Sədrəddin Soltan: "Belə qətnamələrə nəzər yetirəndə adama elə gəlir ki, hazır mətnlərin sadəcə tarixi dəyişdirilib"
İyulun 17-də Belçika Nümayəndələr Palatası Azərbaycanın suveren ərazisində – Qarabağda keçirdiyi antiterror tədbirlərini təhrif edən və ölkəmizə qarşı əsassız ittihamlarla dolu olan qətnamə qəbul edib.
Sənədin bütün maddələri Azərbaycanın milli maraqlarına və beynəlxalq hüququn reallıqlarına zidd olmaqla yanaşı, açıq şəkildə Ermənistanın və onun dəstəklədiyi separatçı ermənilərin mövqeyini müdafiə edir.
Belçika parlamenti qondarma “artsax” rejiminə qarşı keçirilmiş qanuni antiterror əməliyyatını “hücum” kimi qiymətləndirib və bu addımın beynəlxalq hüquqa zidd olduğunu iddia edib. Halbuki, Azərbaycan həmin ərazidə öz suverenliyini bərpa edib və bu, BMT Nizamnaməsinə, beynəlxalq hüququn prinsiplərinə tam uyğundur.
Sənəddə “Qərbi Azərbaycan” konsepti çərçivəsində səsləndirilən bəyanatlar da qərəzli şəkildə “hədə” kimi təqdim olunub. Halbuki, Azərbaycan yalnız tarixi ədalətin və azərbaycanlıların geri dönüş hüququnun təmin olunmasından danışır. Bu mövqeyi təhrif etmək Azərbaycan əleyhinə kampaniyanın tərkib hissəsidir.
Qətnamədə Azərbaycanın qondarma “Qarabağ rəhbərlərini” guya “qanunsuz” saxladığı və “müəmma doğuran” məhkəmə prosesləri apardığı iddia olunur. Əslində isə Azərbaycan məhkəmələri beynəlxalq hüquqa uyğun şəkildə hərbi cinayətlərdə şübhəli bilinən separatçılara qarşı araşdırma aparır.
Qətnamənin həmmüəllifi, deputat Mişel de Maegd verdiyi açıqlamada guya Azərbaycanın “sülh üçün yeni şərtlər irəli sürdüyünü”, Ermənistanın isə “yalnız suverenliyinə hörmət tələb etdiyini” bildirib. Bu mövqe Ermənistanın son 30 ildə azərbaycanlılara qarşı törətdiyi soyqırımları, işğalları və etnik təmizləmələri bilərəkdən səfnazaər edir.
Azərbaycan cəmiyyəti bu qətnaməni qətiyyətlə pisləyir və Belçika parlamentini Cənubi Qafqazda sülh və sabitliyi pozacaq belə birtərəfli və təxribat xarakterli qərarlardan çəkinməyə çağırır.
Avropa ölkələri həm Azərbaycandan enerji təhlükəsizliyi umur, həm də beynəlxalq hüquqa zidd olaraq separatçı və qondarma "artsax" rejimini müdafiə edir. Bu cür təzadlı xarici siyasət strategiyasının məqsədi nədən ibarətdir?
Baki-xeber.com saytına açıqlamasında Orta Doğu Araşdırmaları Mərkəzinin rəhbəri, siyasi sərhçi Sədrəddin Soltan bildirdi ki, Belçika Nümayəndələr Palatası “qaşınmayan yerdən qan çıxarmaq” kimi ənənəvi davranışını davam etdirir: "Belçika Nümayəndələr Palatası sanki Avropa Parlamentinin filialı rolunda çıxış edir. Çünki Avropa İttifaqının parlamenti anti-Azərbaycan çıxışlarına görə bu sahədə öndə gedir. Belçika və Niderland Krallığı da onu yamsılayır.
İkinci Qarabağ müharibəsi başa çatandan sonra, 2020-ci ilin dekabrında Belçikanın Nümayəndələr Palatası öz torpaqlarını işğaldan azad etdiyi üçün Azərbaycana qarşı qətnamə qəbul etmişdi. Deputatlar Belçika hökumətini ermənilərə yardım etməyə çağırmışdı.
Belçikadan olan deputatlar eyni mövqeyi Avropa Parlamentində, Benilüks ölkələri parlamentində də nümayiş etdirirlər. Müqayisə üçün qeyd edək ki, həmin qurumda təmsil olunan Niderland parlamentinin Nümayəndələr Palatası 2024-cü ilin oktyabrında Azərbaycan əleyhinə birtərəfli və qərəzli iki qətnamə çıxarıb, ölkənin xarici işlər naziri həmin sənədləri dəstəkləmişdi. 2020-ci ilin oktyabrından 2024-cü ilədək Azərbaycan əleyhinə 27-dən çox təxribat xarakterli qətnamə qəbul edib.
Belə qətnamələrə nəzər yetirəndə adama elə gəlir ki, hazır mətnlərin sadəcə tarixi dəyişdirilib. Çünki həmin parlamentlərdə təmsil olunan deputatlar üçün Azərbaycan və Ermənistan münasibətlərinin normallaşması maraqlı deyil.
Elə təəssürat yaranır ki, onlara Azərbaycana qarşı çıxış etmək illər öncə bir dəfə tapşırılıb, bunun üçün pulları verilib. Buna görə də həmin qurumlarda təmsil olunanlar hər il eyni mövzunu bir qədər fərqli redaktədə təkrar edirlər".
Onu da qeyd edək ki, Belçika parlamenti, Avroparlament və digər Avropa ölkələri bir tərəfdən Azərbaycan dövlətini əsassız olaraq tənqid edir (beynəlxalq hüquqa görə ərazi bütövlüyünü bərpa etmək hər bir dövlətin haqqıdır), digər tərəfdən isə Avropa İttifaqı Azərbaycandan təvəqqə edir ki, Avropaya illik qaz ixracatını 20 milyard kubmetrə çatdır. Avropanın bu təzadlı mövqeyini deyəsən heç özü də anlamır. Çünki dünyada Azərbaycan qazının müştərisi kifayət qədər çoxdur. Üstəgəl, hazırda qaz ticarətində maye qaz ixracatı daha populyardır ki, buna da heç bir kəmər gərək deyil. Yəni Azərbaycanın qaz ixracatını şaxələndirmək üçün artıq kəmərə ehtiyacı yoxdur. Gələcəkdə Orta Asiya ölkələrinin (Qazaxıstan , Özbəkistan və Türkmənistan) qaz ixracatı da Azərbaycan üzərindən reallaşdırılacaqsa, Bakıda maye qaz qablaşdırılması zavodunun tikilməsi iqtisadi cəhətdən səmərə verə bilər. Məsələn, hazırda Qətərin hasil etdiyi qazın 90 faizi mayeləşdirilmiş formada ixrac edilir. Azərbaycan da bu praktikadan istifadə edərək Avropaya qaz ixracatını azalda bilər. Avropa ölkələri bunu nəzərə almalıdır.
Akif NƏSİRLİ
