“Prezident Administrasiyası tərəfindən göndərilən dəvətdən, əfsus ki, separatçı rejim tərəfindən imtina edilirdi”. Bunu Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev Xarici İşlər Nazirliyində Bakıda akkreditə olunmuş diplomatik korpusun nümayəndələri üçün brifinqdə deyib.
O qeyd edib ki, Qarabağın erməni sakinlərinin sosial-iqtisadi inteqrasiyası Azərbaycanın daxili məsələsidir. Prezidentin köməkçisi diqqətə çatdırıb ki, Qarabağın erməni sakinlərinin geniş formada sosial-iqtisadi inteqrasiyası üçün plan hazırdır və bu, aidiyyəti qurumlarla hazırlanıb.
“Bu, Azərbaycan dövlətinin də, Qarabağda yaşayan sadə erməni əhalisinin də maraqlarına cavab verir”
Qarabağın erməni sakinlərinin sosial-iqtisadi inteqrasiyası üçün planın hazır olmasının böyük əhəmiyyətini vurğulayan “Alyans” strateji araşdırmalar mərkəzinin rəhbəri Abutalıb Səmədov “Bakı-Xəbər”ə şərhində bildirdi ki, bunun tezliklə icrası vacibdir, çünki Qarabağ iqtisadiyyatı demək olar separatçı xunta tərəfindən tamamilə məhv edilib, o yenidən dirçəldilməlidir. ”Bu gün (21 sentyabr) Yevlaxda keçiriləcək görüşdə müzakirə olunacaq əsas məsələ Qarabağ ermənilərinin Azərbaycana reinteqrasiyasıdır. Eyni zamanda onların hüquq və təhlükəsizliyinin təminatı məsələləri də müzakirə olunacaq. Ancaq ilk növbədə əsas məsələ, təbiidir ki, ermənilərin reinteqrasiya məsələsi olacaq. Məlumdur ki, Qarabağ iqtisadiyyatı son 35 ildə tamamilə çöküb. BMT Təhlükəsizlik Şurasında keçirilən müzakirələrdə Ermənistanın xarici işlər naziri Ararat Mirzoyan sıxılmadan bəyan etdi ki, Qarabağın ərzaq tələbatının 90 faizi Ermənistan vasitəsilə ödənilir. Yəni demək olar ki, Qarabağda istehlak olunan ərzağın hamısı kənardan gəlib, Ermənistandan gəlib. Bu, Qarabağ iqtisadiyyatının hansı vəziyyətə salındığının bariz göstəricisidir” - deyə bildirən A.Səmədovun sözlərinə görə, 1988-ci ildə separatizm hərəkatı başlamazdan əvvəl Qarabağ öz tələbatının 60 faizini özü ödəyirdi. A.Səmədovun sözlərinə görə, söhbət təkcə ərzaq məhsullarından getmir. “Qarabağ əhalisinin tələbatının 60 faizi Qarabağ tərəfindən ödənilirdi. Oradakı sənaye və kənd təsərrüfatı müəssisələrinin istehsal etdiyi məhsullarla qarşılanırdı. İdxal bütövlükdə 40 faiz idi. Bu 40 faizin içərisində ərzaq məhsulları çox cüzi hissəni təşkil edirdi. Ermənistandan idxal olunan məhsullar 1, 5 faiz idi. Üstəlik, burada həm kənd təsərrüfatı, həm sənaye, həm ərzaq məhsulları 1,5 faizin içərisinə daxil idi. Son 35 ildə Qarabağ elə zəlil günə salınıb ki, təkcə ərzaq məhsullarının 90 faizini Ermənistandan almaq məcburiyyətində olub. Təbiidir ki, bu vəziyyət düzəlməlidir. Azərbaycan Prezidenti də elan etdi ki, sosial proqramlar həyata keçiriləcək, artıq sosial-iqtisadi proqramlar hazırlanıb və Qarabağ iqtisadiyyatı dirçəldilməlidir. Üstəlik, nəzərə almaq lazımdır ki, 2023-cü ildə Ermənistan Qarabağa 370 milyon dollar "dövlətlərarası" kredit ayırıb və bunu “əlverişli şərtlərlə” ayırdığını deyir. Əvvəlki illərdə də təqribən bu qədər kreditlər ayrılıb. Bundan sonra aydındır ki, Ermənistan belə bir addım ata bilməz. Artıq Azərbaycan Qarabağın iqtisadiyyatının dirçəldilməsi, Qarabağ əhalisinin sosial-iqtisadi tələbatının icra olunmasını təmin etməlidir. Bunun üçün də artıq Hikmət Hacıyevin də elan etdiyi kimi, müxtəlif proqramlar və reinteqrasiya planı hazırlanıb. Bu iş Qarabağ əhalisinin Azərbaycana reinteqrasiya məsələsi qısa müddətdə reallaşmalıdır. Artıq 2024-cü ildən başlayaraq Qarabağ iqtisadiyyatı tamamilə yeni şərtlərlə fəaliyyətə başlamalıdır. Qarabağ əhalisinin təminatı şərtləri tamamilə dəyişdirilməlidir. Ona görə qısa müddətdə çox böyük iş görülməsinə ehtiyac var. Erməni əhalisini girov götürən bir qrup cinayətkar dəstə bu prosesə çox ciddi zərbə vurdu, reinteqrasiya prosesi ləngidildi, uzun müddət “müstəqilliyə” ümid etdilər və dünyada baş verən dəyişiklikləri anlamaq istəmədilər. Son nəticədə Azərbaycan Ordusu bu reallıqları erməni separatçılarına başa salmaq məcburiyyətində qaldı. Böyük qələbə qazanılıb və sürətlə bu proses davam etdirilməlidir. Bu, Azərbaycan dövlətinin də, Qarabağda yaşayan sadə erməni əhalisinin də maraqlarına cavab verir” - deyə A.Səmədov vurğuladı.
İradə SARIYEVA
