Erməni mediası məlumat yayıb ki, Azərbaycan hakimiyyəti siyahını “Artsax” hakimiyyətinə təqdim edərək, orada adı çəkilən şəxslərin ekstradisiyasını tələb edib. “Hraparak” qəzeti yazır ki, siyahıda dövlət və hərbi xadimlərin adları var.
Ermənistan Silahlı Qüvvələrindəki mənbənin nəşrə verdiyi məlumata görə, onlar Azərbaycanın hansı siyahını tərtib etdiyini bilirlər. “Bura 18 yaşdan 75 yaşa qədər kişi adları daxildir, bu siyahıda 30 minə yaxın Artsax kişisi var. Azərbaycan Artsaxın bütün kişi sakinlərini terrorçu kimi təqdim edib və bu siyahıya əlavə edib. Sakinlərlə bağlı bütün məlumatların azərbaycanlılara necə çatdığını başa düşmək qalır. Nə danışdığımı başa düşürsən”.
Azərbaycan Prezidenti İlham Əliyev sentyabrın 20-də xalqa müraciətində deyib ki, bütün haqsızlıqlara baxmayaraq, bütün kriminal Ermənistan rejimi tərəfindən törədilmiş cinayətlərə baxmayaraq, biz erməni xalqını bu cinayətlərdə heç vaxt günahlandırmamışıq.
Dövlət başçısı qeyd edib: “Biz Xocalı soyqırımında, şəhərlərimizin, kəndlərimizin, dağıdılmasında, qəbirlərin qazılmasında erməni xalqını günahlandırmamışıq. Biz kriminal rejimin ünsürlərini, başda duranları ittiham etmişik. Biz onları məsuliyyətə cəlb edirik və edəcəyik. Bəziləri artıq öz layiqli cəzasını alıb, bəziləri də alacaqlar”.
Göründüyü kimi, Prezident bunların dediyi kimi uctantuma 18-75 yaşında kişilərin hamısının terrorist elan ediləcəyini demir. Bu, reinteqrasiyanın qarşısını almaq üçün ortaya atılan növbəti erməni təxribatı ola bilərmi?
Təhlükəsizlik məsələləri üzrə ekspert Elşən Həsənov “Bakı-Xəbər”ə açıqlamasında bildirdi ki, erməni tərəfin bu barədə verdiyi açıqlamalar cəfəngiyat və sərsəmləmələrdən başqa bir şey deyil: “İstər Azərbaycan tərəfinin rəsmi şəxslərinin açıqlamalarında, istərsə də Azərbaycan Prezidentinin son müraciətində qeyd edildiyi kimi, söhbət hərbi cinayətlərdə iştirakı ehtimal olunan və qondarma qurumun qondarma strukturlarında və rəhbərliyində təmsil olunan şəxslərin siyahısından gedir və bu şəxslərin siyahısı da qarşı tərəfə artıq təqdim edilib. Yəni Azərbaycan tərəfinin istəyi Azərbaycana qarşı hərbi cinayətlərdə birbaşa iştirakı şübhə doğurmayan şəxslərin zərərsizləşdirilməsidir. Təqsiri, cinayətlərdə iştirakı sübut və təsdiq olunmayan mülki şəxslərin həbs olunması barədə məlumatlar isə erməni əsilli Azərbaycan vətəndaşlarının reinteqrasiya prosesinə əngəl törətmək cəhdlərindən savayı bir şey deyil. Azərbaycan tərəfinin belə bir istəyinin olması və belə bir sənədin mövcudluğunun özü belə absurd və cəfəngiyatdır.
Yazının da dəsti-xəttindən göründüyü kimi, məqsəd, hər dəfə olduğu kimi, azərbaycanlıları bu dəfə də genosid – soyqırım törətməkdə ittiham etməkdir. Ən gülməlisi də budur ki, əgər ölkə ərazisində hər hansı bir türmə - islah müəssisəsi inşa edilərsə, bu yalnız erməniləri məhkum etmək və onları soyqırıma məruz qoymaq üçün vasitə sayılmalıdır? Göründüyü kimi, qarşı tərəfin nəsə uydurmaq fantaziyaları tükəndiyindən ortaya ciddi arqument qoymaq imkanları da tükənib.
Bugünə (21 sentyabr-red.) nəzərdə tutulmuş Yevlax görüşündə, yəqin ki, erməni əhalisinə sırınan, ideoloji təxribatın bir hissəsi olan bu səpkili yalanların əsl mahiyyəti açıqlanacaq. Düşündüyüm qədər, ilkin olaraq atılacaq bu addım çox mətləblərə aydınlıq gətirəcək”.
Məhəmmədəli QƏRİBLİ
