Ermənistan xarici işlər naziri Ararat Mirzoyan Avropa İttifaqının xarici işlər və təhlükəsizlik siyasəti üzrə ali nümayəndəsi Cozep Borrell ilə görüşüb.
Azərbaycanın Qarabağda həyata keçirdiyi lokal antiterror tədbirlərinə başqa don geyindirən Mirzoyan qeyd edib ki, Azərbaycanın həm hərəkətləri, həm də rəsmi bəyanatları açıq şəkildə Qarabağda etnik təmizləmə aparmaq niyyətindən xəbər verir və beynəlxalq tərəfdaşlar, o cümlədən Aİ tərəfindən təcili addımların atılmasının vacibliyini vurğulayıb.
Tərəflər Azərbaycanın addımları ilə bağlı BMT Təhlükəsizlik Şurasının sentyabrın 21-nə təyin edilmiş iclasına toxunublar.
Çox maraqlıdır, qanunsuz silahlıların məhvinə “etnik təmizləmə” adını qoyanlarla gələcəkdə sülh sazişini müzakirə etmək olarmı?
Müstəqil siyasətçi Bədrəddin Quliyev “Bakı-Xəbər”ə açıqlamasında bildirdi ki, həyata keçirilən uğurlu antiterror tədbirlərindən sonra bunlar dünyada özlərinə uyğun təbliğat aparmağa çalışacaqlar: “Josep Barellə görüşdə yenə öz xislətlərini ortaya qoyurlar. Bütün dünya Qarabağı Azərbaycan ərazisi kimi tanıyır. Biz də həmin ərazidə antiterror tədbirləri görürük. Suverenliyi bərpa etməklə etnik təmizləmə arasında fərq çoxdur. Sadəcə, Avropa İttifaqı da ermənilərin dostu olan Fransanın dəstəyi ilə ermənilərə açıq dəstək ifadə edir. Hətta bizi sanksiya ilə belə hədələyir. Azərbaycan ordusu bütün dünyaya örnək göstərdi ki, antiterror tədbirlərini necə həyata keçirmək olar. Mülki əhali və obyektlər nişan alınmadı. Biz 100 ildir ki, erməni terrorizmi ilə mübarizə aparırıq. Azərbaycan yenə də öz ehtiyatını əldən verməməlidir. 1919-cu ildə də erməni icması üzərinə 24 maddədən ibarət öhdəlik götürdü. Onda da ağ bayraq qaldırmışdılar. Bir boşluq görən kimi yenə fəallaşırlar. Kimin nə deməsindən asılı olmayaraq, biz BMT-nin nizamnanəsinə uyğun addım atmışıq. Belə hallar çox olacaq ki, dinc ermənilərin reinteqrasiyasını pozsunlar. Azərbaycanın mövqeyinə hər kəs hörmətlə yanaşacaq. Onlar bizimlə sülh sazişini öz xoşları ilə deyil, reallıqlarla barışdıqları üçün imzalamalı olacaqlar. Çünki başqa çıxış yolları yoxdur. Qarabağdakı ermənilər anlayır ki, Ermənistan onlardan tam əlini üzüb. Son hadisələrdə də Ermənistan qorxusundan səsini çıxarmadı. Artıq Qarabağdakı ermənilərin problemləri ilə biz məşğul olacağıq”.
Məhəmmədəli QƏRİBLİ
