Prezident İlham Əliyev xalqa müraciətində bildirib ki, antiterror tədbirləri yüksək peşəkarlıqla, dəqiqliklə elə aparıldı ki, mülki əhali zərbə altına düşmədi, mülki infrastruktura zərər vurulmadı:
“Ancaq düşmən mövqeləri, onların silahları, texnikaları məhv edildi.
Bölgəmizdə yeni vəziyyətin yaranmasının labüd olduğunu diqqətə çatdıran dövlət başçısı qeyd edib: “Çünki kriminal xunta rejimi təslim olandan sonra artıq bu gərginlik mənbəyi, bu zəhər yuvası tarixdə qalır və Qarabağda yaşayan erməni əhalisi də nəhayət rahat nəfəs ala bilər”.
Prezident deyib ki, bu gün Qarabağda yaşayan sadə insanlar üçün yeni tarixi bir şans yaradılıb: “O şansı əldən verməsinlər. Biz buna hazırıq və Azərbaycan xalqı bilir. Əminəm, erməni xalqı da bilir ki, mənim sözüm sözdür. Biz bunu təklif edirik və ümid edirəm ki, bizim təklifimiz qəbul ediləcək. Çünki bu, məntiqə, tarixi ədalətə, beynəlxalq hüquqa və gələcək inkişafa əsaslanan və gələcək inkişafa hesablanan təklifdir”.
Antiterrordan sonra bölgəmizdəki yeni vəziyyətin konturları ilə bağlı Prezidentin bəyanatının arxasında hansı məqamlar durur?
Politoloq Əhəd Məmmədli “Bakı-Xəbər”ə açıqlamasında bildirdi ki, burda ermənilərin Azərbaycana reinteqrasiyasına, Azərbaycan qanunları çərçivəsində öz həyatlarına davam etməsinə dair mesajlar verilir: “Azərbaycanın 19 sentyabrda başladığı və 24 saatdan az davam edən lokal antiterror tədbirləri nəticəsində Qarabağdakı separatçılar zərərsiz hala gətirildi. Beləliklə, Qarabağda yaşayan erməni əhalisi bu separatçılardan qurtuldu. Üç ildir ki, Azərbaycan səbrlə bu qeyri-qanuni erməni birləşmələrinin Qarabağdan çıxmasını gözləyirdi. Lakin onlar bunu etmədiyi üçün Azərbaycan lazım olanı etdi.
Azərbaycan lokal antiterror tədbirləri zamanı heç bir mülki şəxsə və infrastruktura zərər vermədi. Bu qədər dəqiqliklə tədbir keçirən başqa bir ordu yoxdur. Azərbaycan İkinci Qarabağ müharibəsindən sonra ikinci zəfərini də qazandı. Qarabağ Azərbaycan torpağıdır və orada yaşayan mülki erməni əhalisi Azərbaycan vətəndaşlarıdır. Bu gün (21 sentyabr-red.) Yevlaxda keçirilən görüşdə ümid edirik ki, müsbət nəticələr olar. Qarabağda yaşayan ermənilər Azərbaycanda sülh və əminamanlıq içində yaşaya bilər. Prezidentin etdiyi müraciətin məzmununda diqqət çəkən bir məqam var ki, yenə heç bir statusdan söz gedə bilməz. Necə Azərbaycanın digər əhalisi, eynən də bunlar yaşayacaq. Azərbaycan dövlətinin Konstitusiyası və unitar quruluşu çərçivəsində yaşamalıdırlar. Bu, təbii ki, terrorçulara, Azərbaycan əsgərinə silah atanlara aid deyil. Verilən məlumatlara görə, bizim təhlükəsizlik xidmətində siyahılar var. Amma sivil əhalinin orda yaşamasına imkanlar verilir. Buna ermənilərin razılaşıb-razılaşmayacağı bu gün Yevlaxda gedən danışıqlardan və sonrakı hadisələrdən məlum olacaq. Mən düşünürəm ki, tərksilah olmağa razılıq veriblərsə, gec - tez bu baş verməlidir. Dövlət qurumları həmin ərazilərə daxil olmalı, Azərbaycan Bayrağı dalğalanmalıdır. Qondarma rejim tam dəfn edilməlidir”.
Məhəmmədəli QƏRİBLİ
