“Azərbaycanın Qarabağ bölgəsində lokal xarakterli antiterror tədbirləri zamanı dəfələrlə müşahidə edilib ki, Azərbaycan Respublikasının Silahlı Qüvvələri bölmələrinin hədəfindən yayınmaq məqsədilə Ermənistan silahlı qüvvələrinin birləşmələri müxtəlif təyinatlı zirehli döyüş texnikası və atəş vasitələrini yaşayış məntəqələrində yerləşdirib, eyni zamanda hərbi təyinatlı obyektlərə mülki şəxsləri cəlb edir”.
Bu barədə Müdafiə Nazirliyinin Mətbuat Xidmətinin rəisi, polkovnik Anar Eyvazov sentyabrın 19-da Qarabağdakı antiterror tədbirləri ilə bağlı keçirilən növbəti brifinqdə deyib.
O qeyd edib ki, arsenalımızda ən müasir tələblərə cavab verən yüksək dəqiqliyə malik silah və döyüş texnikası mövcuddur: “Peşəkar hərbi qulluqçularımızın bu silahlardan istifadə edilməklə hədəfə aldığı hərbi obyektlərin məhv edilməsi üzrə verilən tapşırıqlar bir çox hallarda məhz hərbi obyektdə mülki şəxslərin olması aşkar edildikdən sonra obyektin hədəfə alınması dayandırılıb”.
Maraqlıdır, Ermənistan Silahlı Qüvvələri hərbi təyinatlı obyektlərə mülki şəxsləri niyə cəlb edir?
“Ermənilərin mülki vətəndaşlardan istifadə etməsinin bir səbəbi də onların yalandan dünyaya hay-həşir salmaq istəkləridir, guya dinc əhaliyə güllə atılır”
Tərxis Olunmuş Hərbçilərin Gəncləri Maarifləndirmə İctimai Birliyinin rəhbəri, hərbi ekspert Emin Həsənli “Bakı-Xəbər”ə açıqlamasında qeyd etdi ki, müharibə zamanı ermənilər hər zaman mülki şəxslərdən istifadə edib: “Onlar həm Azərbaycan tərəfində olan mülki şəxsləri hədəf alır, həm də özləri çətinə düşəndə sadə insanlardan istifadə edirlər. Ermənilər yaxşı bilir ki, azərbaycanlılar onlardan fərqli olaraq mülki şəxslərə atəş açmır. Ermənilərin mülki vətəndaşlardan istifadə etməsinin bir səbəbi də onların yalandan dünyaya hay-həşir salmaq istəkləridir, guya dinc əhaliyə güllə atılır. Ancaq Azərbaycan ordusunun peşəkarlığı öz sözünü deyir. Ordumuz mülki əhali ilə hərbçiləri ayırd etməyi bacarır. Əlimizdə müasir texnikalar var. Həmin texnikalardan ordumuz həm döyüş əməliyyatları zamanı istifadə edir, həm də lazımi görüntüləri əldə edir. 44 günlük Vətən müharibəsində qazanılan zəfər Amerika, Böyük Britaniya və bir çox ölkələrin hərbi məktəblərində öyrənilir. Antiterror əməliyyatlarında Azərbaycan təcrübəsi dünya məktəblərində tədris olunacaq”.
Günel CƏLİLOVA
