Bildiyimiz kimi, sentyabrın 21-də BMT Təhlükəsizlik Şurasının Qarabağla bağlı iclası keçirildi və bu iclasda da heç bir qərar qəbul edilmədi. İclasda hansısa qərar qəbul edilməsinə nail ola bilməyən ermənipərəst qüvvələr öz təxribatlarından qalmayıblar. Belə ki, Fransa, Almaniya nümayəndələri və Aİ təmsilçisi Cozef Borrel BMT TŞ-da Azərbaycanın əleyhinə kəskin çıxışlar ediblər.
Hər zaman qərəzli və erməniyönlü mövqeyi ilə seçilən, ermənidən artıq erməni olmaq istəyən Borrelin çıxışı ikrah doğurur.
Trend-in məlumatına görə, Aİ-nin Xarici İşlər və Təhlükəsizlik Siyasəti üzrə Ali Nümayəndəsi Jozep Borrelin Azərbaycanın Qarabağda antiterror tədbirləri ilə bağlı antiazərbaycan bəyanatı əvvəlcə bütün 27 Aİ ölkəsinin birgə bəyanatı kimi qəbul olunmalı idi, lakin Macarıstanın buna veto qoyması nəticəsində bəyanat qəbul edilməyib. Yəni Borrelin BMT TŞ-nın iclasında danışdığını Aİ ayrıca bəyanat kimi yaymaq istəyib, Macarıstanın etirazına görə bu məkrli oyunları baş tutmayıb.
Fransa və Almaniya nümayəndələrinin, eləcə də Aİ-nin təmsilçisi Cozef Borrelin Azərbaycanın mərkəzi hakimiyyətinə qarşı iddiaları əlbəttə əsassızdır. Ermənistanın baş naziri N.Paşinyan özü bəyan etdi ki, Qarabağda ermənilərin həyatına təhlükə yoxdur. Bu halda, Aİ nümayəndəsinin və onunla eyni fikirdə olanların səsləndirdiyi iddialar əsassız ittihamlardan və iftiradan başqa bir şey deyil.
“Aİ təmsilçisinin də, Fransa və Almaniyanın da dərdi Qarabağın erməni əhalisi deyil, onlar əslində separatçıları və separatimizi müdafiə edirlər”
AMEA-nın Qafqazşünaslıq İnstitutunun Qafqaz tarixi şöbəsinin müdiri, professor Qasım Hacıyev “Bakı-Xəbər”ə şərhində bildirdi ki, BMT TŞ-nin iclasında Azərbaycanın keçirdiyi antiterror tədbirlərinə qarşı Almaniya, Fransa və Aİ nümayəndəsinin qərəzli çıxışları onların təhlükəli niyyətlərindən xəbər verir. Azərbaycana qarşı daim səlibçilik yanaşması sərgiləyən bəzi Avropa dövlətlərinin ermənipərəstliyi onların xristian təəssübleşliyinin nümunəsidir. Q.Hacıyev qeyd etdi ki, Borel öz əsas vəzifəsini unudub ermənilərin müdafiəsi ilə məşğul olur: “Borrelin gözünü erməni sevgisi və yersiz xristian təəssübkeşliyi elə tutub ki, gerçəyi görə bilmir. O, bu hərəkətləri ilə təmsil etdiyi qurumun nüfuzuna ciddi zərbə vurur, onu nüfuzdan salır. Azərbaycana iftira atmaqla əlinə bir şey keçəsi deyil, çünki şər ayaq tutsa da, mənzili uzaq olmur. Fransa və Almaniyanın da ifrat ermənipərəst mövqeyi onların özlərinə ciddi zərbə vuracaq. İndiyə qədər Azərbaycana qarşı nə qədər tələ qurublarsa, hamısı boşa çıxıb. Bu dəfə də Macarıstanın Azərbaycanın haqq işini dəstəkləməsi səbəbindən ermənipərəst Borrelin çıxışı əsasında hazırlanan üzdəniraq kağız parçası qəbul edilməyib”.
Q.Hacıyev qeyd etdi ki, Qarabağın erməni əhalisinin müdafiəsini Azərbaycan dövləti həyata keçirəcək, bu baxımdan Ai-nin də, Frasanın və Almaniyanın da gərəksiz əndişəsinə əsas yoxdur. “Bir məsələni unutmayaq ki, Aİ-nin təmsilçisinin də, Fransa və Almaniyanın da dərdi Qarabağın erməni əhalisi deyil, onlar əslində separatçıları və separatimizi müdafiə edirlər. Separatçıların çirkin fəaliyyətinə son qoyulması, erməni əhalinin reinteqrasiyası bunları narahat edir. Bilirlər ki, proses nə qədər sürətlə gedəcəksə, onların Qarabağın erməni əhalisi üzərində təsirləri o qədər tez aradan çıxacaq”.
Q.Hacıyevin sözlərinə görə, BMT-dən başqa yerdə qalan beynəlxalq təşkilatlar və Avropa dövlətləri hər zaman Azərbaycana qarşı qərəzli mövqe tutub. “30 illik təcrübəmizdən deyə bilərik ki, onlar bizə ikili standartlarla yanaşıb. Sözsüz ki, onların bir qismi öz dövlətlərinin mövqeyindən çıxış edərək, bir qismi isə xristianlıq həmrəyliyinə görə həmişə ermənilərin tərəfini tutublar. Bir sıra Avropa dövlətlərində və beynəlxalq təşkilatlarda xristian təəssübleşliyi əsas götürülür. Fransa, Almaniya, eləcə də başqa Avropa dövlətləri, beynəlxalq təşkilatlar Azərbaycana qarşı haqsızlıqlar törədiblər. Ermənidən artıq erməni olan Fransanın mövqeyi həmişə bilinib və biz də onun mövqeyini nifrətlə qarşılayırıq. Azərbaycana qara yaxan Fransa, Almaniya nümayəndələri və Borrel Qarabağda mülki şəxslərin burnu belə qanamadığı, onlar üçün hər hansı bir həyati təhlükə olmadığı halda yalandan cığır-bağır salırlar. Bunun əvəzinə Xocalı soyqırımını yada salsınlar, Xocalıda 14 yaşlı azərbaycanlı qızını diri-diri tonqala atılıb yandıran separatçıardan haqq-hesab sorsunlar. Amma bunun əvəzində onları himayə edirlər. Əgər elə obyektiv idilərsə, separatçılardan Azərbaycan uşaqlarının başına gətirdikləri faciələrin hesabını sorsunlar. Bu ikiüzlü, riyakar, dövlətlərə ikili standartlarla yanaşan beynəlxalq təşkilatlardan nə gözləyə bilərik? Avropa İttifaqına gəldikdə, axırıncı iki dəfə bizə bir az müsbət mövqedən yanaşıb. Amma bu 30 ildə 18 dəfə Azərbaycanın haqq işi ilə bağlı məsələ qoyulub, onların heç birində Avropa İttifaqı ökəmizin haqlı mövqeyinə məhəl qoymayıb. Antiazərbaycan mövqeli ermənpərəst bir təşkilatdan nə gözləmək olar”-deyə Q.Hacıyev bildirdi.
30 il Azərbaycana divan tutulduğunu deyən Q.Hacıyev bildirdi ki, amma Aİ və başqa qurumlar bir dəfə də olsun erməniərin Azərbaycan xalqının başına gətirdiyi faciələrə reksiya verməyib. “Azərbaycanın kəndlərini, şəhərlərini ermənilər məhv etdilər, başımıza nə qədər faciələr gətirdilər. Onların hansı birinə münasibətdə Avropa İttifaqı və başqa təşkilatlar ləyaqətli hərəkət etdilər? Xatırladım ki, hətta 2021-ci ildə UNESCO söz vermişdi ki, həm Azərbaycana, həm də Ermənistana missiya göndərəcək, amma gəlib çıxmadılar. Bunu ona görə xatırlatdım ki, UNESCO-ya da Fransa, digər Avropa İttifaqı dövlətləri mane olur”-deyə Q.Hacıyev qeyd etdi.
İradə SARIYEVA
