Beynəlxalq təşkilatların əksəriyyəti Azərbaycana qarşı ifrat qərəzli mövqeyi ilə seçilir. “Freedom Hous” da çox uzun illərdir ki, Azərbaycana qarşı bu yolu tutur. Sözügedən təşkilat Azərbaycanın öz ərazisi olan Qarabağda keçirdiyi və artıq istədiyi nəticə ilə başa çatdırdığı lokal antiterror tədbirlərinə qarşı da qarayaxma yolunu tutub.
Beynəlxalq “hüquq müdafiə” təşkilatı X sosial şəbəkəsindəki səhifəsində Azərbaycanı “Arsax”a “təcavüzdə” ittiham edib. Üzdəniraq təşkilat ABŞ-ı, digər dövlətləri və beynəlxalq qurumları Qarabağdakı ermənilərin “hüquqlarını qorumağa”, onları “müdafiə etməyə” çağırıb. Bununla kifayətlənməyən psevdotəşkilat Azərbaycan hökumətinin “məsuliyyətə cəlb edilməli” olduğunu da iddia edib. Cinayətkar Ermənistanın yanında dayanan, bir dəfə də olsun Azərbaycanın haqq işini görməyən, qaçqın-köçkün, şəhid faciəsini görmək istəməyən, əl boyda bir bəyanat verməyən “Freedom Hous"un Azərbaycan hökumətini günahlandırması yolverilməzdir. Bu qurum dərk etməlidir ki, Xankəndi və ətraf ərazilər Azərbaycanın ərazisidir və Azərbaycan Qarabağda öz konstitusion haqlarını bərpa edir, oradakı qanunsuz silahlı dəstələrə, separatçılara, terrorçulara qarşı addım atıb, hədəfi heç vaxt dinc insanlar olmayıb.
İSBAM sədri Samir Adıgözəlli “Bakı-Xəbər”ə şərhində bildirdi ki, birincisi, Azərbaycan öz suveren ərazisində lokal antiterror tədbirləri həyata keçirib. “Azərbaycan başqa dövlətin ərazində antiterror tədbirləri keçirməyib, öz ərazində keçirib. Bütün dünya ictimaiyyəti də bilirdi ki, Qarabağdakılar qanunsuz silahlı dəstələrdir, amma heç bir beynəlxalq təşkilat Ermənistandan qanunsuz silahlı dəstələrini Azərbaycan ərazindən çıxarmasını tələb etmirdi. Bu qanunsuz silahlı dəstələr hər cür cinayət işləyib, mülki şəxsləri öldürüb, mina terroru ilə məşğul olub, insanlıq əleyhinə hər cür vandalizmə əl atıb. Azərbaycan dəfələrlə tələb edib ki, Ermənistan qanunsuz silahlı dəstələrini çıxarsın. Bu, üçtərəfli bəyanatda da əksini tapıb, amma mümkün olmurdu.
Bilindiyi kimi, bölgədə həyata keçirilən və artıq başa çatan lokal xarakterli antiterror tədbirlərinin məqsədi 10 noyabr 2020-ci ildə imzalanmış üçtərəfli bəyanatın müddəalarının təmin olunması, Qarabağ iqtisadi rayonunda törədilən genişmiqyaslı təxribatların qarşısının alınması, Ermənistan silahlı qüvvələrinin birləşmələrinin tərksilah edilərək ərazilərimizdən çıxarılması, onların hərbi infrastrukturunun zərərsizləşdirilməsi, işğaldan azad edilmiş ərazilərə qayıdan dinc əhali, habelə bərpa-quruculuq işlərinə cəlb olunmuş mülki işçilər və hərbi qulluqçularımızın təhlükəsizliyinin təmin olunması və Azərbaycan Respublikasının konstitusiya quruluşunun bərpa edilməsi olub. Azərbaycan dövləti artıq hədəfinə çatıb və separatçılar təslim olub. Dünən isə bizim ordumuza qarşı əllərində silah döyüşürdülər. “Freedom Hous” təşkilatının qərəzli bəyanatı onun əsl simasını, antiazərbaycan mövqeyini göstərir. Bu təşkilat nəhayət anlamalıdır ki, Azərbaycan beynəlxalq hüquq normalarına uyğun şəkildə öz ərazisində terrorçulara, qanunsuz silahlı dəstələrə qarşı addım atıb, burada dinc əhalidən söhbət getmir. Belə təşkilatların məqsədi sülh yaratmaq yox, qızışdırıcı rolunu oynamaqdır. Qarabağdakı erməni əhali Azərbaycan vətəndaşlarıdır və onlar tezliklə bizim cəmiyyətə reinteqrasiya edəcəklər”.
S.Adıgözəlli vurğuladı ki, “Freedom Hous” təşkilatı özünü “Daşnaksütyun”dan da aqressiv aparır və bu onun antiazərbaycan mövqeyindən irəli gəlir. “Bütün dünya gördü ki, Azərbaycan bu tədbirlər zamanı qətiyyən mülki əhalini və mülki infrastruktur obyektlərini hədəfə almadı və yüksək dəqiqlikli silahların tətbiqi ilə yalnız legitim hərbi hədəfləri sıradan çıxardı. Azərbaycan dövləti Qarabağın erməni əhalisinin taleyini dərindən düşünür, bu baxımdan, “Freedom Hous”un bu qərəzli bəyanatı və saxta əndişəsi yersizdir” - deyə S.Adıgözəlli qeyd etdi.
İradə SARIYEVA
