Ermənilər Rusiyanı bunda da günahlandırdı - “Antiterroru öncədən bizə xəbər vermədiniz”...
Ermənistan tərəfi yenə də, hər zaman olduğu kimi, qarşı tərəfi ittiham edir. İndi də Ermənistan hakimiyyəti rəsmi olaraq bəyan edib ki, Rusiya Azərbaycanın Qarabağda apardığı lokal antiterror tədbirləri barədə qabaqcadan onları məlumatlandırmayıb: “Rusiya tərəfi Azərbaycanın “antiterror əməliyyatı” adı altında Dağlıq Qarabağda apardığı hərbi əməliyyatlar barədə Ermənistana məlumat verməyib”.
O da qeyd edilib ki, Rusiya sülhməramlı kontingentinin komandanlığı və Türkiyə-Rusiya monitorinq mərkəzinin rəhbərliyi həyata keçirilən tədbirlər barədə məlumatlandırılıb.
Məgər, antiterror tədbirlərinin keçirilməsi ilə bağlı Rusiya Ermənistana məlumat verməli idi?
- “Rusiya bununla əlaqədar Ermənistanı məlumatlandırmağa borclu deyildi”
Məsələ ilə bağlı “Bakı-Xəbər”ə açıqlama verən hərbi ekspert Ramil Məmmədlinin fikrincə, Ermənistan tərəfinin belə bir pretenziya ilə çıxış etməsinin heç bir siyasi və hüquqi əsası yoxdur: “Bu tamamilə əsassız iraddır. Əvvəla, Qarabağ Azərbaycan ərazisidir və orada yaşayan erməni sakinlər ölkəmizin vətəndaşlarıdır. Azərbaycanın öz ərazisində antiterror tədbirləri həyata keçirməsi bizim daxili işimizdir. Biz buna görə kiməsə hesabat verməyə borclu deyilik. O cümlədən, Rusiya bununla əlaqədar Ermənistanı məlumatlandırmağa borclu deyildi. Ən azından ona görə ki, Qarabağ Ermənistanın yox, Azərbaycanın ərazisidir. Azərbaycan tərəfi Ağdamda yerləşən Rusiya-Türkiyə Monitorinq Mərkəzini ona görə məlumatlandırıb ki, ermənilərin yaşadığı ərazilərdə sülhməramlılar fəaliyyət göstərir. Qarabağda Rusiya sülhməramlılarının 30 müşahidə məntəqəsi var. Onların vəzifəsi mülki şəxsləri qorumaq olub. Bu səbəbdən lokal antiterror tədbirləri barədə qabaqcadan sülhməramlılar məlumatlandırılıb. Mülki şəxslərə zərər dəyməsin deyə koordinasiyalı fəaliyyət ortaya qoyulub. Məlum olduğu kimi, dəqiq silahlardan istifadə edilərək yalnız hərbi infrastruktur hədəfə alınıb. Ermənistan hakimiyyəti özünü daxili tənqidlərdən qorumaqdan ötrü belə məlumatları yayır. Əslində bu, Rusiyaya yönəlik tənqidlərin tərkib hissəsiidir. Yəni görünən odur ki, Ermənistan hakimiyyəti bundan Rusiyaya qarşı siyasi məqsədlər üçün istifadə edir. Bundansa, yaxşı olardı ki, indiyə qədər Ermənistan Qarabağdakı silahlı qüvvələrini çıxaraydı. Bəlkə də Ermənistan bunu etsəydi, vəziyyət bu həddə gəlib çatmazdı”.
Vidadi ORDAHALLI
