Qarabağda daha 11 soydaşımızın həlak olması Azərbaycanın səbrini daşıran son damla oldu. Nəticədə barəsində çoxdan söz-söhbət gəzən antiterror əməliyyatlarına start verildi. Bu barədə danışmazdan öncə xatırladaq ki, soydaşlarımızdan altısı Xocavənddə eyni istiqamətdə mina partlaması nəticəsində həyatını itirib.
Azərbaycan mina partlayışını terror aktı adlandırıb və bəyan edib ki, hadisə qanunsuz erməni silahlı birləşmələrinin əraziyə mina yerləşdirməsi nəticəsində baş verib. Bunun ardınca Azərbaycan Müdafiə Nazirliyi erməni silahlılarının ordumuzun mövqelərini sistemli atəşə tutduğunu da bildirib. Rəsmi Bakı bildirir ki, başlanan antiterror əməliyyatı zamanı Qarabağda mülki əhali və mülki infrastruktur hədəfə alınmır. Bu fonda nazirlik mülki erməni əhalini Ermənistanın oradakı hərbi birləşmələrinin yerləşdirildiyi infrastruktur ərazilərdən uzaq olmağa çağırıb. Müdafiə Nazirliyi bildirib ki, Qarabağın rus sülhməramlıların məsuliyyət zonasında apardığı əməliyyatlar nəticəsində Ermənistan silahlı qüvvələrinin 60-dan çox döyüş mövqeyi Azərbaycan ordusunun nəzarətinə keçib. Əməliyyatlar zamanı Qarabağdakı separatçılar arasında 30-dan çox terrorçunun öldüyü, onlarla yaralanın olduğu bildirilir. Rusiya Müdafiə Nazirliyi bildirib ki, sentyabrın 19-da artıq 469 nəfəri Rusiya sülhməramlı kontingentinin olduğu yerə təxliyə edilib. Azərbaycan bildirir ki, əhalinin təhlükəli ərazidən təxliyəsini təmin etmək üçün Laçın yolu üzərində və digər istiqamətlərdə humanitar dəhliz və qəbul məntəqələri yaradılıb. Baş verənlər fonunda Qarabağdakı separatçı rejim Azərbaycanı atəşkəsə əməl etməyə və danışıq masası arxasına oturmağa çağırıb. Halbuki, bundan əvvəl məhz həmin rejim Bakının danışıqlar təklifini rədd edirdi. Rəsmi Bakı bu rejimin çağırışına cavab olaraq bildirib ki, antiterror tədbirlərinin dayandırılması üçün qanunsuz erməni silahlı dəstələri ağ bayraq qaldırmalı, bütün silahlar təhvil verilməli, qanunsuz rejim özünü buraxmalıdır. Əks təqdirdə, antiterror tədbirləri sona qədər davam etdiriləcək. Azərbaycan reinteqrasiya məsələlərini müzakirə etmək üçün ölkənin Qarabağ bölgəsində yaşayan ermənilərin nümayəndələri ilə Yevlaxda görüşə hazır olduğunu bildirib. Azərbaycan onu da bildirir ki, Ermənistan Qarabağdan hərbi birləşmələrini çıxarmayıb və bu da hərbi vəziyyəti gərginləşdirir. Baş verənlərlə bağlı Ermənistanın baş naziri Nikol Paşinyan Təhlükəsizlik Şurasınıın iclasını çağırıb. İclasda Azərbaycan tərəfinin Qarabağda başladığı antitterror əməliyyatları müzakirə olunub. Nikol Paşinyan Ermənistanın Azərbaycanla döyüşə girməyəcəyini bildirir. Bu da, əslində, Qarabağdakı ermənilərə verilən konkret siqnaldır. Onlar Azərbaycanın şərtləri ilə razılaşmalıdırlar. Paşinyanın çıxışından sonra İrəvanda hökumət evinin qarşısında etirazlar başlayıb. Etirazçılar Ermənistan hakimiyyətindən Qarabağdakı əməliyyatlara müdaxilə etməyi tələb ediblər. Amma Paşinyan bunun ölkəsinin sonu olacağını yaxşı bilir.
Ermənilər dünyadan da gözlədikləri reaksiyanı görməyiblər. ABŞ-ın dövlət katibi Entoni Blinken Azərbaycanın Qarabağdakı hərbi tədbirlərindən sadəcə “dərin narahatlıq” keçirdiklərini bildirib: “Qarabağda Azərbaycan tərəfinin başlatdığı hərbi tədbirlərdən dərin narahatlıq keçirir və rəsmi Bakını bunu dərhal dayandırmağa çağırırıq. Bu cür addımlar Qarabağdakı humanitar vəziyyəti daha da pisləşdirməklə yanaşı, sülh imkanlarını da azaldır. Daha əvvəl də fikrimizi Azərbaycana açıq şəkildə çatdıraraq, ziddiyyətlərin güc yolu ilə həllinin qəbuledilməz olduğunu bildirmişik”. Türkiyə Xarici İşlər Nazirliyi Azərbaycanın Qarabağda başlatdığı hərbi tədbirlərlə bağlı yaydığı məlumatda rəsmi Bakı və İrəvan arasında nəticəyə yönəlik danışıqların regionda sülh, təhlükəsizlik, rifah və davamlı sabitlik üçün yeganə yol olduğunu bildirib: “Azərbaycanın Qarabağ bölgəsində olan qeyri-qanuni erməni silahlı ünsürlərinin uzun müddətdir Azərbaycan ordusuna və hüquq mühafizə orqanları əməkdaşlarına qarşı davam edən silahlı hücumları və təxribatları Azərbaycanı bu gün antiterror əməliyyatı başlatmağa məcbur edib”. Ankara Azərbaycanın Qarabağda başlatdığı hərbi tədbirləri rəsmi Bakının haqlı tələblərinin yerinə yetirilməməsi ilə izah edib. İranın Xarici İşlər Nazirliyi də Qarabağda baş verənlərdən narahat olduqlarını deyib. Rəsmi Tehran tərəfləri üçtərəfli atəşkəs razılaşmasının şərtlərinə əməl etməyə və məsələni dialoq yolu ilə həll etməyə çağırıb. Avropa İttifaqı Qarabağda baş verənlərdən narahatlığını ifadə edib. Qurumun xarici siyasət üzrə rəsmisi Josep Borrell insan itkisindən təəssüfləndiyini deyib: “Bakı və Qarabağ erməniləri arasında təcili şəkildə dialoqun qurulmasına ehtiyac var. Hərbi eskalasiya yerli əhalinin məcburi köçürülməsi üçün istifadə edilməməlidir”. Fransa Xarici İşlər Nazirliyi Azərbaycanın Qarabağda keçirdiyi “hərbi əməliyyatları bərpa etməsini” pisləyib. Rusiya Xarici İşlər Nazirliyinin sözçüsü Mariya Zaxarova Ermənistan və Azərbaycanı hərbi addımları dayandırmağa və məsələnin siyasi-diplomatik yolla həll etməyə çağırıb: “Qarabağ probleminin sülh yolu ilə həllinə dair bütün addımlar Rusiya, Azərbaycan və Ermənistan liderlərinin imzaladıqları üçtərəfli bəyanatda göstərilib. Ermənistan-Azərbaycan sülh razılaşması iki ölkə arasında maraqlar balansını təmin etməklə davamlı və uzunmüddətli sülhə zəmin yaratmalıdır. Buna kağız üzərində razılaşdırılan bütün yol xəritələrini yerinə yetirməklə nail olmaq mümkündür”. Azərbaycan Xarici İşlər Nazirliyi bütün açıqlamalara müvafiq cavablar verib. Amma dünyanın reaksiyası ermənilərin gözlədiyi kimi deyil. Bu da onu göstərir ki, Qarabağdakı separatçı rejim Azərbaycanın şərtlərini təcili şəkildə yerinə yetriməlidir. Əks halda əməliyyatlar yekun məqsədinə kimi davam edəcək.
Nahid SALAYEV
