Erməni lobbisinin ABŞ-da əsas təmsilçilərindən biri olan senator Bob Menendez yenə rüşvət qalmaqalına görə gündəmdədir. Belə ki, ABŞ Konqresindəki bu ermənipərəst senatorun qızıl külçələr şəklində rüşvət aldığı iddia edilir və hazırda federal prokurorlar tərəfindən aparılan istintaq altındadır.
400 min dollar dəyərində qiymətləndirilən qızıl külçələrinin ona Fred Daibes adlı şəxs tərəfindən verildiyi iddia edilir. Daibesin federal bank ittihamları ilə üzləşdiyi üçün Menendezə rüşvət verdiyi bildirilir.
Xatırladaq ki, Bob Menendez 14 sentyabr 2023-cü ildə ABŞ Senatında təşkil etdiyi dinləmələrdə anti-Azərbaycan bəyanat verib. Ümumiyyətlə, Bob Menendez və onun erməni əsilli arvadı Nadin Arslanyan haqqında Federal Prokurorluq uzun müddətdir araşdırmalara başlayıb. Bir müddət əvvəl ABŞ-ın məşhur “The Wall Street Journal” nəşri məlumat yaymışdı ki, Nadin Arslanyan Nyu Cersi ştatından seçilmiş senator ərindən yardım istəyən şəxslərdən müxtəlif bahalı hədiyyələr və rüşvət alıb: “Bob Menendez 2006-cı ildən ABŞ senatorudur və Senatın Xarici Əlaqələr Komitəsinin sədridir. ABŞ-ın Nyu-Yorkun Cənub Bölgəsi üzrə prokurorluğu Menendezin 2020-ci ildə evləndiyi həyat yoldaşı Nadin Arslanyanın həmkarlarını da məhkəməyə çağırıb. Bu təhqiqat 2015-ci ildə prokurorların Bob Menendezə qarşı qaldırdığı korrupsiya işindən ayrıdır. Məhkəmə sənədləri göstərir ki, “Edgewater” və “N.J. şirkətinin IS EG Halal” şirkətinin təsisçisi Vael Hananın evində və ofisində axtarışlar aparılıb. Sənədlərdən məlum olub ki, Misirə ixrac edilən ətin halal sertifikatı saxta yolla əldə edilib. Bu saxta sənədin əldə edilməsində isə şirkət rəhbərinə xanım Arslanyan vasitəçilik edib. Çünki o özü də bu şirkətin ortaqlarındandır. Dövlət biznes reyestrində göstərilir ki, xanım Arslanyan 2019-cu ildə Nyu Cersidə yaradılmış “Strategic International Business Consultants LLC holdinq” şirkətinin prezidentidir. Menendezin son federal maliyyə açıqlamaları da Arslanyanın bu şirkətdən gəlir əldə etdiyini göstərir”. Bundan başqa, Menendesə qarşı 2015-ci ildə ictimai korrupsiya işinə görə cinayət işi açılıb. Cinayət işində qeyd edilir ki, senator Nadin Arslanyan üçün viza işində yardımçı olub. Eləcə də Floridaya gələn əcnəbi oftalmoloqa xüsusi imkanlar yaradıb. Əvəzində isə 1 milyon dollar hədiyyə alıb. Belə ki, 2015-ci ildə Ədliyyə Departamentinin İctimai Dürüstlük Şöbəsinin prokurorları Menendezi “Palm Beach” oftalmoloqu və siyasi mesenat, doktor Salomon Melgendən külli miqdarda rüşvət almaqda ittiham ediblər. Menendez Senatdakı ofisində altı nəfərə keçmiş xeyriyyəçi Salomon Melgenin sevgililərinə viza almaq üçün göstəriş verib. Onların arasında ukraynalı aktrisa və model Svetlana Buçik də var.
Bundan başqa, “New York Post” nəşri də Menendezin həyat yoldaşı Nadin Arslanyanın qaranlıq maliyyə fəaliyyətini ifşa edən araşdırma yayıb. Burada da qeyd edilir ki, Arslanyan cəmi üç il əvvəl girovla üzləşməsinə baxmayaraq, 400 min dollar dəyərində qızıl külçələri nağdlaşdırıb. Nəşrin məlumatına görə, satış keçən yaz, yəni senatorun yeni federal araşdırma ilə üzləşdiyini açıq şəkildə etiraf etməsindən aylar əvvəl baş verib. Senatorun illik hesabatına görə, 56 yaşlı Arslanyan qızılı 7 aprel 2022-ci il və 16 iyun 2022-ci il tarixləri arasında satıb. Bu, təxminən 5.9 koli xalis qızıl olub. Nəşr bildirib ki, satış 2020-ci ildə Menendezlə evlənməzdən əvvəl maliyyə cəhətdən çətinlik çəkən, hətta evinin girovu ilə üzləşdiyi bildirilən Arslanyan üçün əlamətdar maliyyə dönüşü olub. Məlumatlara görə, Manhetten federal prokurorları senatorun və ya onun həyat yoldaşının siyasi lütflər müqabilində avtomobil və Vaşinqtonda mənzil də daxil olmaqla haqqında məlumat verilməyən lüks hədiyyələr alıb-almadığını bilmək istəyirlər. Qeyd edilir ki, Arslanyan 2014-cü ildə Menendezlə yaşadığı Bergen qraflığındaki evində aylıq 1897 dollarlıq ipotekanı ödəməkdə çətinlik çəkdikdən sonra xərclərini idarə etmək üçün federal proqrama daxil olub. Lakin 2019-cu ilin ortalarına qədər aşağı ödənişləri edə bilməyib və ipoteka şirkəti onun evini girov qoyub. Girov başlayan kimi Arslanyan öz konsaltinq biznesini - “Strategic İnternational Business Consultants” MMC-ni qurub. Şirkətin müştərilərinin kim olduğu bəlli deyil. Onun qeydiyyatı ilə Menendezin dostu Donald Skarinci məşğul olub. Qeyd edək ki, cütlük 2020-ci ilin oktyabrında Baysayd şəhərindəki erməni kilsəsində kiçik bir mərasimlə evlənib. Arslanyan 2020-ci ildə etiraf edib ki, Menendezi 1915-ci il “erməni soyqırımı”nın tanınması üçün təbliğat aparmağa təşviq edib. Hazırda Menendez anti-Azərbaycan, anti-Türkiyə mövqeyinə görə daha çox diqqət cəlb edir. Lakin çoxsaylı rüşvət qalmaqalı onun üçün indi getdikcə daha böyük problemə çevrilir. Erməni lobbisinin təsirində olan bu şəxsin fəaliyyətləri heç bir halda legitim hesab edilmir. Ümumiyyətlə, ABŞ Konqresində erməni lobbisinin təmsilçiləri olan şəxslərin adı zaman-zaman maliyyə fırıldaqlarında, korrupsiya əməllərində, erməni diasporunun müxtəlif fondlarında topalanmış maliyyə vəsaitlərinin mənimsənilməsində hallanır. Bu da onların ermənilər üçün canfəşanlığının səbəblərini izah edir.
Nahid SALAYEV
