Vətən müharibəsinin son günündə Naxçıvanda rus helikopteri, antiterrorun son günü Tərtərdə rus əsgərləri vuruldu - təsadüf, ya…
Prezident İlham Əliyev sentyabrın 20-də Qarabağda Rusiya sülhməramlı kontingentinin hərbi qulluqçularının faciəli şəkildə həlak olması ilə bağlı üzrxahlıq ifadə edib və dərin hüznlə başsağlığı verib.
Baş verənlərlə bağlı hərtərəfli araşdırma aparılacağı və bütün təqsirkarların layiqli cəzalarını alacağı vurğulanıb.
Qeyd olunub ki, bununla bağlı hər iki ölkənin baş prokurorluqları sıx əlaqədədir.
Azərbaycan Prezidenti, həmçinin, həlak olanların ailələrinə maddi yardım göstərilməsinə hazır olduğunu bildirib.
44 günlük müharibənin son günü Naxçıvanda Rusiyaya məxsus helikopter vuruldu. Həyata keçirilən antiterror tədbirinin sonunda isə Rusiya sülhməramlılarına atəş açılır. Təbiidir ki, hər iki hal Azərbaycanın əleyhinə işləyir. Bu təsadüfdür, yoxsa düşünülmüş şəkildə həyata keçirilən provokasiya?
Hərbi-siyasi ekspert, ehtiyatda olan polkovnik-letenant Elxan Şıxəliyev “Bakı-Xəbər”ə açıqlamasında bildirdi ki, belə hadisələr olanda həmin dəqiqə ehtimallar dövriyyəyə girər: “Bu sahəni, prosesin necə baş verməsini, əsgər səviyyəsində icrasını birbaşa həyata keçirməyin mümkün olub-olmadığını bildiyim üçün, rahatlıqla deyə bilərəm ki, bunu bizim tərəfdən birlik komandirimizin planlaması, əsgərə əmri göndərməsi mümkün deyil: “Təsadüfdür və məsələ ondan ibarətdir ki, qarşı tərəf - Rusiya sülhməramlılarının avtomobilləri elə sürətlə hərəkət edib ki, sahədəki hərbçilərimiz bunu təxmin etməyə bilərdilər. Təsadüf və bu məsələ üst - üstə düşdüyü üçün, bağlantıların qurulması qəbulediləndir. Əslində rus sülhməramlılarının avtomobilində olan heyət ərazidə baş verənlərdən məlumatlı olduğu üçün orada olmamalı idi. Çünki əvvəldən bilirdilər ki, antiterror təlimləri keçiriləcək. Ən azından qərargahlarda, öz mərkəzlərində olmalı idilər. Bir az da provokasiya etmiş hesab olunublar öz hərəkətləri ilə. Silahlı münaqişələr olan bölgələrdə üçüncü güclərin qüvvəsi olursa, belə hadisələr ola bilir. Təbii ki, hadisə rus sülhməramlılarına aid olduğu üçün ermənilər bunu bir az da daha çox bilərəkdən edilmiş kimi göstərməyə çalışacaqlar, tirajlayacaqlar. İnformasiya cəbhəsində bizə qarşı hiyləgər niyyətlərini istifadə etmək istəyəcəklər. Hətta antiterror tədbirləri başlamazdan əvvəl, üç il üç ayın hər günündə onlar sülhməramlıların arxasında gizlənirdilər, atəşkəsi pozurdular ki, bizimkilər cavab versin. Məqsəd Rusiya ilə Azərbaycan arasında olan siyasi münasibətlərin kəskinləşməsi idi. Bütün zamanlarda erməni separatçı rejimin niyyətləri bundan ibarət olub. Təsadüfdür və bunun da arxasındakı faktı hansı qüvvə özünə uyğun istifadə edəcəksə, müzakirələr onun üzərində gedəcək. Hüquq-mühafizə orqanlarının gəldikləri nəticəni gözləməliyik. Ancaq bizim bütün hərbçilərə mülki əhali ilə, mülki obyektlərlə, Rusiya sülhməramlıları ilə çox diqqətli davranmaları ilə bağlı göstərişlər olub. Həmçinin onu da vurğulamaq istəyirəm ki, beynəlxalq münasibətlərə təsiri olan bir məsələ olduğu üçün birlik komandiri vəzifəsindən azad edildi. Adətən belə işlərdə komandirlər də cəza çəkir. Cinayət işləri də bu istiqamətdə qaldırılacaq ki, təlimatlandırma öz əksini düzgün tapmayıb. Bu hərbçilərin, xüsusən komandirlərin qədərində belə şeylər olur. Qalibiyyətdə hər kəs özünü qalibiyyətə aid edir. Amma belə hal olanda günahkarlar həmin dəqiqə cəzalandırılmalıdır”.
Məhəmmədəli QƏRİBLİ
