“Bu gün Qarabağda yaşayan sadə insanlar üçün yeni tarixi bir şans yaradılıb. O şansı əldən verməsinlər”. Bu sözləri Azərbaycan Prezidenti İlham Əliyev sentyabrın 20-də xalqa müraciətində bildirib.
Dövlət başçısı qeyd edib ki, biz buna hazırıq və Azərbaycan xalqı bilir: "Əminəm, erməni xalqı da bilir ki, mənim sözüm sözdür. Biz bunu təklif edirik və ümid edirəm ki, bizim təklifimiz qəbul ediləcək. Çünki bu, məntiqə, tarixi ədalətə, beynəlxalq hüquqa və gələcək inkişafa əsaslanan və gələcək inkişafa hesablanan təklifdir".
“Hər kəsin dili, dini, mədəniyyəti qorunub saxlanılacaq, belə bir gələcək erməni sakinlərinə də təklif edilir, Azərbaycanda yaşamaq istəyənlər üçün hər hansı bir problem olmayacaq”
Məsələ barədə fikir bildirən millət vəkili Aydın Mirzəzadə “Bakı-Xəbər”ə açıqlamasında qeyd etdi ki, ölkə başçısının 20 sentyabr tarixində xalqa müraciəti tarixi çıxış idi. Prezident İ.Əliyev xalqa müraciəti zamanı həm keçmişə toxundu, həm də gedən proseslərə düzgün qiymət verdi. Eyni zamanda, cəmiyyətin qarşısında duran çox ciddi problemlərə də toxundu. Həmin problemlərdən biri vaxtilə separatçı rejimin nəzarəti altında ərazidə yaşayan erməni sakinlərinin Azərbaycan cəmiyyətinə reinteqrasiyasıdır: “Söhbət yenidən inteqrasiyadan gedir. Məlumdur ki, həmin sakinlər vaxtilə Azərbaycan cəmiyyətinin bir hissəsi olub. Azərbaycan vətəndaşı statusunu daşıyıblar. Ancaq sonradan xaricin köməkliyi ilə torpaqlarımızı işğal etməklə həmin əhalini kənarda qoydular. Bir günlük antiterror əməliyyatı ilə separatçı rejim məğlub olundu. Silah-sursat Azərbaycan tərəfinə təhvil verilir. Beləliklə, ölkəmiz öz suveren hüququnu bərpa edir. Sakinlərə Azərbaycan dövləti tərkibində bütün vətəndaşlara edilən yüksək qayğı, diqqət təklif edilir. Danılmaz faktdır ki, Azərbaycanda təhsil, səhiyyə, işlə təminat sahəsində problem yoxdur. Həmçinin, pensiya məbləğinin yüksək olması, təhlükəsizlik sarıdan vəziyyət göz önündədir. Kriminal durumla bağlı çətinlik yaşanmır. Danılmaz faktdır ki, Azərbaycan dövlətində qanunlar qorunur. Belə bir cəmiyyətdə kim yaşamaq istəməz? Onlar ermənilərin çirkin oyun iştirakçısına çevrilməyəcək”.
Millət vəkilinin sözlərinə görə, Qarabağda yaşayan sadə insanlar Azərbaycan vətəndaşlarının malik olduqları hüquqlardan istifadə edəcəklər: “Həmin ərazilərdə klinikalar, məktəblər tikiləcək, müasir yollar salınacaq, müasir standartlara cavab verən evlər tikiləcək. Biznesin inkişafı üçün bütün şərait yaradılacaq. Ümumiyyətlə, hər kəsin dili, dini, mədəniyyəti qorunub saxlanılacaq. Bütün bunlar Azərbaycanda təmin edilir. Belə bir gələcək erməni sakinlərinə də təklif edilir. Azərbaycanda yaşamaq istəyənlər üçün hər hansı bir problem olmayacaq”.
Günel CƏLİLOVA
