Uzun illər Azərbaycan torpaqlarını işğalda saxlayan Ermənistanın arxeoloq və tarixçilərinin keçən 30 il ərzində Azərbaycan abidələrinə qarşı saxtalaşdırma işləri apardığı məlumdur. Azərbaycan tarixinin şah əsəri olan Azıx mağarasına qarşı da saxtalaşdırma işləri aparılıb.
Hətta bu saxtalaşdırma kampaniyasına muzdlu xarici arxeoloqları da qoşmağa nail olublar. Azıx işğalda olduğu illərdə orada saysız qanunsuz işlər aparılıb, saxta “dəlillər” əsasında məqalələr, kitablar yazılıb, xarici dillərə tərcümə edilib. Azıx işğaldan azad edildikdən sonra da ermənilər ondan əl çəkmək istəmir və dünyada yenə də onu “qədim erməni abidəsi” kimi qələmə verirlər. Guya ki, Azıxdan tapılan alt çənə sümüyü “erməni qadınına məxsus”dur. Ermənilər beynəlxalq müstəvidə Azıxla bağlı apardığımız işlərə ciddi maneçilik törətməkdə davam edirlər.
“Ermənistan Azərbaycandakı Azıx və Tağlar mağaralarının Dünya İrsi Siyahısına daxil edilməsinə qarşı çıxıb”. Bu barədə Azərbaycan Xarici İşlər Nazirliyinin Mətbuat xidmətinin rəhbəri Ayxan Hacızadə “X” hesabında bildirib.
A.Hacızadə “UNESCO-nun Səudiyyə Ərəbistanının Ər-Riyad şəhərində keçirilən Ümumdünya İrs Komitəsinin 45-ci sessiyasında Ermənistan Azərbaycandakı Azıx və Tağlar mağaralarının Dünya İrsi Siyahısına daxil edilməsinə qarşı çıxıb. Bu, Ermənistanın ərazi iddialarının davam etdiyini göstərir”, - deyə qeyd edib.
Məlumat üçün bildirək ki, ermənilər xeyli müddət əvvəl məqalə yazıblar ki, guya Azıxdan 7 min yaşı olan insan skeleti tapıblar və “DNT təhlilləri göstərib ki, bu, ermənilərlə çox bağlıdır”. Bizim mütəxəssislər isə bunu tamamilə məntiqsiz sayır və bildirirlər ki, sözügedən DNT Azıxa yox, başqa bir mağaraya aid olub. Yəni ermənilərin məqalədə iddia etdiklərinin absurd olduğu növbəti dəfə təsdiqlənib. Bu halda da onlar yenə Azıxın Azərbaycan abidəsi kimi tanınmasına qarşı təxribatçı addımlar atırlar.
“Ermənilər buna ona görə mane olublar ki, Azıx və Tağlarda həyata keçirdikləri qanunsuz əməllər ifşa olunacaq”
AMEA-nın A.Bakıxanov adına Tarix İnstitutunun əməkdaşı Faiq İsdmayılov “Bakı-Xəbər”ə şərhində bildirdi ki, Azıx mağarasının Azərbaycan xalqının, dövlətinin irsi olduğu faktdır. O qeyd etdi ki, ermənilərin bütün qədim abidələri öz adlarına çıxması bezdirici bir hala çevirib. “Azıx mağarası ilə bağlı ermənilərin həyata keçirdiyi saxtalaşdırma kampaniyası hələ də davam edir. Təəssüf ki, onlar hələ də Azərbaycana qarşı əsassız ərazi iddialarından əl çəkmək istəmirlər. Azıx da, Tağlar da qədim dövrlərə aid mağaralardır və onlar Azərbaycanda - Qarabağda yerləşir. Azıx və Tağların yarandığı dövrdə nə millət vardı, nə din vardı, insan təfəkkürü yenicə formalaşmağa başlamışdı, insanlar yeni-yeni qruplaşırdı, icma halına gəlirdi. Azıx və Tağlar mağaralarının “erməni irsi” kimi qələmə verilməsi tamamilə absurddur. Bu abidələrdən Azıx Sovet dövründə kifayət qədər tədqiq olunmuşdu, ona həm yerli, həm də beynəlxalq səviyyədə qiymət verilib. Bununla bağlı yerli və dünya mətbuatında kifayət qədər ciddi elmi yazılar var” - deyə bildirən F.İsmayılov qeyd etdi ki, Azıx mağarası kimi Tağlar mağarası da qədimdir, onun da dünya səviyyəsində qorunması, saxlanılması zərurətə çevrilib. Ermənilərin işğal dövründə Azıx mağarasının 7 girişindən 5-ni tamamilə “təmizlədiklərini” deyən F.İsmayılov qeyd etdi ki, onlar qanunsuz şəkildə 7 metrə qədər qazıntı aparmış və müyyən tapıntılar aşkarlamışdılar, bu tapıntıların bir hissəsini Ermənistana, bir hissəsini də ABŞ-a göndərmişdilər. Onun sözlərinə görə, çünki qanunsuz qazıntı işlərində həm ABŞ-dan, həm də İngiltərədən müstəqil arxceoloqlar iştirak edirdi. “Ermənilərin UNESCO-da Azıx və Tağlar mağaralarsı ilə bağlı apardıqları çirkin kampaniya siyasi xarakter daşıyır. Əlbəttə, UNESCO-nun mütəxəssisləri Azıx və Tağlar mağaralarına dəvət edilməlidirlər ki, ermənilərin hansı cinayətlər etdiyini gözləri ilə görsünlər. Ermənilər buna ona görə mane olublar ki, Azıx və Tağlarda həyata keçirdikləri qanunsuz əməllər ifşa olunacaq. Hər iki mağarada erməni cinayətinin dərin izləri var. Onlar mədəni irsimizə qarşı hər cür qanunsuz əməllər törədiblər” - deyə F.İsmaylov qeyd etdi.
Onun fikrincə, ermənilər bu təxribatı davam etdirə bilərlər, ona görə də biz bütün hallarda buna hazır olmalıyıq, Azıx və Tağların UNESCO-ya daxil edilməsi üçün çalışmalıyıq.
İradə SARIYEVA
