Məlum olduğu kimi, Azərbaycan Respublikasının konstitusiya quruluşunun bərpa edilməsi məqsədilə bölgədə lokal xarakterli antiterror tədbirlərinə başlanılıb. Üçtərəfli bəyanatın müddəalarının təmin olunması, Qarabağ iqtisadi rayonunda törədilən genişmiqyaslı təxribatların qarşısının alınması, Ermənistan silahlı qüvvələrinin birləşmələrinin tərksilah edilərək ərazilərimizdən çıxarılması məqsədi ilə bu tədbirlər həyata keçirilir.
Lakin hər zaman olduğu kimi, yenə də Ermənistanın baş naziri Nikol Paşinyan baş verənləri təhrif etməyə çalışır. Paşinyan dünən Təhlükəsizlik Şurasının iclasında bəyan edib ki, Azərbaycanın əsas məqsədi Ermənistanı hərbi əməliyyata çəkməkdir: “Ermənistan Respublikası sərhədi boyunca hazırda vəziyyət nisbətən sakitdir, amma bir daha vurğulayıram ki, bu əməliyyatın məqsədi Ermənistan Respublikasını hərbi hərəkətlərə çəkməkdir. Ermənistanın Qarabağda ordusu yoxdur. Azərbaycanın bu hərəkətlərin başlanmasına dair Rusiyanı rəsmi məlumatlandırmasına dair məlumatı qəribədir və anlaşılmazlıq yaradır”.
Axı Azərbaycanın nəyinə lazımdır Ermənistanı müharibəyə cəlb edib iki cəbhədə vuruşmaq?
“Radikal qüvvələri neytrallaşdırmaqdan ötrü belə açıqlamalarla çıxış edir”
Məsələ ilə bağlı “Bakı-Xəbər”ə açıqlama verən AMİP sədri Arzuxan Əlizadənin fikrincə, Paşinyanın bu yalanı uydurmaqda bir neçə məqsədi var: “Əvvəla, hazırkı antiterror tədbiri Azərbaycanın öz ərazisində qayda-qanun yaratmaq üçün suveren haqqıdır. Azərbaycan öz suveren ərazisində lokal xarakterli antiterror tədbirləri həyata keçirir. Məqsəd Qarabağda mövcud “boz zona”nı ləğv etməkdir. Çünki heç bir dövlət istəməz ki, ərazisində mərkəzi hakimiyyətin nəzarət etmədiyi belə ərazilər olsun. Məsələ ondadır ki, 10 noyabr 2020-ci il üçtərəfli bəyanata əsasən, Qarabağ ərazisindəki erməni yaraqlıları 3 il əvvəl tərksilah edilməli idilər. Bu razılaşma üçtərəfli bəyanatın 4-cü bəndində əksini tapıb. Ancaq əfsuslar olsun ki, Ermənistan tərəfi buna əməl etmədi. Bu ölkəyə aid silahlı birləşmələri Qarabağdan çıxarmadı. Həmçinin, Qarabağdakı qanunsuz silahlı birləşmələr buraxılmadı. Əksinə, onlar Qarabağa silah daşımağa, yeni mövqelər qurmağa başladılar. O cümlədən, ard-arda təxribatlar törədirdilər. Bunun nəticəsində mülki vətəndaşlar, polis işçiləri şəhid edildi. Belə olan halda başqa çıxış yolu yox idi. Paşinyan isə yalan danışaraq məsələnin mahiyyətini thrif edir. Guya Azərbaycan Ermənistanı müharibəyə cəlb edib bu ölkəyə öz ordusunu yeritmək istəyir. İndiki şəraitdə bu bizə lazımdırmı? Əlbəttə ki, yox. Ən azından ona görə ki, Azərbaycan buna getsə, bizi beynəlxalq müstəvidə təcavüzdə ittham edəcəklər. Onsuz da Azərbaycanın haqq işinə münasibətdə ikili standartlarla üz-üzəyik. Hesab edirəm ki, Paşinyan Azərbaycanı beynəlxalq təzyiqlərə məruz qoymaqdan ötrü belə bir yalanı uydurur. Digər tərəfdən, onun bu açıqlaması ictimai rəyə hesablanıb. Radikal qüvvələri neytrallaşdırmaqdan ötrü belə açıqlamalarla çıxış edir”.
Vidadi ORDAHALLI
