Akif Nağı: “Erməni tərəfi məkrli niyyətini hələ də davam etdirir”
Ermənistan Azərbaycan ərazisində yenə minalar basdırmağa davam edir. Bu barədə Xarici İşlər Nazirliyində Azərbaycan Respublikasında akkreditə olunmuş diplomatik korpus üçün keçirilən brifinqdə deyilib.
Qeyd edilib ki, ötən ilin avqustundan etibarən 2021-ci ildə Ermənistanda istehsal olunmuş 2728 mina aşkarlanıb və zərərsizləşdirilib. Bunların 1119-u Azərbaycan və Ermənistan arasında sərhəd ərazisində, Kəlbəcər və Laçın rayonlarında, 1609-u isə Qarabağ İqtisadi Rayonunun ərazisində aşkarlanıb. Rusiya sülhməramlı kontingenti, habelə Türkiyə-Rusiya Birgə Monitorinq Mərkəzinin rəhbərləri, o cümlədən xarici ölkələrin hərbi nümayəndələri bu minaların nümayiş olunduğu əraziyə səfər ediblər.
Qeyd etdiyimiz kimi, Ermənistanın Azərbaycana qarşı mina terror davam edir. Bu günlərdə Azərbaycan Ordusunun hərbi qulluqçusu Eminov Xəyyam Mahal oğlu Ağdam rayonu ərazisində bölmələrimizin təminat yolunda qeyri-qanuni erməni silahlı dəstələrinin kəşfiyyat-diversiya qrupu tərəfindən təxribat məqsədilə basdırılmış piyada əleyhinə minaya düşərək xəsarət alıb.
Sentyabrın 19-da səhər saat 4 radələrində yeni inşa edilən Əhmədbəyli-Füzuli-Şuşa avtomobil yolunun 58-ci kilometrliyində Azərbaycan Avtomobil Yolları Dövlət Agentliyinə (AAYDA) məxsus və sözügedən yolda çalışan "Howo" markalı yük maşını tank əleyhinə minaya düşüb. Nəticədə agentliyin 2 əməkdaşı - 21.11.1970-ci il təvəllüdlü Sadıxov Samir Sabiroviç və 02.05.1965-ci il təvəllüdlü Quliyev Fərhad Hüseynağa oğlu həlak olub. Eyni gündə qeyd edilən terrorun baş verdiyi əraziyə yola düşən Daxili İşlər Nazirliyinin 4 əməkdaşı - 05.02.1994-cü il təvəllüdlü Camalzadə Asim Knyaz oğlu, 08.07.1987-ci təvəllüdlü Şirinov Ramil Arif oğlu, 12.07.1991-ci il təvəllüdlü Mahmudov Seymur Elsevər oğlu və 21.07.1998-ci il təvəllüdlü Zamanov Xəzər Azər oğlu hadisə yerində - Xocavənd rayonunun Tağaverd kəndi ərazisində yeni inşa olunan tunel yolunda minaya düşərək həlak olublar.
Son günlər baş verən hadisələrdən bir daha aydın olur ki, erməni terroru davam edir.
- “Son hadisələr göstərir ki, Azərbaycan ərazilərində minaların əksəriyyəti ermənilər tərəfindən 2020-ci il Vətən müharibəsindən sonra basdırılıb”
Mövzu ilə bağlı fikir bildirən Azad Vətən Partiyasının rəhbəri Akif Nağı "Bakı-Xəbər"ə açıqlamasında qeyd etdi ki, erməni tərəfi məkrli niyyətini hələ də davam etdirir. Ermənistan rəhbərliyi və Qarabağdakı separatçı rejim Azərbaycana qarşı nifrətlə yüklənib: “Onlar öz planlarını həyata keçirməyə çalışır. Bütün hadisələr göstərir ki, onlarla başqa dillə danışmaq mümkün deyil. Onlarla ancaq hərbi dillə danışmaq lazımdır. Vətən müharibəsində Azərbaycan qalib olub. Ancaq Ermənistan tərəfi hələ də xain əməllərini davam etdirir. Belə ki, onlar Azərbaycan ərazilərinə yeni minalar basdırır, həmçinin, minalanmış ərazilərin xəritəsini belə vermək istəmirlər. Təəssüf ki, mina terrorunun qurbanları günü-gündən artır. Son olaraq polis əməkdaşları ermənilərin basdırdığı minaya düşüb”.
A.Nağı bildirdi ki, ermənilər şou göstərməklə məşğuldur. Ermənilər rus ununu qəbul edir, ancaq Azərbaycanın göndərdiyi yardımı qəbul etmir: “Ermənilər sanki daş dövrünün təfəkkürü ilə yaşayır. Yalançı təbliğatla məşğuldurlar. Həqiqəti qəbul etmək istəmirlər. Onlar bilməlidir ki, yaşadıqları ərazi Azərbaycan ərazisidir və bizim qanunlara uyğun davranış sərgiləməlidirlər. Ən əsas məsələ hərbi terror niyyətindən yan keçməlidirlər. Silahı yerə qoymalıdırlar. Mina basdırmaq siyasətindən əl çəkilməlidir. Bir sözlə, ermənilər qara niyyətlərinə son qoymalıdır”.
Həmsöhbətimiz onu da əlavə etdi ki, son hadisələr göstərir ki, Azərbaycan ərazilərində minaların əksəriyyəti ermənilər tərəfindən 2020-ci ildə Vətən müharibəsindən sonra basdırılıb. Aşkarlanan minalar bunu sübut edir.
Günel CƏLİLOVA
.jpg)