Avropa Şurasının Baş katibi Mariya Peyçinoviç Buriç bəyanat yayaraq Azərbaycanı hərbi əməliyyatları dərhal dayandırmağa çağırıb:
“BMT Baş Assambleyasında müzakirələr çərçivəsində Azərbaycanın xarici işlər naziri ilə görüşdə Qarabağ regionu ətrafında hərbi eskalasiya ilə bağlı xəbərlərdən ciddi narahatlığımı bildirdim. Təəssüflə bildirdim ki, onsuz da regionda kəskin humanitar böhrandan əziyyət çəkən dinc sakinlər növbəti dəfə gücdən istifadənin ağır nəticələrini yaşayırlar. Bu da qəbuledilməzdir. Və bununla barışa bilməzsən. Mən Azərbaycanı hərbi əməliyyatları dərhal dayandırmağa çağırıram”.
Avropa Şurasının Baş katibinin sözlərinə görə, silahı yerə qoymağın, gərginliyi azaltmağın və dialoqa başlamağın vaxtı çoxdan çatıb: “Yalnız bütün tərəflərin iştirakı mənalı, qeyd-şərtsiz dialoq alternativi olmayan uzunmüddətli sülhə gətirib çıxara bilər. Avropa Şurası hər kəsin, o cümlədən milli azlıqların insan hüquqlarından tam istifadə etməsi üçün bu prosesi dəstəkləməyə hazırdır”.
Ümumilikdə, AŞ Baş katibinin belə mövqeyi bəzi beynəlxalq təşkilatlar üçün xarakterik mövqedir. Əməliyyatların dayandırılmasını tələb edirlər, amma heç demirlər ki, Qarabağda qanunsuz erməni silahlı birləşmələri buraxılmalıdır. Ordakı qondarma “yerli hakimiyyət” özünü buraxmalıdır.
“Avropa təsisatları mövzu Azərbaycan olduqda məsələni görməzdən gəlirlər”
Məsələ ilə bağlı “Bakı-Xəbər”ə açıqlama verən hüquqşünas Şəmsəddin Əliyev bunu beynəlxalq qurumların ədalətsiz olması ilə əlaqələndirdi: “Çox təəssüf ki, bəzi beynəlxalq təşkilatlar, onların təmsilçiləri beynəlxalq hüququn tələblərindən çıxış etmirlər. Hamılıqla tanınan normaları dilə gətirmək istəmirlər. Heç kəs demir ki, qanunsuz silahlı birləşmələrin Azərbaycanın suveren ərazisində nə işi var. Halbuki, bu, beynəlxalq hüququn pozulması deməkdir. Dünyanın heç bir suveren dövləti istəməz ki, ərazilərində belə birləşmələr olsun. Çünki belə qanunsuz birləşmələr dinc insanlara qarşı terror törədirlər. Avropa təsisatları mövzu Azərbaycan olduqda məsələni görməzdən gəlirlər. Ancaq MDB məkanında digər separatçı qurumlara münasibətdə daha sərt mövqedən çıxış edirlər. Təəssüflər olsun ki, biz illərdir belə ədalətsizliklərlə üzləşirik. Bu, həmin təşkilatların riyakarlığının göstəricisidir. O baxımdan təbii ki, qəbuledilməzdir. Lokal xarakterli antiterror tədbirlərinin dayandırılmasını tələb edən Avropa Şurasının Baş katibi Mariya Peyçinoviç Buriç bir dəfə olsun qanunsuz birləşmələrin ləğv olunmasını deməyib. Nəinki deməyib, heç onlar barəsində söz belə açmır. Azərbaycanın suveren haqqıdır ki, ərazisində belə birləşmələri ləğv etsin. Kimsə bizə nəyisə diqtə edə bilməz. Bu, beynəlxalq hüquqda da belə ehtiva olunub. Bu gün Avropanın beşiyi sayılan Fransa Afrikada əməliyyat aparırsa və Avropa buna susursa, o zaman nə əsasla öz suveren ərazisində lokal antiterror tədbirləri aparan Azərbaycandan nəyisə tələb edirlər? Ona görə də ilk növbədə özləri beynəlxalq hüquqa əməl etsinlər, ondan sonra bizə irad tutsunlar”.
Vidadi ORDAHALLI
