BMT Təhlükəsizlik Şurasında Qarabağa həsr olunmuş iclas, gözlənildiyi kimi, Ermənistan və havadarlarının iflası ilə yekunlaşdı. İclasda bir neçə ölkə, xüsusən də Fransa, Almaniya, Malta və Afrikanın bir neçə ölkəsi əsassız ittihamlar səsləndiriblər. Birləşmiş Ərəb Əmirlikləri, Çin və Rusiya neytral mövqedən çıxış etsə də, Türkiyə hər zaman olduğu kimi, Azərbaycanın haqlı mövqeyini dəstəkləyib.
Daha sonra Ermənistan xarici işlər naziri Ararat Mirzoyan və Azərbaycanın xarici işlər naziri Ceyhun Bayramov çıxış edib. Azərbaycanlı nazir rəsmi Bakının həyata keçirdiyi antiterror tədbirlərinin əsl mahiyyətini açıqlayıb.
Məsələnin maraq doğuran tərəfi isə Ermənistanın baş naziri Nikol Paşinyanla bu ölkənin xarici işlər naziri Ararat Mirzoyanın Qarabağdakı ermənilərin durumu ilə bağlı açıqlamalarının kəskin şkildə fərqlənməsi, hətta daban-dabana ziddiyyət təşkil etməsidir. Ararat Mirzoyan BMT Təhlükəsizlik Şurasının iclasındakı çıxışında qeyd edir: “Qarabağda 10 aylıq blokadaya görə insanlar ac qalmaqda davam edir. Səhiyyə sistemi iflic vəziyyətindədir. Qarabağdan olan görüntülər həqiqətən də şoka salır. Analar itkin düşən övladlarını tapmağa çalışırlar... Dağlıq Qarabağın yaşayış məntəqələrindən birində 8 yaşlı uşaq partlayış zamanı itkin düşüb. Onun 10 yaşlı qardaşı öldürülüb, cəsədini hətta kənddən çıxarmaq mümkün olmayıb. Daha bir qardaş yaralanıb... Azərbaycanın gözündə bu uşaqlar terrorçudur və Azərbaycanın hərəkətləri bu uşaqlara, onların analarına, nənələrinə, babalarına qarşı olub... Azərbaycanın sosial şəbəkələri itkin düşən uşaq və qadınların tapılması, zorlanması çağırışları ilə doludur, onları parçalayıb itlərə yedizdirirlər... Azərbaycanlı sosial şəbəkə istifadəçiləri sosial şəbəkələrdə Dağlıq Qarabağ qadınlarının profillərini paylaşır və Azərbaycanın nəzarətinə keçəndə bu qadınlardan hansının zorlanacağına mərc edirlər”. Onun bu və digər sərsəmləmələrinə Azərbaycan xarici işlər naziri Ceyhun Bayramov tutarlı cavab verib. Amma maraq doğuran odur ki, Ararat Mirzoyanın dedikləri Paşinyanın fikirləri ilə tam ziddiyyət təşkil edib. Çünki elə sentyabrın 21-də Nikol Paşinyan sosial şəbəkə hesabında canlı yayımda bildirib ki, Qarabağın mülki əhalisi arasında kütləvi itkilərin olması ilə bağlı yayılan məlumatlar reallığa uyğun deyil. O, Qarabağda atəşkəs rejiminə ümumilikdə əməl olunduğunu qeyd edib. Paşinyan açıq mətnlə bildirib ki, sosial şəbəkələrdə Qarabağ əhalisi arasında kütləvi insan tələfatı ilə bağlı məlumatlar reallığa uyğun gəlmir: “Qarabağda ermənilər üçün heç bir təhlükə yoxdur. Zərurət yaranarsa, ermənilərin Qarabağdan çıxarılması məsələsinə baxacağıq, hazırda təhlükə yoxdur”.
Sentyabrın 22-də etdiyi çıxışda da Nikol Paşinyan bir daha təkrar edib ki, Qarabağda gərginlik qalsa da, buradakı ermənilərin həyatına hər hansı təhlükə yoxdur: “Dünən bu barədə səsləndirdiyim fikrim dəyişməyib. Əgər hər hansı dəyişiklik olsa, bunu bir daha vurğulamazdım. Mənə verilən məlumata görə, hər yarım saatdan bir vəziyyət dəyişir, proseslərə hakim olmaq üçün onu diqqətlə izləmək lazımdır. Ərazidə humanitar vəziyyətin yaxşılaşacağına dair ümidlər var, müsbət dinamika müşahidə olunur. Qarabağa böyük həcmdə humanitar yardımlar daxil olur. Məndəki məlumata əsasən, müəyyən razılaşmalar var, lakin ətraflı məlumat verə bilməyəcəm. Düşünürəm ki, bu razılaşmaların icrasına indidən başlanılmalıdır”. Beləliklə, Ararat Mirzoyanın BMT yalanlarını onun lideri olan Paşinyan özü ifşa edir. Lokal xarakterli antiterror tədbirləri nəticəsində isə Azərbaycan çox böyük və tarixi uğura imza atdı. Elə prezidentin də xalqa müraciətində vurğuladığı kimi, bundan sonra dinc birgəyaşayış üçün fundamental hüquqların təmini, humanitar məsələlərin həlli və sosial layihələrin icrası mərhələsi başlayır. Xankəndi və ətrafında dövlətimizin konstitusion quruluşu təmin olunduqdan, hərbsizləşdirmə bitdikdən sonra reinteqrasiya prosesi daha sürətlə gedəcək, beləliklə bölgənin siması dəyişəcək. Erməni bloger Natali Aleksanyan da bunu etiraf edir. O, Ermənistanın keçmiş və indiki hakimiyyətlərinə, Qarabağ separatçılarının keçmiş liderlərinə müraciət edərək bildirir: “Əvvəlkilər, indikilər, ortalar, aşağılar, yuxarılar - hər şeyi diqqətlə dinləyin. Gedin birlikdə dua edin ki, Azərbaycan birdən-birə ermənilərin inteqrasiyasına başlamasın. Çünki birdən başlasa və Qarabağda ermənilərin rahat yaşaması üçün bütün şəraitin qorunub saxlanacağı üzə çıxsa, o zaman siz də bir dəstə olaraq “arxanızı” yuyub gözləməyə hazır olun. Bu halda aydın olacaq ki, ermənilərin Azərbaycanın tərkibində Qarabağda həmişə problemsiz yaşamaq imkanı olub. Bu o deməkdir ki, soyqırım, etnik təmizləmə və düşmənçiliklə bağlı bütün söhbətlər süni olub, sizin öz məqsədlərinizə xidmət etmək üçün yaradılıb. Yəni bu o demək olacaq ki, Qarabağın və Ermənistanın bu uzun işgəncələri, ölümləri ancaq sizin problemlərinizi həll etmək üçün olub. Biz hələ də əlaqə saxlayacağıq, uzağa getməyin”. Yevlaxda isə Qarabağın erməni icması ilə görüş barədə razılıq nəinki Azərbaycanın, bütövlükdə regionun inkişafı üçün yeni səhifə açacaq. Artıq Azərbaycan Fövqəladə Hallar Nazirliyi tərəfindən Azərbaycanın Qarabağ bölgəsində yaşayan erməni sakinlərin ehtiyaclarının təmin olunması üçün humanitar məqsədlə ərzaq yükü göndərib. Bu da Qarabağ ermənilərinə Azərbaycanın münasibətinin daha bir real göstəricisidir.
Samirə SƏFƏROVA
