Davosda keçirilən sayca üçüncü görüşdən sonraya təsadüf etdi. Görüşlərin bir qismi ayaqüstü söhbət olsa da, Davos görüşü bunlardan fərqləndi. Sonuncu görüş sözsüz ki, Davos toplantılarını hazırlayan qurumun sədri tərəfindən təşkil olunmuşdu. Bu da Qərb tərəfinə aid olan bir missiyadır. Bu prosesdə, zənnimcə, Qərb ölkələrinin bir çoxunun, xüsusilə də ABŞ-ın ön plana çıxdığını müşahidə edirik. Boltonun regiona bundan əvvəlki səfəri də göstərdi ki, münaqişənin həlli ilə bağlı gedən müzakirələrdə bu siyasətçiyə ABŞ tərəfindən böyük etimad göstərilib. Bolton Paşinyanla ayrı nəyi müzakirə edə bilər ki? Təbii ki, Paşinyanın bu mövzudan yayınmağının kökündə ona edilən daxili təzyiqlər dayanır. Hətta qondarma “DQR” separatçıları açıq iddia edirlər ki, Paşinyan Qarabağ məsələsində çox ciddi güzəştlərə hazırdır və danışıqlar məhz Qarabağın ətrafında işğal edilmiş ərazilərin azad olunması ilə bağlı aparılır. Hər gün də demək olar ki, Paşinyan və Ermənistan XİN rəhbəri bunu təkzib etməyə çalışır. Ona görə də Paşinyanın Boltonla telefon danışığı zamanı Qarabağ problemini müzakirə etmədikləri ilə bağlı açıqlaması hətta erməni mətbuatında da şübhə altına alınıb. Çünki Boltonun İlham Əliyevlə Qarabağ münaqişəsinin həlli ilə bağlı müzakirələr aparıb, Paşinyanla aparmaması inandırıcı görünmür. Konflikt Ermənistan və Azərbaycan arasındadır. Əgər bu haqda danışıqlar aparılırsa, bu, hər iki tərəflə getməlidir. Bu detalların gizli qalmasını Paşinyan Boltondan da xahiş edə bilər”.
Məhəmmədəli QƏRİBLİ
