ABŞ 1 sentyabr razılaşmasından dərhal sonra erməniləri Ağdam yolunu açmağa niyə məcbur etmədi...
ABŞ dövlət katibi Etoni Blinken sentyabrın 1-də Azərbaycan və Ermənistan tərəfi ilə razılaşdı ki, Laçın yolu ilə paralel Ağdam yolu da istifadə olunsun. O zaman niyə ABŞ-dakı erməni lobbisinin əli ilə erməni separatçılarını məcbur etmədilər ki, Ağdam yolunu açsınlar və nəticədə yolun açılması ancaq 18 sentyabrda mümkün oldu?
Siyasi şərhçi Tofiq Abbasov “Bakı-Xəbər”ə açıqlamasında bildirdi ki, bu məsələ ətrafında son dərəcə süni gərginlik yaranırdı və onun üzərində işləyənlər tək erməni lobbisi deyil, həm də ABŞ-ın bəzi qüvvələri də bu prosesdə özlərini ifadə edirdilər: “Nəticədə biz onu gördük ki, süni bir problem ətrafında bir belə lazımsız gərginlik yarandı. Azərbaycan diplomatiyasi çox gözəl təmkin nümayiş etdirməklə, qarşı tərəflərin hər birinə bildirdi ki, istəmirsizsə yol açılmasın. Azərbaycanın itirəcək heç nəyi yoxdu. Bu problemlər bizim üçün elə bir ağır mahiyyət kəsb etmir. Biz 1920 - ci ilin payızında Ermənistanı diz çökdürdük. Onlar bizi aldatmağa çalışırdı o vaxta kimi. Danışıqlar prosesindən qaçırdılar. O zaman biz tələsirdik, bizə lazım idi torpaqlarımızın tez bir zamanda hazır olması. Onlar da bunu bilirdilər, ona görə də istehza ilə bizi qarşılayırdılar. İndi isə biz heç bir tələskənliyə yol verməməliyik. Açılmır, açılmasın. Ac qalan heç vaxt oyunbazlıqla məşğul olmaz. Sizin qarşınıza yemək qoyuruq yenə də istəmirsiz. Özünüz bilərsiz. Odur ki, Azərbaycan diplomatiyasının heç bir çəkinəcəyi yoxdur. Mən əmin idim ki, Ağdam yolu onsuz da açılacaq. Azərbaycan yenə də böyüklük nümayiş etdirdi. Qarabağ erməniləri faktiki Azərbaycan ərazisindədirlər. Onlar heç bir yerə gedə bilməyəcəklər. Onların bütün çıxışları bizim əlimizdədir. Onların bu qudurğanlığı öz başlarında çatlayır. Bu gün guya orada yeni dövlət naziri təyin olunub. Bu hansı dövlətdi? Orda bir qrup silahlı adamlar var. Onların da müqəddəratını biz həll edəcəyik. Lazım gələrsə biz orda antiterror əməliyyatı da keçirə bilərik. Azərbaycan bunları etmək iqtidarındadır. Odur ki, ABŞ çox mənfur bir oyunbazlığa yol verdi. Çünki sözdə Azərbaycanı özünə mütəffiq sayır, enerji, antiterror məsələlərində mövqelərimiz üst-üstə düşür. Baxmayaraq ki, ABŞ Ermənistanın yeritdiyi dövlət terroru məsələsini gözardına vurur. Eləcə də Qarabağda bir yığın erməninin terror vasitəsilə özünü təsdiqləmə imkanlarını görməməyə çalışır. Biz bunların hamısından xəbərdarıq. Amma bu o demək deyil ki, biz zəifik və kimlərsə bizim başımızın üzərindən maraqlarımıza uyğun gəlməyən nəyisə edə bilər. Üç-dörd istiqamət var ki, biz onlarla əməkdaşlıq edirik, onlar bizə müttəfiq kimi müraciət edirlər. Prezidentlərinin bizim rəhbərimiz İlham Əliyevə göndərdikləri müraciətlərində həmişə müttəfiq olduğumuza dair vurğulamalar olub. Belədirsə, niyə riyakarlığa yol verirlər? Niyə erməniləri qızışdırırlar? Odur ki, ABŞ siyasətini ayaq altına qoyurlar. Yuri Kin diplomatdır, ABŞ vətəndaşıdır. Bu proseslərdə Amerikanın rolu heç də ehtirama layiq deyil. Əksinə, düşünməlidirlər ki, müttəfiqlərlə belə davranmaq olmaz. Amerikanın mənfur siyasəti onu şər qüvvəsinə bərabər edib. Bu faktdır. Belə olduğu halda bir daha fikirləşməlidirlər ki, bu nə ilə sonlana bilər...”
Məhəmmədəli QƏRİBLİ
