BMT Təhlükəsizlik Şurasının Fransanın təşəbbüsü ilə keçirilən Qarabağa həsr olunmuş iclası başa çatıb. İclasda heç bir sənəd qəbul olunmayıb. Toplantıda iştirak edən ölkə təmsilçiləri deklarativ çıxışlarla kifayətləniblər.
Xarici işlər naziri Ceyhun Bayramov Azərbaycanın haqlı mövqeyini fakt və sübutlarla iclas iştirakçılarının diqqətinə çatdırıb.
Toplantı, Ermənistanın və havadarlarının gözləntilərinin əksinə olaraq. heç bir sənəd qəbul olunmadan başa çatıb.
Göründüyü kimi, Fransanın növbəti cəhdi də boşa çıxdı.
Artıq Ermənistan-Fransa tandeminin BMT-dəki necənci cəhdidir ki, uğursuzluqla nəticələnir.
44 günlük müharibədən sonra 2021-ci ildə Fransanın BMT-yə ermənilərlə bağlı etdiyi müraciət fiaskoya uğradı.
2022-ci ilin sentyabr hadisələrindən sonra Ermənistanın müraciəti əsasında BMT TŞ-nın gündəliyinə “Ermənistanın BMT yanında Daimi nümayəndəsinin məktubu” adlı bənd daxil edilmişdi. Müzakirələrindən dərhal sonra Fransa BMT TŞ-nın daimi üzvü və TŞ-nın sədri kimi Laçın-Xankəndi yolundakı vəziyyəti humanitar fəlakət kimi təqdim edən ermənipərəst mətn hazırlanmışdı.
Prosesi bilavasitə Fransa Prezident Administrasiyası və Makronun xarici siyasət məsələləri üzrə müşavirləri aparırdı. Fransa BMT TŞ-yə ermənipərəst Bəyanatı çıxarmaqla daha sonra onu Qətnamə kimi qəbul etdirmək niyyəti güdürdü. BMT TŞ-nın sədri olan Fransa bu 10 gün ərzində Laçın yolundakı vəziyyətlə bağlı bəyanatı keçirə bilmədi.
Azərbaycanın ciddi diplomatik səyləri ilə Bəyanatdan əvvəlcə “Dağlıq Qarabağ” sözü çıxarıldı. Daha sonra sənəddə qeyd edilib ki, humanitar yardım yalnız Azərbaycanın ərazi bütövlüyü və suverenliyinə hörmət əsasında mümkün ola bilər. Rəsmi Bakı öz tərəfdaşlarının köməyi ilə Bəyanatın mətnini o qədər yumşalda bilib ki, 6-7 redaksiya dəyişikliyindən sonra sənəd Azərbaycanpərəst Bəyanata çevrilib. Bundan sonra rəsmi Paris sənəddən ümumiyyətlə imtina etdi. Fransa rəsmən məktubla müraciət edərək prosesi dayandırdığını bəyan etdi.
Nəhəyət, bu il avqustun ortalarında BMT Təhlükəsizlik Şurası ermənilərin yaşadığı Azərbaycanın Qarabağ bölgəsini Ermənistanla birləşdirən Laçın yolunun “bağlanmasından” sonra yaranmış “humanitar böhranı” müzakirə etmək üçün təcili iclas çağırdı. Bu məsələdə də əsas canfəşanlığı Fransa edirdi. Onların bu cəhdi də uğursuzluğa düçar oldu.
Göründüyü kimi, son 2 ildə Fransa ilə Ermənistanın birgə cəhdi 4-cü dəfədir ki, iflasa uğrayır.
Politoloq Elşən Mustafayev “Bakı-Xəbər”ə açıqlamasında bildirdi ki, ermənilərin və havadarlarının çox böyük ümidlərinin əksinə olaraq, bu iclasda nəinki Azərbaycan əleyhinə, ümumiyyətlə hər hansı bir qətnamə və ya bəyanat qəbul edilmədi: “Ermənilərin və havadarlarının Azərbaycana qarşı bütün rıçaqları tükənməkdə, bütün addımları iflasa uğramaqdadır. Nəzərə alsaq ki, Vətən müharibəsindəki möhtəşəm Zəfərdən sonra erməni-fransız cütlüyünün Laçın yolu ətrafında qaldırdığı “humanitar böhran” şousu da iflas etdi. Əlbəttə, BMT Təhlükəsizlik Şurasında keçirilən iclasda fransız-erməni diplomatiyasının ağır vəziyyətə düşməsinin əsas səbəbi Azərbaycan dövlətinin son dərəcə ağıllı xarici siyasəti və diplomatik hazırlığıdır. Azərbaycan Prezidenti İlham Əliyevin 44 günlük müharibə dövründə olduğu kimi, ondan sonrakı mərhələdə də media ilə, o cümlədən və xüsusilə beynəlxalq nüfuza malik xarici media orqanları ilə açıq dialoq xarakteri daşıyan, postmünaqişə dövrünün əsl həqiqətlərini ən incə detallarına qədər açıqlayan müsahibələri informasiya müharibəsində Ermənistanın şanslarını puça çıxardı. Bundan başqa, sonuncu iclasda Azərbaycan Respublikası təmsilçilərinin BMT-dəki arqumentləri də tam əsaslı oldu. Avropanın “aparıcı” ölkələrindən biri Azərbaycana öz meydançasında növbəti məğlubiyyətə uğradı. Yaxşı olar ki, Fransa Azərbaycan daxilində separatizmə dəstək vermək, Cənubi Qafqazda əldə olunmuş kövrək sülhün möhkəmlənməsinə zərbə vurmaq əvəzinə, öz daxilindəki proseslərə bir daha diqqət yetirsin”.
Məhəmmədəli QƏRİBLİ
