Azərbaycan Xarici İşlər Nazirliyində brifinq keçirilib. Brifinqdə Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev, Azərbaycan Prezidentinin xüsusi tapşırıqlar üzrə xüsusi nümayəndəsi Elçin Əmirbəyov və xarici işlər nazirinin müavini Fariz Rzayev Azərbaycanda akkreditə olunmuş diplomatik korpusun nümayəndələrini Qarabağda keçirilən antiterror əməliyyatı barədə məlumatlandırıb.
“Artan eskalasiya bizi çox narahat edirdi. Azərbaycan lokal antiterror tədbirləri keçirməyə məcbur oldu” -deyən XİN müavini Fariz Rzayev "Antiterror tədbirləri hava qüvvələri tərəfindən həyata keçirildi", -deyə əlavə edib.
Brifinqdə çıxış edən Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev isə bildirib ki, Azərbaycan sabah Qarabağın erməni əhalisi ilə danışıqlara hazırdır.
“Biz onların humanitar ehtiyaclarını dinləməyə hazırıq”, - deyən H.Hacıyev "Bir daha təkrar edirik ki, Azərbaycanın məqsədi Qarabağın erməni sakinlərinin sülh şəklində inteqrasiyasıdır və biz Ermənistan-Azərbaycan arasında münasibətlərin normallaşdırılmasının tərəfdarıyıq" – deyə bildirib.
H.Hacıyev onu da vurğulayıb ki, sülh sazişi Azərbaycanın təşəbbüsü olub. “Sülh sazişinin mətni hazırlanaraq qarşı tərəfə təqdim edildi. Müzakirələrin harda edilməsi yox, nə müzakirə edildiyi önəmlidir. Sülh sazişi ilə bağlı 70% məsələ razılaşdırılıb ”,- deyə PA rəsmisi bildirib.
Azərbaycanın keçirdiyi antiterror tədbirlərində bütün hədəflərə selektiv və diqqətlə, ehtiyatla və həssaslıqla yanaşıldığını, heç bir mülki obyektə zərbələr endirilmədiyini bildirən
Prezidentin köməkçisi qeyd edib ki, bu antiterror tədbirləri öncəsi Qarabağ sakinlərinin telefonlarına göndərilmiş SMS-lər vasitəsilə onlara xəbərdarlıq ediliridi ki, hərbi obyektlərdən uzaq dursunlar.
Prezidentin köməkçisi diqqətə çatdırıb ki, Qarabağın erməni sakinlərinin geniş formada sosial-iqtisadi inteqrasiyası üçün plan hazırdır və bu müvafiq aidiyyət qurumlarla hazırlanıb.
Hikmət Hacıyev onu da diqqətə çatdırıb ki, BMT Təhlükəsizlik Şurasının Qarabağla bağlı iclasının keçirilməsinə ehtiyac yoxdur.
O qeyd edib ki, bu cür mühüm məsələlər yerlərdə lokal səviyyədə həll tələb edir: ”Belə bir iclas çağırılarsa, heç də xeyirli və səmərəli olmayacaq. Biz istəməzdik ki, bu kövrək vəziyyət daha da pisləşsin. Yəni bu iclasın keçirilməsinə ehtiyac yoxdur. Olarsa, Azərbaycan öz legitim narahatlığını ifadə etməyə hazırdır”.
Ermənistanın nəhayət Azərbaycana qarşı ərazi iddiasından əl çəkməli olduğunu deyən H.Hacıyev “Həmçinin Azərbaycan ərazisində Ermənistanın hərbi qüvvələri qalmamalıdır. Antiterror tədbirləri onu göstərdi ki, Ermənistanın hərbi qüvvələri Azərbaycan ərazisində qalmaqda idi. Bütün bunların pis nəticəsidir ki, Şuşa şəhəri dünən ağır artilleriya ilə bombalanıb və bir nəfər mülki vətəndaş həlak olub”,- deyə bildirib.
O qeyd edib ki, Ermənistanda baş verən son proseslər bu ölkənin Suriyaya bənzədiyini deməyə əsas verir.
"Ermənistanın davranışları regionumuz üçün faydalı deyil. Təəssüflər olsun tərəflər də vardır ki, onlar özlərinin malik olduqları problemləri regionumuza ixrac etmək istəyirlər. Cənubi Qafqaz regionunun bu məsələlərə ehtiyacı yoxdur. Azərbaycan 3+3 platformasının tərəfdarı və təşəbbüskarıdır",- deyə H.Hacıyev əlavə edib.
PA rəsmisi bildirib ki, Ermənistan Zəngəzur dəhlizinin açılmasına problemlər yaratmaqda davam edir.
O qeyd edib ki, son dövrlər Ermənistan-Azərbaycan sülh müqaviləsi, sərhədlərin delimitasiyası, nəqliyyat xətlərinin açılması üzrə tamamilə qeyri-konstruktiv mühit yaranıb.
“Ermənistan hər bir vəchlə Zəngəzur dəhlizinin açılmasına problemlər yaratmaqda davam edir”,- deyə H.Hacıyev əlavə edib.
Azərbaycan Prezidentinin xüsusi tapşırıqlar üzrə xüsusi nümayəndəsi Elçin Əmirbəyov isə bildirib ki, Azərbaycan torpaqlarında qeyri-qanuni erməni silahlı birləşmələrinin olması məsələsi effektiv şəkildə həll edildi.
Avropa Parlamenti tərəfindən qərəzli qiymətləndirmələrə toxunan E.Əmirbəyov
“Avropa Parlamentinin Azərbaycanla Ermənistan arasında sülhə töhfə verəcəyinə inanmıram. Burada təfərrüatlara varmaq istəmirəm. O baxımdan, bu bəyanatları ciddi qəbul etməməyə çağırıram”,- deyə bildirib.
Tahir TAĞIYEV
