Rusiyanın sabiq prezidenti, Təhlükəsizlik Şurasının sədr müavini Dmitri Medvedyev teleqram kanalında əməllicə Paşinyanın aqibətinin yaxşı olmayacağını bəyan edib:
“Bir gün qardaş ölkədən olan həmkarlarımdan biri mənə dedi: “Yaxşı, mən sənə yad adamam, məni qəbul etməyəcəksən”. Mən isə cavab verdim: “Biz tərcümeyi-hal ilə deyil, hərəkətlərlə mühakimə edəcəyik. Sonra müharibəni uduzdu, amma qəribə bir şəkildə yerində qaldı. Sonra məğlubiyyətə görə Rusiyanı günahlandırmaq qərarına gəldi. Sonra ölkəsinin ərazisinin bir hissəsindən imtina etdi. Sonra NATO ilə flört etmək qərarına gəldi və arvadı cəsarətlə peçenye ilə düşmənlərimizə getdi. Təxmin et, onu hansı aqibət gözləyir...”.
D.Medvedevin açıqıamasında “sonra ölkəsinin ərazisinin bir hissəsindən imtina etdi” kimi məkrli yanaşma diqqəti cəlb edir. Burada söhbət Ermənistanın Qarabağı Azərbaycanın tərkib hissəsi kimi tanımasından gedir. Görünən odur ki, Medvedev də bunu həzm edə bilmir. Məgər, Qarabağ Ermənistanın bir hissəsi idi? Bu nə deməkdir? Bu bir daha Medvedevin keçmişdə hansı məzhəbə qulluq etməsini nümayiş etdirir.
“Moskva bununla çalışır ki, Paşinyani devirsin”
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin fikrincə, bu, onun ən idbar mövqeyidir: “Əvvəla, Ermənistan Baş naziri Nikol Paşinyan siyasi iradə ortaya qoymadı. Hesab edirdi ki, Fransanın dəstəyi ilə silahlanacaq və Azərbaycana qarşı təzyiqlər edəcək. Azərbaycanla sülh müqaviləsinin bağlanmasına getmədi. Rusiyada separatçıları dəstəkləməklə Azərbaycanın reinteqrasiya siyasətinə mane oldu. Baş verənlərin əsas məsuliyyətini Ermənistan və Rusiya daşıyır. Əldə olunan razılaşmalara rəğmən Azərbaycanın mövqeyini nəzərə almadılar. Rusiyanın Təhlükəsizlik Şurasının sədr müavini, eks-prezident D. Medvedyev N. Paşinyanı nəzərdə tutaraq Ermənistanın ərazisini - Qarabagı Azərbaycana güzəşt etdiyini vurğulayır. Bu, Medvedyevin və Kremlin ən idbar mövqeyidir. Moskva bununla çalışır ki, Paşinyani devirsin. Paşinyanın alternativi Rusiyanın adamıdır. Rusiyanın dəstək verdiyi müxalifət isə Azərbaycana qarşı yenidən revanşa qalxacaq. İrəvanda meydana toplanıb etiraz edənlər Rusiyanin dəstək verdiyi revanşistlərdi. Etirazçılar Azərbaycana qarşı Paşinyanı müharibə etməyə məcbur edirlər. Nəzərə alınmalıdır ki, İrəvan küçələrinə çıxanlar qatı Azərbaycan düşmənləridi. Ona görə də Paşinyanın hakimiyyətdə qalması Rusiyanın qeyri-konstruktiv və işğal siyasətinin qarşısını alır. Paşinyan xalqa müraciətində qeyd etdi ki, Ermənistan müharibəyə qoşulmayacaq. Bu, Rusiyaya vurulan şapalaqdı”.
Vidadi ORDAHALLI
