Fransa və Ermənistan Strateji Tərəfdaşlıq sənədi imzalamağa hazırlaşır - hərbi sfera xüsusi diqqətdədir...
Tofiq Abbasov: "Ermənilər Cənubi Qafqaza yerli müsəlman-türk xalqlarına problemlər yaratmaq üçün gətiriliblər, amma Azərbaycan buna imkan verməyəcək"
Ermənistan və Fransa mövcud strateji münasibətləri sənədləşdirməyi planlaşdırır, bunu Fransa Xarici İşlər Nazirliyinin rəhbəri Jan-Noel Barro İrəvanda erməni həmkarı Ararat Mirzoyanla keçirdiyi mətbuat konfransında bildirib.
"Ölkələrimiz və xalqlarımız arasında münasibətlər, əvvəllər qeyd olunan əməkdaşlığın bütün sahələri nəzərə alınmaqla, artıq əsasən strateji xarakter daşıyır. Bu, həm də infrastruktur və texnoloji layihələrdə əməkdaşlığa, Fransa regionları tərəfindən həyata keçirilən bir sıra proqramlara aiddir", - nazir bildirib.
Barro bildirib ki, Ararat Mirzoyanla birlikdə strateji tərəfdaşlıq layihəsi hazırlayaraq bu əməkdaşlığı sənədləşdirməyi planlaşdırırlar. Bundan əlavə, strateji tərəfdaşlıq bir neçə onilliklər ərzində, o cümlədən müdafiə sahəsində yeni proqram və layihələri əhatə edəcək.
Fransa və Ermənistan arasında imzalanmaq üçün strateji tərəfdaşlıq sənədi hazırlanır. Burada müdafiə məsələlərinə xüsusi diqqət yetiriləcək. Bu da Ermənistanın sürətlə silahlanmasına daha böyük töhfə verəcək. Bəs Ermənistanın sürətlə silahlanması öz növbəsində yenicə səngiməkdə olan münaqişə ocağına necə təsir göstərəcək?
Baki-xeber.com saytına açıqlamasında politoloq Tofiq Abbasov bildirdi ki, Ermənistan kimi ölkənin silahlanması, əlbəttə, çox təhlükəli bir prosesdir, üstəlik nəzərə alsaq ki, Ermənistan son 120 ildə Cənubi Qafqazda dörd dəfə müharibəyə səbəb olub: "Bu müharibələr millətçilik, irqi nifrət zəminində, həm də ərazilər işğal etmək məqsədi ilə törədilib. Bu ondan xəbər verir ki, Ermənistan bu neqativ kursu inkişaf etdirmək fikrindədir. Biz bu proseslərin dərinliyinə varanda görürük ki, bu müharibələr, münaqişələr erməni cəmiyyətinin öz seçimi deyil. Bu, ermənilərə xaricdən verilən sifarişdir, Ermənistan dövləti isə bu işdə sadəcə olaraq alətdir. İlk növbədə biz anlamalıyıq ki, Fransa bu istiqamətdə əsas rola malikdir. Tarix onu göstərir ki, erməniləri Cənubi Qafqazda yerləşdirən qüvvələr - rus çarları müsəlman-türk xalqlarının beşiyində xristian azlığını ondan bir alət kimi istifadə etmək üçün yerləşdiriblər. Belə də oldu, bu gün dünya gücləri öz mənfir siyasətini bölgədə sürdürmək üçün ermənilərdən istifadə edir.
Bəli, Ermənistan xaricdən bu qədər böyük həcmdə dəstək almaqla daxildə quruculuq işlərinə heç bir əhəmiyyət vermirsə, digər tərəfdən isə Azərbaycan və Türkiyəni hədələyirsə, bu ondan xəbər verir ki, Ermənistan "marionet" dövlətdir. Ona görə də heç bir dövlət onların daxili inkişafına dəstək vermir, sərmayə qoymur. Xarici havadarlar Ermənistan hakimiyyətinə deyir ki, biz sizə kömək edəcəyik, siz isə bu dəstəyi alaraq münaqişəni gündəmdə saxlayacaqsınız. Artıq heç bir şəkk-şübhə yoxdur ki, Ermənistan problemli bir ölkəyə çevrilib. Cəmiyyət səfalət içində yaşayır, sosial problemlər durmadan artır. Gələn vəsaitlər isə nə infrastruktur layihələrinə, nə sosial problemlərin həllinə, nə də antiböhran tədbirlərinə xərclənir. Bu vəsaitlər ölkəyə əsasən silah şəklində daxil olur, valyuta şəklində daxil olan vəsaitlər isə siyasi halimiyyət elitası tərəfindən mənimsənilir. Ermənistan hakimiyyəti yeri gələndə bütün qonşularını təhlükə altında qoymağa qadirdir. Bu yalnız bizə və Türkiyəyə aid deyil, lazım olan anda Rusiyaya və İrana qarşı da onlar eyni addımları təəssüflənmədən atarlar.
Bu proseslər İkinci Qarabağ müharibəsinə qədər öz axarı ilə gedirdi. Məsələn, Qərbdə elə bilirdilər ki, Ermənistan onun üzərinə qoyulan vəzifəni yerinə yetirə bilir, artıq ermənilər özləri də bu yalana inanmışdılar. Nəhayət 44 günlük müharibədə Azərbaycan Ordusu ermənilərin cavabını layiqincə verdi. Azərbaycan Ordusu onlara başa saldı ki, siz bundan sonra vəziyyəti eskalasiya səviyyəsinə gətirib çıxararaq insanların həyatını təhlükə altında qoya bilməzsiniz, biz buna imkan verməyəcəyik. İkinci Qarabağ müharibəsi həm Ermənistana, həm də onun havadarlarına tarixi dərs verdi ki, onlar regionun təhlükəsizliyinə bundan sonra təhdidlər yarada bilməzlər. Ermənilər Cənubi Qafqaza yerli müsəlman-türk xalqlarına problemlər yaratmaq üçün gətirilublər, amma Azərbaycan buna imkan verməyəcək.
Azərbaycan Ermənistanı ciddi güzəşt və çağırışlarla sülhə dəvət edir. Ermənilər isə bu çağırışları humanizmin deyil, zəifliyin təzahürü kimi anlayırlar. Bu səbəbdən də Ermənistan sülh sazişinin şərtlərini yerinə yetirmək istəmir. Bu işdə ermənilərin havadarları xüsusilə maraqlıdır. Çunki sülh bərqərar olsa, onlar heç bir bəhanə ilə bölgəyə soxula bilməyəcəklər".
Akif NƏSİRLİ
