“...Biz, Güney Azərbaycanın azadlığı uğrunda mübarizə aparan 4 təşkilat olaraq bəyan edirik ki, hər an dövlətimiz və vətənimizin bu haqlı davasında ordumuzun yanındayıq və dövlət başçımız sayın İlham Əliyevin uğurlu siyasətini tam dəstəkləyirik.
Son olaraq Tehrandaki anti-Azərbaycan qüvvələrə xəbərdarlıq edirik ki, Quzey Azərbaycan əleyhinə hansısa əmələ girişmək 35 milyon Güney Azərbaycan və İran Türkünün qırmızı xəttidir və mütləq qarşılığını alacaqdır".
Bu fikirlər Azərbaycan Mərkəz Partiyasının, Azərbaycan Milli Dirəniş Təşkilatının (Dirəniş", Azərbaycan Öyrənci Hərəkatının (AZOH) və Güney Azərbaycan Demokrat Partiyasının (GADP) Azərbaycan Ordusunun Qarabağda lokal xarakterli antiterror tədbirlərinə dəstək bəyanatında yer alıb. Dörd Güney Azərbaycan təşkilatı İran rejiminə xəbərdarlıq edib ki, Azərbaycanla bağlı məsələlər onların qırmızı xəttidir. Onlar bu sözlərlə molla rejiminə ciddi təpki göstərib, mesaj ünvanlayıblar.
“İran hər hansı bir təxribat törədərsə ölkə daxilində özünə ciddi problem yaradacaq və Güney Azərbaycan türkləri buna səssiz qalmayacaq”
Azərbaycan Milli Dirəniş Təşkilatının sözçüsü Məcid Cavadi Araz "Bakı-Xəbər"ə şərhində bildirdi ki, “35 milyon Güney Azərbaycan və İran Türkünün qırmızı xəttidir” ifadəsi təsadüfən işlədilməyib. O qeyd etdi ki, Tehran rejimindən hər cür anti-Azərbaycan davranışı gözləmək olar və bu ifadənin də işlədilməsi bu səbəbdəndir. “Bildiyiniz kimi, İran hər zaman antiazərbaycan, antitürk siyasəti yürüdüb. Tehranda hakimiyyətdə olan fars-molla rejimi Azərbaycan dövlət müstəqilliyini bərpa etdikdən sonra bu çirkin əməllərini davam etdirib. Həm birinci, həm də ikinci Qarabağ savaşında Tehrandakı fars-molla rejimi Ermənistana açıq və gizlin istər iqtisadi, istər siyasi, istərsə də əsgəri, hərbi dəstək verdi. Təbii ki, molla rejiminin bu siyasətini Güney Azərbaycan türkləri sərt qarşılayıb. Xüsusən də İkinci Qarabağ savaşında Güney Azərbaycan türkləri Təbrizdə, Tehranda və digər şəhərlərdə bununla bağlı etiraz aksiyaları keçirdilər və İran torpaqları üzərindən Ermənistana TIR-ların və hərbi vasitələrin aparılmasına, demək olar ki, mane oldular, İran rejimini siyasətini dəyişdirməyə məcbur etdilər. Biz düşünürük ki, eyni qüvvələr yenə də Tehranda antiazərbaycan siyasətlərinə davam edirlər. Keçmişdə Xamneinin, Rəisinin və digər İran rəsmilərinin dilindən açıq şəkildə “Ermənistan, Zəngəzur bizim qırmızı xəttimizdir” sözlərini eşitmişik. Təbii ki, biz də Güney Azərbaycan təşkilatları, Azərbaycan türk millətinin bir fərdi, mənsubu olaraq açıqca ifadə edirik ki, Quzey Azərbaycan bizim, yəni Güney Azərbaycanın və İranın digər bölgələrində yaşayan türklərin qırmızı xəttidir. Xankəndidə antiterror tədbirləri həyata keçirilir və antiterror tədbirlərinin də əsas məqsədi burada Azərbaycan qayda-qanunlarının yaradılmasıdır. Xankəndidə həyata keçirilən antiterror tədbirləri haqqında da İran hansısa təxribatçı əməllərə əl atmaq istəsə, əlbəttə, tərəfimizdən onun bir qarşılığı olacaq. Tehran rejimi belə bir addım atmağa cəhd edərsə, gərəkirsə etiraz aksiyaları, gərəkirsə də İranın dövlət orqanlarının və silahlı qüvvələrinin içində olan azərbaycanlıların, türklərin reaksiyası ilə qarşılaşacaq”-deyə qeyd edən M.C.Araz hesab edir ki, molla rejimi bu əməllərindən geri durarsa, bu onun özü üçün də ən yaxşı bir hal olardı. “Əlbəttə ki, Azərbaycan haqlıdır. O qanuni, beynəlxalq səviyyədə tanınan ərazilərində terrorçuları zərərsizləşdirmək, tərkisilah etmək üçün kiçik antiterror tədbirləri keçirir, Azərbaycan bu prosesi uğurla başa çatdırsın və İran bu işlərə qarışmasın, təxribat törətməsin. Əgər İran hər hansı bir təxribat törədərsə ölkə daxilində özünə ciddi problem yaradacaq və Güney Azərbaycan türkləri buna səssiz qalmayacaq”-deyə M. C.Araz vurğuladı.
İradə SARIYEVA
